ROMA 7
7
Aturan basowaanan daano sontoh
1Utus-utusonggu! Utus sasaibino lapamo tingoniiyo koaturan. Jadi, komuyu toiyo baikon aturan nakuasa doi memeeng komian berlaku doi mianoo kalu daano motubo. 2Meeng koboine mo daanomo kona langkai, andeno tokooton luwe do andeanoo doi nalangkai tongo kalu kona langkai daano motubo. Kalu kona langkai mate, do bolokidoo tosodiimo doi aturano mo tokooton doi nalangkai. 3Kalu do boinedoo tubo tukon mala-malane bailon doi tempo nalangkai modaano tubo, maka do boinedoo binantil balolowa. Bai kalu nalangkai mate, maka secara aturan, do boinedoo lapamo tosodii. Tukon kalu yana osowaan koidan doi malane bailon, maka yana aki nabololowa. 4Buno koidan kohallo tukon komuyu, Utus-utusonggu. Doi agama Yahudi naaturan komuyu lapamo mate, sabab komuyu lapamo pinomeenggon tukon Kristus butongo tukon tealimo yana nalangge mo lapamo inotuboi koidan doi matean. Yana inotuboi doi matean sulano kita teali daano kogunano doi Mian Bisa doi nda tuboan lalomo. 5Sabab, looluk kita tubo loloiyo kobanggapi nasipat-sipat. Doi tempodoo komongiasan mo baladosa, mo sumbot sabab nadaanoan koaturan agama, taaniyo tuuno doi butonggita lalomo. Doiyamo kosababpo kita molakukanggene kolangge-langge mo lubatene komatean. 6Bai diabudodoo kita akimo nda tokooton doi aturan agama Yahudi. Kita lapamo mate doi aturan loolukonoo mo kuasaiyo kita. Kita akimo koidan tubo tukon cara mo malumbito, loingiyo koaturan mo totulis. Diabudodoo kita tubo menurut cara moboolu Mian Bisa Na Roh mo tudoikene doi kita.
Aturan tukon lalim
7 #
Tob. 20:17; Kua. 5:21 Kalu buno doiya, oilamo komo moola kita bantile? Baikon koaturan agama Yahudi kulokis? Tantu aki! Bai do aturano komo otunggule yaku tentang lalim. Yaku aki naikon kutoiyo do modokodoo oila, kalu koaturan agama aki nabantile, “Inaikai momodoko.” 8Luwe agama naaturan, kolalim malaat todanan sulano naosumbete sasaibino kolobo mo minomooton mokinodokoi doi noanggu lalomo; sabab kalu koaturan agama akiyo, maka dolalimoo mate. 9Yaku looluk daku tuboan akiyoon nadaano koaturan agama. Bai salataa koaturan agama sumbut, kolalim tambuuno tubo tukon yaku mate. 10Maka do aturan agamadoo, kotumbeno minakisuuti sulano namebee tuboan, tongo olubatene komatean doi yaku. 11#Tea. 3:13 Tobikon luwedoi aturan agamadoo, lalim mangala todanan motipuwo tukon akateyo yaku.
12Atulan agama moluwedoi Mian Bisa, tukon sasamba koparenta doi aturano lalomo kona lubatan luwedoi Mian Bisa, jadi adil tukon monondok. 13Nah, oilakai naiya koalatino baikon domo monondokoo olubatene komatean doi yaku? Tantu aki! Do lalimoo komo lubatene komatean. Tukon mapake monondok, kolalim olubatene komatean doi yaku, sulano kosipat-sipat lalim tokita tukon tontong. Luwe Mian Bisa naparenta-parenta, kona bukutii bulaando kona lokisan kolalim.
Ponggelekiyan doi banggapi butongo lalomo
14Kita toiyo baikon koaturan agama Yahudi luwedoi Mian Bisa Na Roh; bai yaku nia banggapi molemah. Yaku lapamo binalukon sulano teali lalim naata. 15#Gal. 5:17 Sabab yaku susuunggu aki kumangalatikene daku palabuatan. Langge-langge yaku mo yase kubaiyo, doiya yaku aki kulakukanggene; bai kolangge yaku mo misikitene, doiya komo yaku lakukanggene. 16Nah, kalu yaku lakukanggene kolangge-langge mo posasala tukon daku iniyas, doiya koalatino yaku akuiyo baikon do aturan agama Yahudidoo monondok. 17Jadi, bolikono koidan yaku kona tutuuwan komo lakukanggene doiya, bai lalim komo kuasaiyo kobutonggu. 18Yaku toiyo baikon akiyo komeeng kolangge komo monondok doi butonggu; doiyamo doi kusipat lalomo buno banggapi. Sabab daano daku mongiasan sulano kukubaiyo komo monondok, bai yaku aki kumoola moampakonggene. 19Yaku aki kukubaiyo komonondok komo yaku yase kubaiyo; baimo kai yaku kubaiyo kolangge-langge mo kulokis, yaku mo aki kuyase kubaiyo. 20Kalu yaku kubaiyo kolangge-langge yaku mo aki kuyase kubaiyo, doiya koalatino bolikon kai yaku komo kubaiyo do langge-langgedoo, bai lalim mo kuasaiyomo kobutonggu.
21Jadi, yaku mangala kaputusan baikon naiyamo aturan nia komo taaniyo kokakuasaan; doiyamo baikon kalu yaku yase kubaiyo komo monondok, maka tongo mo kulokis tolong komo sumbut doi yaku. 22Konoanggu yase naikon ko Mian Bisa naaturan, 23bai yaku toiyo baikon doi butonggu lalomo daano koidan koaturan bailon mo taaniyo kokakuasaan – doiyamo aturan mo aki napokokonoi tukon aturan kupikiran monondok mo moola akuiyo. Doiyamo kosababpo yaku tokooton doi aturan lalim mo balakuasa doi butonggu lalomo. 24-25Nah, buno naiya daku ndondoong; yaku taatiyo ko Mian Bisa naaturan tukon daku pikilan, bai tukon daku sipat banggapian, lalim kuasaiyo yaku. Bukan maen kona silakaan yaku nia! Indee kai komo yase salamatene yaku doi butonggu nia mo babayo yaku doi matean? Sukuur doi Mian Bisa! Yana yase salamatene yaku luwedoi Yesus Kristus.
Currently Selected:
ROMA 7: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
