2 KORINTUS 3
3
Ada-ada rasake ma b̄ou
1Sab̄ua ake natada b̄une-b̄uneta nami maroi weki ndai wali? Atao loa ndad̄i nami maparaluku sura d̄i roikai d̄iru'u nggomid̄oho atao rad̄i nggomid̄oho, b̄une raparalu b̄a dou-dou makalai? 2Ndai nggomid̄ohoku sura roikai b̄a nami, ratunti d̄ei ade nami ro loa d̄i b̄ade ro d̄imaloa baca b̄a sanikina dou. 3#Kel. 24:12, Yer. 31:33, Yeh. 11:19, 36:26 Ndai siad̄oho naloa eda b̄a one nggomid̄oho eded̄u sura ratunti b̄a Al Masih, ranggaduna kai ta nami. Sura ede ratunti laina kai dawa, pala kai Roh Allah ma mori, lai rauna d̄i wawo lei, pala d̄i ade manusia.
4Nami nggahi ndedekaimu b̄ara imbi nami d̄i Ruma Hatalla kai ncai Al Masih. 5Nami wati ntaumu alasa au-au d̄imakatada b̄a one nami masanggo kalampa rawi ake, pala Ruma Hatalla ma mbei tenggo ra wale ede d̄i nami. 6#Yer. 31:31 Siara ma ndawi nami sanggo d̄imandad̄i ada ru'u sab̄ua rasake ma b̄ou; rasake ma wi'i weki d̄i Roh Allah, laina d̄i hukum ratunti. B̄ara ratunti ede nawa'aku d̄i madekai, pala Roh Allah ede nambeiku mori.
7 #
Kel. 34:29
Aipu wakatu rasake ma wa'a d̄i madekai ede randawi ro pa'a d̄i wadu, taroa Ruma Hatalla nakalea sambura d̄i pahu la Musa. Taroa-Na nawancuku d̄ese ra ntasana, ndad̄ina bangsa Israel wati sanggona ntanda pahu la Musa, konena taroa d̄i pahu ede wa'ura tampu'u mbora wakatu ede. Nggara randawi rasake ma wa'a madekai ede d̄i kasaha kai d̄ese ra ntasa ma ndede na'e, 8tantu randawi rasake rambei b̄a Roh Allah, d̄i kasaha mancewi d̄ese ra ntasa wali. 9Nggara rasake ma hukum manusia ede ndede d̄ese ra ntasana, tantu nancewi d̄ese ra ntasa wali rasake ma kaloana manusia taho mbali lab̄o Ruma Hatalla. 10Loa d̄i nggahi b̄a one au ma ntoina d̄ese ra ntasa, wa'ura wati d̄ese ra ntasa walina b̄ara ipi d̄ese ra ntasana ma ake. 11Nggara au-au ma wa'u taha samporo, ndede d̄ese ra ntasana, tantu au-au ma ederahid̄i ncewi d̄ese ra ntasa wali.
12B̄ara nami mantau kane'e b̄une ede, ndad̄i nami disakaimu nuntu ra nggahi b̄une ede. 13#Kel. 34:33 Nami wati b̄une la Musa ma b̄onto pahuna kai tod̄u loakud̄u bangsa Israel wati edana taroa Ruma mawunga ne'e made ro mbora d̄i pahuna. 14Fiki rakananu siad̄oho wa'ura pula. Ro sampe ainaina ake rau fiki ra kananu siad̄oho mbuipu pula kai tod̄u d̄i wakatu siad̄oho bacana buku-buku mab̄oha rasake ma ntoi ede. Tod̄u ede cuma loa d̄ihengga, nggara dou nasab̄uasi lab̄o Al Masih. 15Ake rau, nabacasi b̄a siad̄oho buku-buku la Musa, tod̄u ede mbuipu b̄ontona fiki rakananu siad̄oho 16Pala nggara sab̄ua-b̄ua dou mai satandona Ruma, tod̄u ede rau d̄i hengga rad̄i pahu dou ede. 17Ruma ranggahi ta ake eded̄u Roh. Ro tab̄e warakai Roh Ruma, ta ede rau wara horikai weki. 18Ake sara'a pahu ndaita wati rab̄onto b̄a tod̄u, ro ndaita makatadana d̄ese ra ntasana Ruma Isa. Ro b̄ara ndedena ndai d̄i rungka ncau, ndad̄i b̄une Sia; nanaha ntoi ndaita nanaha ndad̄i d̄ese ra ntasa. D̄ese ra ntasana ede rad̄i Roh, ro Roh ede eded̄u Ruma.
Currently Selected:
2 KORINTUS 3: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
