2 KORINTUS 8
8
Sumbanga piti rad̄i dou-dou ela Al Masih
1 #
Rm. 15:26
Cina ra angi, ne'e b̄a nami nggomid̄oho b̄ade rau mab̄oha b̄uneku tahona Ruma Hatalla d̄i ela Ruma d̄i Makedonia. 2Siad̄oho wa'ura uji kai susa ra ncoki ma tani. Pala ade susa ra ncoki ede, siad̄oho neo adena ro wancuku ncera ra mbura adena mbeina bantu d̄iru'u bantukai dou makalai, kone siad̄oho ncoki poda morina. 3Loa kapasati b̄a nahu b̄a one siad̄oho mbeina sab̄era wa'u siad̄oho, konede ncewi. Wati wara marakauna. 4Siad̄oho raho poda-poda d̄i nami nggara loasi siad̄oho b̄atu bantu mbei piti d̄iru'u ela Ruma Hatalla d̄i Yudea. 5Siad̄oho mbeina ma'ipi ncewi d̄irakane'e b̄a nami. Saramba-rambana siad̄oho d̄onggo wekina d̄i Ruma, sawa'u b̄a ede d̄i nami rau, ncihi ncao b̄une rakane'e b̄a Ruma Hatalla. 6B̄ara ndedena nami makau poda la Titus – ma tampu'una usaha ake – loakud̄u sia matuwuna rawi ma taho ake d̄i ade weki nggomid̄oho rau. 7Nggomid̄oho mangau ade samenana lampa rawi: Nggomid̄oho mangau ade lampa rawi imbimu, ade katadakaimu nggahi ra eli, ade lampa rawi loa ra tingi, ade samenana pahu usaha, ro ade meci ra ca'umu d̄i nami. B̄ara ndedena, tahora nggomid̄oho rau mangau d̄i ade usaha ma taho ake.
8Nahu wati kauku ede kai sab̄ua parenta. Pala kai tei katada b̄uneku cahana dou bantuna lenga ra iwana, nahu rau kane'e b̄ade hampa b̄e meci ra ca'umu. 9B̄ara nggomid̄oho mab̄ade podaku b̄a one ndaita wancuku meci ra ca'u b̄a Isa Al Masih, Ruma ndaita. Sia ntau ra wara, pala Sia ndawina weki-Na ndad̄i ncoki mori d̄iru'u kapentikai nggomid̄oho, loakud̄u kai ncoki mori-Na ede, nggomid̄oho ndad̄i ntau ra wara.
10Nggahi b̄a nahu, d̄i hid̄i ndaina nggomid̄oho kanggorimu au rawa'u tampu'u b̄a nggomid̄oho mba'ana ma'ulu. B̄ara nggomid̄oho ma sarambana makananu ro tampu'umu usaha ake. 11Ake pab̄ua rocipu nggomid̄oho matuwuna karawi b̄era wa'ukaimu. Pab̄uapu nggomid̄oho kapoda ade d̄i makanggori usaha ede, b̄une nggomid̄oho ntoi rauna kapoda ade maniana. 12Nggara nggomid̄oho rela mbei, ndad̄i Ruma Hatalla natarimaku rambeimu ede kai dasa au ma wara d̄i ndaimu, laina kai dasa au madawara d̄i nggomid̄oho.
13-14Nahu sama sakali wati wara niaku d̄imahori dou makalai rad̄i su'u ra tundu, ro kataniku nggomid̄oho. Pala b̄ara nggomid̄oho wakatu ake ade ka'ada'an ncihi mena, ndad̄i patura nggomid̄oho d̄i makancihi dawara siad̄oho. Pea nggara nggomid̄oho dawaramu, ro siad̄oho ade ka'ada'an ncihi mena, ndad̄i siad̄oho d̄imabantuna nggomid̄oho. Ade ndedekaina d̄ua-d̄uana sama-sama d̄i karawi wea. 15#Kel. 16:18 Ade Alkitab ratunti,
”Dou ma mboto raka arujiki,
wati ncewina
ro dou ma sato'i arujiki
wati dancihi.”
La Titus ro lengad̄ohona ranggadu sama-sama lab̄o sia
16Wancuku syukumu nami d̄i Ruma Hatalla b̄ara Sia wa'ura kandad̄ina la Titus b̄une caha nami d̄imabantu nggomid̄oho! 17B̄ara la Titus laina rela mpoana mbei raraho b̄a nami, pala sia rau nawancuku cahana bantu nggomid̄oho sampe kai ne'e ndaina sia lao d̄i nggomid̄oho. 18Ro sia nami nggadu raumu cinata ma wancuku d̄i horoma d̄i samenana ela Ruma b̄ara karawina ngoa ra kahaba Haba Mataho rad̄i Ruma Hatalla. 19Ari mai b̄a ede, dou ede wa'ura kad̄ale rau ro katantu b̄a ela-ela Ruma d̄imalenga nami ade lampa ra laokai nami. B̄ara nami d̄imalao lampa d̄imakaronggana rasumbanga ede, loakud̄u kad̄ese ra kantasakai Ruma ro loakud̄u eda b̄a nggomid̄oho b̄a one nami rela bantu.
20Nami majaga kapodaku loakud̄u aina wara dou ma kancara nami ade lampa rawi karonggakaimu rambei ma na'e ake. 21#Ams. 3:4 Nami ne'e karawi rombo laina d̄i tando Ruma mpoa, pala d̄i tando manusia rau.
22Sama-sama lab̄o la Titus ro cina ta ede, nami nggadu raumu sab̄ua cina walita ma kalai. Wa'ura uji b̄a nami sia pila-pila kali ro poda sia naca'u bantu. Ro ake, sia na'ipiku ne'ena bantu nggomid̄oho b̄ara sia nantau ne'e ma na'e d̄i nggomid̄oho. 23Mab̄oha la Titus, sia eded̄u lenga nahu ma karawi lab̄o nahu d̄imabantu nggomid̄oho. Ro mab̄oha cinata d̄uana ede, ma lao sama lab̄o sia, siad̄oho eded̄u dou-dou ranggadu b̄a ela-ela Ruma ro mandad̄i banggakai b̄a Al Masih. 24Raho b̄a nami nggomid̄oho katadapu meci ra ca'umu d̄i siad̄oho, loakud̄u sara'a ela Ruma b̄ade b̄a one nggomid̄oho mameci ra ca'u siad̄oho ro b̄a one au rakabangga-bangga kai b̄a nami mab̄oha nggomid̄oho eded̄u poda.
Currently Selected:
2 KORINTUS 8: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
