ROMA 9
9
Mian Bisa tukon namian mo topili
1Oila komo naikon yaku mobantile nia doiya bisa sabab yaku Kristus koona. Yaku aki kubakala-kala. Noanggu lalomo Mian Bisa Na Roh komo lolainge, ekeenggele yaku koidan baikon dakubantilan nia bisa. 2Yaku susa tuuno tukon konoanggu susa, 3sabab utus-utusonggu momeeng bangsa tukon yaku. Sabab tuuk yanila, yaku susuunggu yase ko Mian Bisa nakutuke tukon napinooalaason tukon Kristus. 4#Tob. 9:4 Yanila daano mian mo ililik tukon Mian Bisa tealikene yanila Na pau-pau susuungo, tukon okitakene kona kuasa doi yanila. Yana kubaiyo kona perjanjian tukon yanila tukon beena doi yanila agama aturano. Mian Bisa popitoikene doi yanila bulaando yanila sio nabakaleda tukon yanila lapamo koidan mantalima kona perjanjian. 5Yanila daano tumbunggita nakaturunan. Kristus secara banggapian kona luwean doi yanila nabangsa. Yana lobian tatandak doi sasaibino kobanggapi. Ngginaal ko Mian Bisa sidutu-posidutukon! Amin.
6Yaku aki kumakisuutiyo mobantile baikon ko Mian Bisa naperjanjian akimo nateali koidan; bai bolikon sasaibino ko Israel miano doiya mian Mian Bisa mo lilike. 7#Tea. 21:12 Aki nasasaibino Abraham nakaturunan Mian Bisa Na pau-pau. Sabab ko Mian Bisa bantile doi Abraham, “Tongo Ishak nakaturunan komo binantil mukaturunan.” 8Doiya koalatino baikon Abraham nakatulunan komo teali Mian Bisa Na pau-pau; doiya tongo nakaturunan mo sinuung sabab Mian Bisa naperjanjian; tukon bolikon sasaibino kona katurunan. 9#Tea. 18:10 Sabab ko Mian Bisa naperjanjian daano buno naiya, “Doi tempo motinantukon, yaku naikon abali, tukon Sarah naikon malaat meeng kopau mamalane.”
10Tukon naiya koidan: Ribka mosuung lua kona pau mala-malane doi meeng kotama, doiyamo Ishak tumbunggita. 11Akiyoon do paudoo molua nasinuung, Mian Bisa lapamo tantukanggene kona lilikan tuuk doi nabanggadudulan. Mian Bisa napilianoo aki natokooton doi oila komo moola mian lakukanggene, bai tokooton doi Mian Bisa naponguang susuungo. Sabab salataa doi Ribka napau mamalane moluadoo akiyoon namoola kubaiyo kolobo monondok kai mo kulokis, 12#Tea. 25:23 Mian Bisa lapamo bontiikene doi Ribka, “Kolanggongo leleaniyo kopiyoto.” 13#Mal. 1:2-3 Doi Kitab Moliyous lalomo totulis baikon ko Mian Bisa bantile buno naiya, “Yakub yaku seseange, bai Esau yaku misikitene.” 14Oila konda kasimpulan budodoiya? Baikon do Mian Bisadoo aki kai naadil? Takainomo tantumo ko Mian Bisa adil! 15#Tob. 33:19 Sabab ko Mian Bisa bantile doi Musa, “Yaku naikon otudoikene komaasi doi mian mo Yaku yase tudoikene komaasi, tukon Yaku naikon otudoikene koposeangan doi mian Yaku mo yase otudoikene koposeangan.” 16Jadi, ko Mian Bisa nakaputusanoo aki nabaino tokooton doi banggapi namoloyosan kai doi banggapi nakakaatean, bai doi Mian Bisa namonondokan konoano doi namian lilikoo. 17#Tob. 9:16 Sabab doi Kitab Moliyous lalomo totulis, “Mian Bisa bantile doi Tomundo Mesir, ‘Yaku tealikene ikoo tomundo tuuk doi meeng komakisuut nia, doiyamo sulano tukon ikoo, Yaku okitakene Ku kakuasaan tukon kubaiyo kosambumu tololongol doi posaapon kodunia.’ ” 18Jadi, ko Mian Bisa mamaasikene memeeng komian, kalu ko Mian Bisa yase buno doiya koidan. Tukon ko Mian Bisa mangaanikene memeeng komian teali matikas konoano, kalu ko Mian Bisa pakituuwo bunodoiya koidan.
