EFESUS 5

Mkokenem imnis romawa ro isnai

5:1-21

1Rarirya mkoso asuser Allah, imnis romawa iswar kaku 2#Kel. 29:18 ma mkokenem ro saswar, imnis Yesus Kristus iswar mko ma ḇyuk mankundi fa ḇyefarsarser samsom ḇediref faro Allah.

3Ḇape farbuk ma roi ḇemamas roḇa fararur famfnom neḇekofen awer rofandu mko, imnis kankenem ro snonkaku ḇesrensya. 4Rarirya kako wos ḇemamas, ḇeḇebei roḇa fararur famfnom – snar roi ḇeradine nasyusḇa – iḇye syadi wakofen kasumasa faro Allah. 5Mkoswarepen naḇye: snonkaku ḇefrur farbuk, ḇefrur mamas roḇaido snonkaku ḇefrur famfnom, isoine ḇesyom faro amfyanir, osoḇaḇeri fanari isma rarwas ro Kristus ma Allah Ḇaḇesasoser suḇedi.

6Mkoḇor awer kuker wos ḇeḇebeidi ro snonkaku, snar roi ḇerarirya nbuk masasor faro Allah ro kawasa ḇeḇeuser i ḇasya. 7Mkoḇebati awer kuker si. 8Ḇepon iwara mkoro pampan, ḇape baboine mkoroi Manseren isnai ḇyedi. Inja mkokenem imnis romawa ro isnaiya, 9bon ro isnaiya isoine kankenem ḇeḇye ma fararur ḇenapes ma ḇekaku faro Allah, 10ma mkoḇesewar fa mkomamḇaḇir rosai ḇefrur sneprei faro Allah. 11Mkoso ma mkun awer rarwas ro fararur ḇepampan ḇeḇefaindaḇa, iḇye syadi mkosampum fararur anna. 12Snar roi sifrur ro kankunes sikofen na ido nafrur mamyai kwar. 13Ḇape roi ḇeḇor ḇero isnaiya na nfababa, snar isnaiya isnaiyar nakam kwar. 14Rarirya sikofen kwar:

“Mkokḇok, ne, ḇeyenef mko,

ma mkiḇer mko rofandu ḇemarsya

ma nari Kristus isnai mko.”

15Rarirya, mkokara naḇye kaku, mkokenem rariso, mkomnis awer snonkaku ḇefawi royoḇa, mboi mkokenem imnis snonkaku ḇemamkarkir, 16#Kol. 4:5mkofandun fafisuna kuker aunos, snar fafisu ine fafisu ḇeḇarḇor. 17Snar rarirya mkofawi royoḇa awer, ḇape mkoḇesewar insa mkofawi Manseren marisen ḇyedi.

18Ma mkinem awer anggur ḇefrur masaser mko, snar anggur ifrur rarmomen-nafsu, mboi mkoḇesewar insa mkofo kuker Rurya, 19#Kol. 3:16-17ma mkowawosyae faro min mkoḇesi kuker dow, dow sanandik. Mkodisen dow rurya mkobras faro Manseren kuker sneḇesiper. 20Ma mkomarisen syadi ro roi ḇeḇor kam ma mkokofen kasumasa ḇesyakwar faro Allah – Kmaya, kuker snonsnon ro Manseren koḇedi Yesus Kristus,

21ma mkorun mankun mko oser faro ḇeseya ma nari mkomkak Kristus.

Kristus saswar ḇyedi ḇyeknam faro kankenem imbeswa

5:22-33

22 # Kol. 3:18; 1 Ptr. 3:1 Ne, bin, kwunem faro swambri imnis kwunem faro Manseren, 23snar swambri ḇyebru faro aw imnis raris Kristus ḇyebru ro jemaat. I kada ḇyuk aski faro jemaat ḇeḇebaken oser ro i. 24Snar jemaat kyunem faro Kristus, rarirya kako binya kyunem faro swari ro roi ḇeḇor kam.

25 # Kol. 3:19; 1 Ptr. 3:7 Ne, snon, waswar swambri imnis Kristus iswar jemaat kwar ma ḇyuk mankundi faḇyesom warek jemaat ani 26ma fyasren jemaat, fyasren kwar ani kuker war masisren ma Allah wos ḇyedi, 27insa ḇye jemaat ani fadores ro ḇarpon ḇyedi kuker baba fyarorewḇa, ikruremḇa roḇaido eḇesena, insa jemaat isren ma fyarorewḇa. 28Rarirya kako snonya iswar swari kada imnis raris baken mankundi ḇyedi: Mansei ḇeswar swari imnis raris iswar mankundi. 29Snar snonkaku oso dayin baken mankundi ḇyedi ḇaim, mboi fyaduru ma ḇyemanmin i imnis raris Kristus faro jemaat ḇyedi, 30snar koine kina ro Kristus baken ḇyedi. 31#Kej. 2:24Ro Refo sfas radine, “Rarirya nari snon oso ibur snari ma kmari ma ḇyeoser kuker swari, isof suḇe baken oser.” 32Kankunes ine ibabos, ḇape ro yakofen kukerya isoine ḇaḇeoser Kristus kuker jemaat ḇyena. 33Ḇape rariso wer kako snon mko oser-oser: iswar swari imnis iswar mankundi ma bin oser-oser iḇye kada ḇyesyowi swa ḇyedi.

Currently Selected:

EFESUS 5: LAIBHW

Highlight

Copy