2 KORINTUS 4
4
Ntau ra wara rad̄i saroga d̄i ade hid̄i randawi kai dana
1Nami karawikaimu rawi ake b̄ara ncera ra mbura ade Ruma Hatalla. B̄ara ndedena nami wati kompo kananumu. 2Nami wati kanimu cara-cara ma rindi d̄i majakai Nami wati ne'emu karawi kai kuku keko atao rungkamu nggahi ra eli Ruma Hatalla. Nami karawi weamu ru'u Ruma Hatalla kai ade ma raso b̄une rakane'e-Na. B̄ara ndedena, ne'e b̄a nami sara'a dou manilai nami kai taho d̄ei ade mpidana. 3Nggara Haba Mataho rangoa ra kahaba b̄a nami ede mbui ngge'epu d̄i daloa ka'ao, ndad̄i dou-dou mawunga lao d̄imalelimpa ma wati loa ka'ao. 4Berhala madab̄ae ma kuasakai dunia ake mab̄onto fiki ra kananu dou-dou ma wati imbi ede. Siara ma tapa-tapana siad̄oho loakud̄u siad̄oho wati edana taroa rad̄i Haba Mataho ede mab̄oha na'e ra ntoruna Al Masih, eded̄u gambarana Ruma Hatalla. 5Haba rakarongga b̄a nami ede laina haba mab̄oha ndai nami. Haba ede eded̄u haba mab̄oha Isa Al Masih; b̄ara Sia eded̄u Ruma; ro madad̄oho eded̄u adad̄ohomu b̄ara Sia. 6#Kej. 1:3 Ruma Hatalla ma nggahi, ”Pab̄uapu rad̄i d̄ei marindi wontu taroa,” Ruma Hatalla ede rau ma kawontuna taroa ede d̄ei ade ndaita, loakud̄u fiki ra kananu ndaita ndad̄i taroa d̄i loakai ka'ao d̄ese ra ntasa Ruma Hatalla ma kalea d̄i pahu Al Masih.
7Pala ntau ra wara ade maraso ma ntika ede nami wa'amu d̄i weki ndaimu ma wati wara co'i ake randawi kai dana. Ade ndedekaina tadara b̄a one na'e ra ntoruna kuasa ede wara d̄i Ruma Hatalla ro laina d̄i nami. 8Nami radei rad̄i sara'a kalompo, pala nami wati rakali hapi. Nami mbora akamu, pala wati sampe kompo kananumu. 9Mboto ma musu nami, pala nami wati parana ngge'e ndai kese. Ro kone ntuwu nami rab̄oe sampe mabu, pala nami wati mademu. 10Nami ntuwu iumu madena Ruma Isa, d̄i sarumbu nami, loakud̄u mori rau-Na natada d̄i sarumbu nami. 11Santoi mori nami, nami ntuwu kadahu b̄a made b̄ara Ruma Isa, loakud̄u ade ndedekaina mori ra woko Al Masih rau loa d̄ikatada d̄i sarumbu nami ma loa made. 12Ake aona b̄a one d̄ei sarumbu nami made mawunga kapodana ade kalampana kuasana, pala nami neo ademu b̄a one mori ra woko ma wunga kapoda ade d̄ei sarumbumu.
13 #
Mzm. 116:10
D̄i ade Alkitab wara rarenta ake, ”Nahu imbi, b̄ara ndedena nahu nggahiku.” Kai kapoda ade imbi b̄une ede rau, nami nggahimu b̄ara nami imbimu. 14Nami ma'imbi poda b̄a one Ruma Hatalla ma wa'ura kamori mbali Ruma Isa, d̄imakamori mbali nami rau lab̄o Ruma Isa, ro nawa'aku nggomid̄oho ro nami aka tando-Na. 15Sara'ana ede eded̄u d̄iru'u pentikai nggomid̄oho. B̄ara nanaha mboto dou ma'iu meci ra ca'u b̄a Ruma Hatalla, nanaha mboto rau do'a syuku rakarongga d̄i Ruma Hatalla; ade ndedekaina Ruma Hatalla d̄ikad̄ese ra kantasa.
Mori kai imbi
16B̄ara ndedena nami wati kompo kananumu. Konena nami sacara sarumbu kasa wa'ura naha iha, pala kai ade mpida nami rakandad̄i b̄ou d̄i sanikina ainaina. 17Ro susa ma wati ipi ake, d̄i iu b̄a nami ru'u samporo, d̄i mambei hasi ru'u nami sab̄ua mataho ra ntika ma'ipi poda ro ma ederahid̄i. Taho ra ntika ede ncewi na'e poda nggara ntewi kaisi susa ra ncoki ede. 18B̄ara nami wati tio kab̄aemu lampa rawi ma tada, malaisi ma wati tada. Ma tada nawa'u taha samporompa, pala ma wati tada ede ederahid̄i ngge'empa santoi-ntoina.
Currently Selected:
2 KORINTUS 4: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
