2 KORINTUS 10
10
La Paulus horuna karawina
1Ake nahu, la Paulus, wara ne'eku nggahi d̄i nggomid̄oho. Nahu ake, ranggahi dou, mapu nggahi ra eli nggara kancao tandosi lab̄o nggomid̄oho, pala disa nggara d̄o'osi. B̄ara mapu nggahi ra eli ro taho ade Al Masih, 2nahu karaho poda-podaku aina ndawi nahu pakasaku d̄i nggomid̄oho nggara maisi nahu peade. B̄ara nahu wa'ura niaku d̄imakapoda rawi d̄i dou-dou ma nggahi b̄a one nami karawi kai kane'e dunia kai. 3Nami poda romo mbuipu morimu d̄i ade dunia, pala nami wati usaha kapodamu ade kai dasa ne'e dunia. 4D̄aha ra d̄ano rakani b̄a nami d̄i ade usaha kapoda ade nami laina d̄aha dunia ake, pala d̄aha ra d̄ano Ruma Hatalla ma ntau kuasa. Kai d̄aha ra d̄ano ede nami kalelimu matapana; tulekai b̄a nami cence ncihi 5ro ncorakaimu bente sombo ratu'u d̄imadaca'u ro loa ra tingi mab̄oha Ruma Hatalla. Taha b̄a nami fiki ra kananu dou-dou ro ndawimu siad̄oho oko ro dahu d̄i Al Masih. 6Ro nggara nggomid̄oho wa'ura to'a poda, nami sadia d̄imahukum sara'a dou ma wati to'a.
7Pab̄uapu nggomid̄oho kawara weki d̄i ka'ada'an sapodakaina. Nggara sab̄ua-b̄ua dou imbi poda b̄a one sia ntau Al Masih, pab̄uaku sia kawarana d̄i weki ndaina ro kawara weki b̄a one nami rau ntau Al Masih b̄une sia. 8Nahu wati majaku nggara nahu ncewi mboto kabangga-bangga kuasa rawa'u mbei b̄a Ruma d̄i nami, b̄ara kuasa ede rambei d̄i katu'ukai nggomid̄oho, laina d̄i d̄umbakai. 9Nahu wati ne'eku nggomid̄oho iumu b̄a one nahu makadahu nggomid̄oho kai sura-sura nahu. 10Nggahi dou, ”Sura-sura la Paulus ede na'ipiku ngahana ro nawibawa, pala nggara ndai sia wara d̄i woha ndai, wekina mapu ro nggahi ra elina wati ntau ao au-au!” 11Dou ma b̄une ede pab̄uaku kawarana weki b̄a one nggara nami wara d̄i woha nggomid̄oho, karawi nami ncihi poda b̄une au ratunti b̄a nami ade sura-sura nami.
12Tantu nami wati disamu ntewi kai atao wi'i weki nami sama b̄une lab̄o dou-dou ma wi'i wekina ese. Nawancuku sampulana siad̄oho! Siad̄oho ndawina taka ndaina ro kaco'i weki ndaina kai taka ede. 13Nami wati ndedena. Nggara nami makabangga-bangga weki, nami wati kalalomu hampa. Nami ngge'e d̄i ade hampa-hampa dana ra rasa karawi kai rawa'u katantu b̄a Ruma Hatalla ru'u nami. Ro nggomid̄oho lu'u d̄i ade dana ra rasa ede. 14Ndad̄i, wakatu mai lamba b̄a nami nggomid̄oho ro wa'a Haba Mataho mab̄oha Al Masih ru'u nggomid̄oho, nami sapoda-podakaina wati losamu rad̄i kahampa dana ra rasa karawikai nami. 15Nami wati roimu weki d̄i karawi dou makalai ma wara ari mai b̄a rakahampa rakatantukai b̄a Ruma Hatalla ru'u nami. Ndede wali nami ngge'empa ade kahampa rakatantu kai b̄a Ruma Hatalla ru'u nami ro mane'e to'i nggomid̄oho naha imbi d̄i Al Masih, loakud̄u karawi b̄a nami rawi ma ncewi na'e d̄i woha nggomid̄oho. 16Ade ndedekaina nami maloa ngoa kahaba rau Haba Mataho ede d̄i dana ra rasa makalai kai wati pab̄ua kana'e-na'e weki d̄i rakarawi rawa'u karawi d̄i dana ra rasa karawikai b̄a dou makalai.
17 #
Yer. 9:24
Ade Alkitab ratunti, ”Dou ma ne'e kabangga-banggakai au-au, pab̄uaku kabangga-bangga d̄i au rawa'u karawi b̄a Ruma.” 18B̄ara dou raroi eded̄u dou d̄iroi b̄a Ruma, laina dou ma roi weki ndaina.
Currently Selected:
2 KORINTUS 10: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