Mian Bisa nanggimalan tukon Mian Bisa noano namonondokan
19Nah, Utus naikon bantile doi yaku, “Kalu buno doiya bulaando ko Mian Bisa modaano yase asalakene kobanggapi? Bolikon kai akiyo komeeng komian momoola halangiyo ko Mian Bisa namongiasan?” 20#Yes. 29:16, 45:9 Bai Utus! Utus tongo banggapi biasa. Tukon Utus aki namoola barani motimbili doi Mian Bisa! Moola kai kopoot bunga mansadai doi mian mo kubaiyo, “Bulaando ikoo mokubaiyo yaku buno naiya?” 21Bolikon kai komian mo kubaiyo kopoot bungadoo daano konahaak kubaiyo kobuta tobunanoo menurut noano namongiasan? Luwedoi makalambulut kobuta tobunan, do mianoo daano konahaak mokubai lua kokaliangano kopoot bunga: meeng komonondok, tukon kobailon kinduung namonondok.
22Bunomo koidan lakon tukon oilamo ko Mian Bisa nakinubai. Yana batetel sulano natipase kona nggimalan tukon okitakene kona kakuasaan. Bai yana sabal doi yanila mo sio nainukum sabab kubaiyo yana nggimal. 23Mian Bisa koidan batetel sulano naotudoikene doi kita komonondokan molobi-lobian mo lubotikene doi kita Na sineang-seang. Kita lapamo sinadiakon sulano nda mantalima do monondokanoo. 24Kitamo kai komo lapamo inuang, bolikon tongo doi bangsa Yahudi, bai koidan doi bangsa bailon. 25#Hos. 2:23 Sabab doi buku Nabi Hosea lalomo, Mian Bisa bantile,
“Mian-mian mo bolikon kumian,
naikon kubantile ‘Kumian’.
Bangsa mo aki kusea-seange,
naikon kubantile ‘Kukokasi’.
26 #
Hos. 1:10
Tukon doiyaa kotampato kona binantilan doi mian, ‘Komuyu bolikon kumian,’
idoo do mianoo naikon sinombuikon Mian Bisa Na pau-pau mo tubo.”
27 #
Yes. 10:22-23
Nabi Yesaya bantile tukon tegas manganai bangsa Israel, “Bisa kai koaito kobangsa Israel pokakana kobone doi tobun, tongo soisik tolong komo naikon salamat. 28Sabab ko Mian Bisa naikon mosobito otuwenge koukuman doi dunia nia antoko.” 29#Yes. 1:9 Yesaya bantile buno naiya koidan, “Koandeino ko Mian Bisa Babasal kona kuasa aki naotinggale doi kita kokaturunan, pasti kita sasaibino lapamo teali buno Sodom tukon Gomora.”
Potaamian antara Mian Bisa namian tukon Bilita Monondok mo luwedoi Mian Bisa
30Jadi, kokasimpulano doiyamo nia: Bangsa-bangsa bailon mo bolikon Yahudi aki nakakaate sulano yanila napotaamian tukon Mian Bisa teali monondok koidan. Bai sabab yanila anggayo, maka ko Mian Bisa kubaiyo kopotaamian yanila tukon Yana teali monondok koidan. 31Kobalino, ko Yahudi miano sidutu kakaate motaatiyo koaturan sulano kona potaamian yanila tukon Mian Bisa teali monondok koidan. Bai yanila aki naberhasil. 32Bulaando yanila moaki naberhasil? Sabab yanila lakukanggene doiya aki naluwe manganggaan doi Mian Bisa, baimo luwe yanila nakakaatean susuungo. Maka yanila otuwong tasambekon doi “Batu Sambekonan”. 33#Yes. 28:16 Manganai do batudoo doi Kitab Moliyous lalomo totulis buno naiya,
“Popalatikanggene naiya: Doi Sion lapamo kubinggakene komeeng kobatu
naikon mo tealikene komian tasambekon;
doiyamo meeng kobatu babasal naikon mo tealikene komian otuwong.
Bai mian mo anggayo doi Yana
aki naikon napau-pauno konoano.”
Currently Selected:
ROMA 9: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
