2 KORINTUS 9
9
Bantukai d̄iru'u b̄a sasama dou ela Al Masih
1Sapodakaina watid̄u paralu walina nahu tunti d̄iru'u nggomid̄oho mab̄oha rabantukai ma wunga nggadu d̄iru'u ela Ruma Hatalla d̄i Yudea. 2Nahu b̄ade nggomid̄oho maca'u bantu, ro nahu wa'ura kabangga-banggaku nggomid̄oho d̄i dou-dou d̄i Makedonia. Nggahi nahu d̄i siad̄oho, b̄a one tampu'u mba'ana ma ulu cina ra angi d̄i Akhaya wa'ura sadia d̄imambei sumbanga. Ro kapoda ade nggomid̄oho wa'ura nanaha kapoda ade sarunde dou d̄i weki siad̄oho. 3Ake nahu manggadu la Titus ro cinata d̄uana ede d̄i nggomid̄oho loakud̄u au rakabangga-bangga b̄a nami mab̄oha nggomid̄oho aina nggahi mpoa. Ndad̄i, nggomid̄oho pab̄uapu wa'ura sadia, b̄ara nggahi nahu d̄i siad̄oho b̄a one nggomid̄oho wa'ura sadia ru'u ede. 4Nahu dahu adeku kombisi wara dou-dou Makedonia ma b̄atu sama-sama lab̄o nahu peade d̄i wakatu mai nahu d̄i nggomid̄oho. Ro nggara rakasi b̄a siad̄oho b̄a one nggomid̄oho watipu sadiamu, nawancuku majamu nami peade, b̄ara wa'ura nggahi b̄a one nami ma'imbi poda d̄i nggomid̄oho! Ro ndai nggomid̄oho rau d̄imamaja rau. 5B̄ara ndedena iu b̄a nahu naparaluku nggadu ulu siad̄oho ede d̄i nggomid̄oho d̄ima'uru sumbanga rasake b̄a nggomid̄oho ede. Karawikai b̄a nahu ede loakud̄u maisi nahu peade, rambei b̄a nggomid̄oho ede wa'ura sadia. Ade ndedekaina, natada b̄a one rambeimu ede rambei kai sana ade, ro laina kai pakasa.
6Kawarapu! Dou ma pari d̄ei sato'i-sato'i d̄imaweha hasi sato'i rau. Pala dou ma pari d̄ei mamboto d̄i maweha hasi ma mboto rau. 7Sanikina dou pab̄uaku mbeina b̄era rela b̄a adena. Aina sia mbeina kai mbali mbua ade atao kai pakasa, b̄ara Ruma Hatalla nameci ra ca'uku dou ma mbei kai sana ade. 8Ruma Hatalla makuasa mbei bareka maremba poda d̄iru'u nggomid̄oho, loakud̄u nggomid̄oho mantau ncau au raparalu b̄a nggomid̄oho; nggomid̄oho d̄i mancewi ru'u karawi mataho ro amal. 9#Mzm. 112:9 Ade Alkitab ratunti b̄une ake mab̄oha Ruma Hatalla,
”Sia nabage-bageku d̄iru'u b̄a dou mancoki mori;
Taho ade-Na ma'ederahid̄i santoi-ntoina.”
10 #
Yes. 55:10
Ruma Hatalla ma sadia wea d̄ei d̄iru'u dou mapari ro ngaha ra nono d̄iru'u ndaita. Sia rau d̄imasadia weana ro nakambotoku au rapari b̄a nggomid̄oho, loakud̄u hasi ncera ra mbura ademu naha mboto rau. 11Ade ndedekaina nggomid̄oho d̄imancihi ade samenana lampa rawi ndad̄i nggomid̄oho maloa mbei ncau kai ncera ra mbura ademu. Ro rambeimu racengga-cengga b̄a nami, nakandad̄iku mboto dou marenta tarima kasi d̄i Ruma Hatalla. 12B̄ara rawi mataho rakarawi b̄a nggomid̄oho ake laina kancihina au ramakura d̄i ela Ruma Hatalla mpoa, pala d̄imakandad̄i rau mboto dou matarima kasi d̄i Ruma Hatalla. 13Ro rad̄i taho ade rakatada b̄a nggomid̄oho ede, mboto dou ela Al Masih d̄i Yudea d̄imaroi ra wadina Ruma Hatalla b̄ara siad̄oho edana to'amu d̄i Haba Mataho mab̄oha Al Masih ra b̄atu b̄a nggomid̄oho ede. Siad̄oho rau roi ra wadina Ruma Hatalla, b̄ara nggomid̄oho wancuku ncera ra mbura ademu d̄i macengga-cengga d̄i siad̄oho ro d̄iru'u samenana dou makalai au ma wara d̄i ndaimu. 14Ndad̄i siad̄oho d̄imado'a wea nggomid̄oho kai iu meci angi b̄ara Ruma Hatalla wancuku taho adena d̄i nggomid̄oho. 15Pab̄uaku ndaita syukura d̄i Ruma Hatalla d̄i au rambei-Na ma wancu heba poda ede.
Currently Selected:
2 KORINTUS 9: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
