2 KORINTUS 5
5
1B̄ara ndai tab̄adeku nggara uma – eded̄u sarumbu – rangge'ekai b̄a ndai d̄i dunia ake d̄ibongka, Ruma Hatalla nasadiaku ru'u ndaita sab̄ua uma d̄i saroga, randawi b̄a ndai Ruma Hatalla ro ma taha santoi-ntoina. 2D̄i ade uma ma wakatu ake, ndai tawetaku b̄ara ndai ne'e poda ade ngge'e d̄i ade uma ndaita ma d̄i saroga ede. 3Uma edeku sarumbu ndaita ma b̄ou. 4Santoi ngge'e ndaita ade uma ma rad̄i dunia ake, ndai tawetaku b̄ara tani ru'u b̄a ndai. Laina b̄ara ndai ne'e hori weki d̄i sarumbu ndai ma rad̄i dunia ake, pala b̄ara ndai ne'e kani sarumbu ma rad̄i saroga ede, loakud̄u sarumbu ndai ma loa made ake d̄i kuasakai b̄a ma mori. 5Ma sadia wea ndai ru'u ede eded̄u ndai Ruma Hatalla, ro Sia mbeina Roh-Na d̄iru'u nenti b̄a ndaita.
6B̄ara ndedena ade nami ma'iu ncauku tenggona. Nami ma b̄adeku b̄a one santoi nami mbuipu ngge'emu d̄ei sarumbu nami ake, nami d̄o'o rad̄i uma d̄i ngge'ekai b̄a nami lab̄o Ruma. 7B̄ara nami morimu kai dasa imbimu d̄i Al Masih, laina kai dasa au d̄i loa eda, 8b̄ara ndedena nami lembo ade. Nami ncewi ca'upu hori weki rad̄i sarumbu nami ake, loakud̄u loa ngge'e sama lab̄o Ruma. 9B̄ara ndedena nami ma'usaha poda-poda d̄i kasanakai ade-Na, nataho wakatu nami mbuipu wara d̄i uma nami ta ake, atao rau ta aka. 10#Rm. 14:10 B̄ara pasti ndai sara'a d̄i wa'a satando aka pengadila Al Masih, ro cua-cua d̄imaraka ufa mancihi ncao lab̄o rarawina d̄i dunia ake – rawi mataho atao rawi maiha.
Taho mbali lab̄o Ruma Hatalla kai ncai Al Masih
11Nami mab̄adeku au aona dahu d̄i Ruma; b̄ara ndedena nami usaha d̄i ka'imbi kai dou mab̄oha weki nami. Ruma Hatalla napataku nami sad̄ei-d̄eina, ro ne'e b̄a nahu nggomid̄oho rau patamu nami d̄ei ade raumu. 12Kai ake nami wati rahomu loakud̄u nggomid̄oho roimu weki nami. Nami cuma mbei sab̄ua alasana ma taho ru'umu d̄i kabanggakaimu d̄i nami, loakud̄u b̄ade b̄a nggomid̄oho b̄uneku nggomid̄oho pab̄uamu cambe d̄i dou-dou ma kapenti pahu dou ro laina tab̄e'ana. 13Nggara nami poda wa'ura tada ringu, ede eded̄u ru'u d̄i kapentikai Ruma Hatalla. Ro nggara nami natada wati ringu, ede ru'u pentikai nggomid̄oho. 14Meci ra ca'u Al Masih ma kuasakai nami; ro nami makawara weki b̄a one nggara sab̄ua dou wa'ura made ru'u samenana dou, ndad̄i ede aona b̄a one samenana dou wa'ura made. 15Al Masih made d̄iru'u sara'a dou, loakud̄u dou-dou ma mori, watid̄u mori d̄iru'u weki ndaina, malaisi d̄iru'u Al Masih ma wa'ura made ro kamori mbali b̄a d̄i kapentikai siad̄oho.
16B̄ara ndedena, nami wati walid̄u nilaimu dou kai taka manusia. Nami parana romo nilaimu Al Masih ta manusia kaina, pala ake watid̄u. 17Dou ma wa'ura sab̄ua lab̄o Al Masih, ndad̄i manusia b̄ou poda. Ma ntoi watid̄u wara walina – sara'ana wa'ura ndad̄i b̄ou. 18Sara'ana ede rakarawi b̄a Ruma Hatalla. Kai ncai Al Masih Ruma Hatalla ndawina dame ndaita lab̄o Ruma Hatalla, edempara imbikaina ndaita taki ra puta ede ru'u damekai dou makalai lab̄o Ruma Hatalla.
19Nami mangoa ra kahaba b̄a one kai ncai Al Masih, Ruma Hatalla ndawina dame manusia lab̄o weki ndai-Na. Ruma Hatalla karawina ede kai wati rekena ncara ra kancaru rakarawi b̄a manusia d̄i weki ndai-Na. Ro nami wa'ura kau b̄a Ruma Hatalla d̄imangoa ra kahaba haba ede.
20Ndad̄i nami eded̄u dou-dou ranggadu b̄a Al Masih. Kai ncai nami ndai Ruma Hatalla karonggana ranggahi-Na. Kai ngara Al Masih, nami maraho poda-poda, tarimapu rambei b̄a Ruma Hatalla ma kaloana nggomid̄oho taho mbali lab̄o Sia. 21Al Masih wati wara dosana, pala Ruma Hatalla ndawina Sia matanggu dosa ndaita, loakud̄u ndaita ndad̄i ncihi ra raso d̄i tando Ruma Hatalla d̄i ade Al Masih.
Currently Selected:
2 KORINTUS 5: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
