EFESUS 3
3
Fararyor kankunes faro ḇeḇe Yahudiḇasya
3:1-13
1Rarirya aya ine, Paulus, manfamyan Yesus Kristus, ḇesmai snar fandun mkoḇena, ne kawasa ḇefawi Allahḇa 2– ma mkomnaf kwar rariso fararur saswar-fakamaman Allah, sikyar mabe aya faro mko, 3isoine kuker nyan mamam sfasna maḇe aya kankunes, imnis fas-fas ḇeknampu yafas iyasne. 4#Kol. 1:26-27Fyor mkowasya i, nari mkofawi kakara ayedi ro Kristus kankunes ḇyedi, 5rofyor syos ḇeponiwara kankunes ani ḇyeḇeḇaryas ḇa faro romawa-romawa snonkaku, ḇape ro baboine Allah Rur ḇyedi fyasna i faro manwawansya ma nabi ḇesren ḇyesya, 6isoine snonkaku ḇeḇe Yahudiḇa, ḇape snar Ankankinem Ḇeḇye, sisma kako ḇaḇeromowi ma sḇekina ro baken ma siwarpu ro amar ssḇuk ro Yesus Kristus ani.
7Ro Ankankinem Ḇeḇye ani yuffarmyan kwar raris Allah saswar-fakamaman ḇyukma ḇeaya, imnisbos kaku fararur papoik ḇyedi. 8Aya kada, yaḇyeḇa syadi rofandu kawasa kam ḇesrensya, ḇape ssḇuk saswar-fakamaman ine, insa yaḇaryas mufaḇe kawasa ḇeḇe Yahudiḇa nana Kristus ḇyena nari ḇeḇroḇa, 9ma insa yaḇaryas rosai ḇeḇeknam ro fararur kankunes ro wampasi wambarek utin-utin ono ḇeyokef ro Allah, ḇeau roi nakam, 10baboine insa jemaatna nbaryas Allah fawawi ḇeḇor ḇyena faro ḇeḇuk sasoser, ma ḇesma papoik ro boiyaswa, 11imnisbos kuker Allah marisen ḇyena ḇekain fyoro, ifrur kwar kuker Yesus Kristus, Manseren koḇedi. 12Kokyar faro Kristus ma koḇeoser kuker i nari komsik ma kosma nyan ḇesun mufaḇe Allah, kuker kakyar koḇena faro i. 13Rarirya yor faro mko, insa mkomkak warek awer aya ro kandera ayedi snar mko, snar kandera ayedi kada idaw ḇaḇye ḇemko.
Paulus nadi ḇyedi
3:14-21
14Rarirya yakain wepur yaḇansubainaḇe Mami ḇarpon ḇyedi, 15faro i kina kam ro boiyaswa ma ro supswan ine sna snonsnon ḇyedi. 16Yaḇenadi insa Allah ḇeḇye syadi imarisen ḇyuk samambraḇ ma makaku faro mkosnemna kuker Rur ḇyedi, 17insa Kristus kyain ro mkosnemna snar kakyar mkoḇena, ma mkoḇe rares ma mkoḇe knam ro saswar. 18Yanadi, insa mko ma snonkaku ḇesrensya kam mkofawi, saswar Kristus ḇyedi aḇaḇamya, kawanwanya, kakakiya ma swafya, 19insa mkofawi kaku saswar Kristus ani isyadi fawawi ḇeḇor kam. Yanadi, insa mkofo kuker Allah ḇaḇeimnis ḇyena.
20Kuker Allah papoik ḇyedi ḇefararur sambraḇ ro ko, Allah ifrur rosai kam nasyadi ro rosai konadi ma korna roḇa kokarana, 21Allah imarisen akak-awob ro jemaat sisandik Allah kada ro Yesus Kristus isof fyoro-fyoro. Amin.
Currently Selected:
EFESUS 3: LAIBHW
Highlight
Share
Copy
Want to have your highlights saved across all your devices? Sign up or sign in
