ROMA 8
8
Tuboan mo tulutiyo ko Mian Bisa Na Roh
1Budodoiya akiyono koidan koukuman doi yanila mo tubo pomeenggon tukon Kristus Yesus. 2Sabab ko Mian Bisa Na Roh naaturan mo kubaiyo kita tubo pomeenggon tukon Kristus Yesus lapamo sodiiyo yaku doi aturan mo mangaanikene kolalim tukon matean. 3Oila komo aki namoola aturan agama lakukanggene, sabab kita banggapi molemah, doiya lapamo Mian Bisa lakukanggene. Mian Bisa kalayomo kolalim nakuasa doi banggapi natabiat lalomo tukon kapatuwe kona Pau susuungo, mo lubat pokakana tukon banggapi mo baladosa, sulano naapuskanggene kolalim. 4Mian Bisa kubaiyo doiya sulano kona mongiasan inokitakon doi agama Yahudi naaturano moola inampakonggon doi butonggita lalomo mo tubo tulutiyo ko Mian Bisa Na Roh tukon bolikon tulutiyo kobanggapi natabiat. 5Mian mo tubo motulutiyo kobanggapi natabiat, banggadudul pikikene oila komo iniyas doi banggapi natabiat. Bai komian mo tubo tulutiyo ko Mian Bisa Na Roh, banggadudul pikikene oila ko Mian Bisa Na Roh nainiyas. 6Kalu komu pikilan banggapi natabiat kuasaiyo, maka kona akibat matean. Bai kalu komu pikiran Mian Bisa Na Roh kuasaiyo, maka kona akibat doiyamo tuboan maka sanaangan tukon Mian Bisa. 7Mianno napikiran mokinuasai tukon banggapi nasipat, do mianoo pomusu tukon Mian Bisa; sabab do mianoo aki naloingiyo ko Mian Bisa naaturan; tukon takainomo yana aki naloingiyo ko Mian Bisa naaturan. 8Komian mo tubo moloingiyo kobanggapi nasipat, aki namoola sanaanggene ko Mian Bisa.
9Bai komuyu aki potubo moloingi kobanggapi nasipat. Komuyu tubo tulutiyo Mian Bisa Na Roh – kalu, kona tutuuan, Mian Bisa Na Roh tutuu balakuasa doi butomuyu lalomo. Mian mo akiyo Ko Roh Kristus, do mianoo bolikon Kristus namian. 10Bai kalu Kristus tubo doi butomu lalomo, maka mau kai kobutomu naikon namate sabab lalim, bai ko Mian Bisa Na Roh beena tuboan doikoo, sabab komu potaamian tukon Mian Bisa lapamo monondok. 11#1Kor. 3:16 Kalu ko Mian Bisa Na Roh, mo otuboiyo Kristus doi matean, tubo doi butomu lalomo, maka yana mo otuboiyo Kristus doi mateanoo, naikon otuboiyo kobutomu koidan domo moola matedoo. Yana lakukanggene doiya tukon Na Roh mo tubo doikoo.
12Doiyamo kosababpo, Utus-utus, kita daano konda tanggung jawab; bai bolikon tanggung jawab doi banggapi nasipat; kita aki napalaluu tubo loingiyo kona mongiasan. 13Sabab kalu komuyu tubo mololoi banggapi nasipat, maka komuyu naikon mate; bai kalu tukon kuasa Mian Bisa Na Roh, komuyu banggadudul moakateyo komu kokubai-kokubai mo baladosa, maka komuyu naikon tubo. 14Ko mian-mian mo Mian Bisa Na Roh motuntune, daanon Mian Bisa napau-pau. 15#Gal. 4:5-7 #Mrk. 14:36; Gal. 4:6 Sabab ko Mian Bisa Na Roh, mo beekene doi komuyu, aki kai nakubaiyo komuyu teali ata tobikon komuyu tubo doi matakutan lalomo. Kobalino do Mian Bisadoo Na Roh tealikene komuyu Mian Bisa napau-pau. Tukon do kuasadoo Mian Bisa Na Roh kita uange do Mian Bisadoo “Tama, oh Tamang-Ku!” 16Mian Bisa Na Roh polaing-laing tukon kita Na Roh okitakene baikon kita daano Mian Bisa napau-pau. 17Nah, kalu kitadoo daano napau-pau, maka mau nai kita nia daano napangalus naikon mo mantalima berkat-berkat Mian Bisa mo sadiakene tuuk doi napau-pau. Kita naikon mantalima polaing-laing tukon Kristus oila komo lapamo Mian Bisa sadiayo doi Yana; sabab kalu kita sakisaa polaing Kristus, kita naikon kinabasal koidan polaing Yana.
