EFESUS 4

Ḇaḇeoser jemaat ma fakamaman eḇesisye

4:1-16

1Snar rarirya yaḇuk swarapepen faro mko, aya, snon sḇefa ḇesma samamyai snar Manseren, insa kankenem mkoḇena namnis snonkaku sor kwar imnis raris fararyor ani. 2#Kol. 3:12-13Inja mkorun mkosnemna ḇesya kwar, mkosnemna nasḇunek ma mkokaḇaḇaḇ. Mkofasnai saswar mkoḇena ro mkofnoḇekyae mko. 3Ma mkoḇesewar famkofaduru ḇaḇeoser Rurya insa fyesepen mko kuker aski: 4baken oser ma Rur oser, imnis raris moḇ sor mko kwar raya faro saneraro oser ro fararyor mko smaya, 5Manseren oser, kakyar oser, masisren oser, 6Allah oser ma Kma ro roi nakam, Allah robo roi nakam ma ifnoḇek roi nakam ma nya papoik nakam.

7Faro oser-oser ro ko ssḇuk kwar saswar-fakamaman siso warnkyara Kristus ḇyukya. 8#Mzm. 68:19Rarirya mnuk ro Refo doḇo:

“Rofafisu dek ḇemoḇ ḇekaki, dun women sibor;

i ḇebuk roi ḇeḇor ḇeḇye faro snonkaku.”

9Rarirya “dek kwar” isoine, ido kwar kako ḇesupswan mun ḇerabaḇ syadiya? 10I ḇedo kwar, i kako dek ḇinkwan ḇemoḇ ḇekaki syadi kwar ro nanki kam, insa ifrur mnis roi ḇeḇor kam. 11Ma i ḇeḇuk kwar iḇye manwawan, iḇye kako nabi-nabi, iḇye manbaryas Ankankinem Ḇeḇye, iḇye kako manfarandous ma ḇeḇuk farkarkorsya, 12insa sfasos snonkaku ḇesren faro fararur afuffarmyan, faro ḇaḇawes Kristus baken ḇyedi, 13isof kokam kosma kwar ḇaḇeoser ro kakyarya ma fawawi ḇekaku ro Allah Rumkun ḇyedi, ma komnis snonkuf ḇepduk, ma faḇaḇye muma ḇesur imnis Kristus, 14inja komnis romawa kasun werḇa, ro farkarkor wam syoso-syoso ḇefrur ḇirḇar ro farfnak fromo ro snonkaku ḇefawi ankarkar ḇeḇuk farkarkor ninyan, 15ḇape kuf nako farkarkor ḇenapes ma saswar, ro roi ḇeḇor kam insa nasur faro i, isoine Kristus, ḇeḇeḇruya. 16#Kol. 2:19Ro i baken ḇesiper ani, – ḇyeḇesyos ma ḇyeḇeyaḇek ḇeoser imnis afuffarmyan baken ḇesiper ro kina oser-oser, – ḇesma sasur ḇyedi ma ḇeḇawes mankundi ro saswarya.

Kankenem ḇebabo kuker Kristus

4:17-32

17Rarirya kuker snonsnon Manseren, yakofenbos faro mko: Mkokenem kaker awer imnis snonkaku ḇefawi Allah ḇa kuker kakara ḇeḇefromo 18ma kakara ḇepampan ḇyena sikenem ḇinkwanbur ḇaḇeoser kuker Allah, snar fawawiḇa ma pakakrek ro sisnesna. 19Ḇaḇaḇir sena napup, isof siso rmomen ḇeḇor kam, ma sifrur farbuk raris marisen sena kuker mamyaiḇa.

20Ḇape mko kada mkoḇese kaku ḇeri. Mko kada mkofarkor kwar ma mkofawi Kristus. 21Snar mkomnaf i kwar ma mkosma farkarkor ro i ma mkoḇeuser napnapes ro Yesus, 22#Kol. 3:9 isoine mkosawen kankenem ḇekwar ro ḇepon, rmomenya kyakok kwar kuker ankarkar, 23insama mkosnemna ma kakara ḇeḇor mkoḇena nbabo kam, 24#Kej. 1:26; Kol. 3:10inja mkokenem babo, imnis raris Allah ifrur kwar ma marisen ḇyedi isoine kankenem ḇenapes, ma ḇesren.

25 # Za. 8:16 Rarirya mkosawen ankarkar ma mkokofen roi ḇekakuyae faro mko, snar kokam koḇekina ro Kristus baken ḇyedi. 26#Mzm. 4:5Rofyor mkomsor, mkomsor isof ori isyun epen awer, rarirya ido mkoḇesasar, 27inja mkoḇuk fafisu faro Ibirisya awer. 28Snonkaku ḇekarawraw, kyaraw wer awer, iḇye syadi ifararur sambraḇ kaku ro fararur ḇeḇye kuker ḇra ḇyesuya, isof isma roi ono faḇyerwas na faro snonkaku ḇesma mnisḇasya. 29Wawos ḇemamas nasasyar awer ro mkosḇamna, mkawos kuker wos ḇeḇefandun ḇeḇawes, insa ḇemnafsya, sisma saswar-fakamaman. 30Mkofrur snefafardun Allah Rur Ḇesren ḇyedi awer, snar Rur ani ryem mko kwar famkowaf ras Koreriya. 31Mkosawen swaruser ḇeḇor ḇesarmar ro mkosnemna, dosam masasor, rakrakrok ma famfaras, rarirya kako ḇarḇor ḇeḇor ḇero mkosnemna kam. 32#Kol. 3:13Mboi mkosnemna nfafir faro min mkoḇesi, mko swaryae mko, ma mkoḇuk ampunyae faro mko, imnis raris Allah ḇyuk ampun ḇemko ro Kristus.

Currently Selected:

EFESUS 4: LAIBHW

Highlight

Copy