Namonondokan mo posidutukon
18Sasaibino kosakisaawan kita mo toupiyo budodoiya, menurut daku palaat, aki namoola pinosasalakon tukon namonondokan naikon mo inokitakon doi kita. 19Sasaibino kodunia montotiili tukon poloon tuuno naikon kotempono ko Mian Bisa naokitakanano Na pau-pau. 20#Tea. 3:17-19 Sabab kodunia sinodiikono sulano nateali manas, bolikon sabab namongiasan susuungo, bai sabab ko Mian Bisa sodiikenemo buno doiya. Mau kai nabuno doiya daano koidan komoinian nia: 21baikon daano kotempono meeng kodunia naikon inosodii doi kuasa mo manase tukon naikon tulut minaladekakon inakabasal polaing tukon Mian Bisa Na pau-pau.
22Kita toiyo baikon polong doi tempo naposaapon kodunia bebe sabab sakisaa buno meeng koboloki mosakisaa doi tempo namosuungan pau. 23#2Kor. 5:2-4 Tukon bolikono tongo posaapon kodunia komo bebe; kita susuunggita bebe doi noanggita. Kita lapamo mantalima Mian Bisa Na Roh buno Mian Bisa nasabeat tumbeno, maka kita daano koidan montotiili Mian Bisa nasodiiyano kobutonggita sasaibino tukon tealikene kita Na pau-pau. 24Sabab tukon moinian, maka kita sinalamaton. Bai kalu oila doi kitadoo momoinikene kita lapamo kitayo, maka doiya bolikono koidan moinian. Sabab indee kai komo daano momoinikene komeeng kolangge mo lapamo kitayo? 25Bai kalu kita moinikene komeeng kolangge mo akiyoon nda kitayo, maka kita montotiili tukon sabar.
26Bunomo koidan ko Mian Bisa Na Roh lubat tulunge kita kalu kita lemah. Sabab kita aki nda toiyo bulaando kona tutuuwan konda sambeangan; do Rohdoo susuungo mangadap doi Mian Bisa tuuk mokabiyo doi kita tukon poloonan tuuno tobikon aki namoola nabantile. 27Maka ko Mian Bisa mo toiyo kobanggapi noano lalomo, mangalatikene do Rohdoo namongiasan; sabab do Rohdoo kabiyo doi Mian Bisa tuuk doi Mian Bisa namian, tukon pokokonoi ko Mian Bisa namongiasan.
28Kita toiyo baikon ko Mian Bisa ature sasaibino kolangge, tobikon olubatene komo monondok doi mian mo seseange yana tukon mo inuang pokokonoi tukon kona tetel. 29Yanila mo lapamo Mian Bisa piliyo, lapamo koidan tinantukon doi tempono sulano nateali pokakana tukon na Pau, doiyamo Yesus Kristus. Tukon nabuno doiya do Paudoo teali kotumbeno doi antara badaang koutus-utus. 30Bunomo doiya ko Mian Bisa nauangano yanila mo lapamo Yana tantukene loolukon; tukon doi yaniladoo mo inuang, minoolakon pokindokon koidan tukon Yana. Tukon yanila mo minoolakon pokindokon koidan tukon Mian Bisa, mangala obos tuboan doi Mian Bisa lalomo susuungo.
Mian Bisa namaasi tukon parantaraan Yesus Kristus
31Oila komo moola binantil budodoiya tentang sasaibino doiya? Kalu Mian Bisa ala doi kita, indee komo moola lawane kita? 32Na Pau susuungo aki naseseange, bai Yana salakanggene tuuk kita sasaibino nakopontingan; bulaa kai Yana aki naikon nabeekene doi kita sasaibino kolangge bailon? 33Indee kai komo moola gugate kita Mian Bisa namian lilik, kalu ko Mian Bisa susuungo okitakene baikon kita aki nda sala? 34Oilakai daano komian mo yase salakene kita? Yesus Kristus naikon komo belayo kita! Yanamo komo lapamo mate, kai inotuboi koidan doi matean tukon daano doi Mian Bisa doi tampat mo balakuasa. 35Oilakai daano komo moola alangiyo Kristus naseangano kita? Moola kai kokasusaan naalangiyo, kai kasukaran, kai poloilokisan, kai malaalan, kai talalaisan, kai silakaan, kai matean? 36#Sad. 44:22 Doi Kitab Moliyous lalomo totulis buno naiya,
“Sasaibino kooloyo kami tubo doi silaka matean lalomo sabab Ikoo.
Kami kinubai buno domba naikon mo tinembel.”
37Aki! Tongo doi lalomodoo sasaibino kita malaat kamanangan mo bisa doi Yana mo seseange kita! 38Sabab yaku anggayo tuuno baikon doi posaapon kodunia, mau matean mau tuboan, mau malaekat mau ponguasa, mau polobosian-polobosian naiya budodoo, mau polobosian-polobosian doi lounu naikon mo lubat kai bukuanan-bukuanan bailon; 39mau langge-langge doi timbu, mau langge-langge doi dunia lalomo kai oilamo kobailon, sasaibino aki namoola alangiyo ko Mian Bisa moseange kita, buno komo lapamo tudoikene luwe Kristus Yesus, nda Temeneno.
Currently Selected:
ROMA 8: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
