EFESUS 5
5
Tuboan doi madialan lalomo
1Komuyu daano Mian Bisa nalabuk-labuk mo sineang, sabab doiya komuyu sio pokakaate mololoiyo ko Mian Bisa. 2#Tob. 29:18; Sad. 40:6 Komu tuboan sio nadaano koseang, buno Kristus seseange kita. Yana salakanggene kobutongo tuuk doi kita, buno meeng kososubakon mo babangi tukon mosanaanggene ko Mian Bisa noano.
3Komuyu daano Mian Bisa namian. Sabab doiya, kokokubai-kokubai mo lokis tukon mo aki napokokonoi, kabai buno bati-batinggai aki namoola daano doi komuyu tanga-tangano. Inai komian bailon daano kona bataanian sulano nabantile baikon komuyu kubaiyo kolangge-langge buno doiya. 4Aki koidan namoola ikoo mobantile kobantilan-bantilan mo manggilit, mo lokis tukon mo aki namomoola. Kobalino siokai komuyu bakinatauwan doi Mian Bisa. 5Timbikene mono-monondok: mian mo lokis kona lenggang, kabai aki napokokonoi, kabai bati-batinggai (kokubai mobuno doiya pokakana koidan tukon manganggaan doi bapilogotan), mianoo aki namoola teali Kristus namian tukon Mian Bisa mopalentayo.
6Inai komuyu potangakakon doi salita-salita mo akiyo kotakoso. Sabab langge-langge nia komo lubatene ko Mian Bisa nanggimalan doi mian-mian mo aki naloingiyo doi Yana. 7Jadi, inaimo po pomeenggon koidan tukon mian-mianoo mobuno doiya. 8Komuyu susuungo loolukonoo daano doi kalipookan lalomo. Budodoiya komuyu lapamo teali Temeneno namian, jadi komuyu daanomo doi madialan lalomo. Tobikon doiya komuyu sio potubo doi madialan lalomo. 9Sabab luwedoi madialan doiyamo kona sumbotan sasaibino kokokubai mo monondok, adil tukon moliyous doi Mian Bisa napambaleng. 10Pokakaate motingoniiyo oila komo sanaanggene ko Temeneno noano. 11Inai pokubaiyo kokokubai-kokubai mo akiyo kotakoso buno mian-mian mo tubo doi kalipookan nakinubai. Kobalino, siokai komuyu poakiyenggene kolangge mobuno doiya. ( 12Sabab langge-langge yanila mo kubaiyo tosookonoo, tuuk doi nabinisalakonan lapamo minamaakon.) 13Sasaibino kolangge mo inakiyonggon doi madialan lalomo, naikon tokita tukon tontong. 14Sabab sasaibino komo moola kinita tukon tontong, doiya madialan. Doiyamo kosababpo mobinantil,
“Banguno, eh ikoo mo moolo,
tukon tubo doi matean!
Kristus montootilang doikoo.”
15Tobikon doiya, potimbikene mono-monondok komu tuboan. Inai motubo buno mian mobonggu; potubo buno mian badaang mopandoi. 16#Kol. 4:5 Gunakanggene mono-monondok kotodanan mo daano doikoo, sabab doi lounu nia daano lounu mo lokis. 17Inai mobonggu, bai ondosuuke oila ko Temeneno namongiasan.
18Inai komuyu pomalangukene koanggur, sabab doiya naikon kulokisene komuyu. Kobalino, siokai komuyu Mian Bisa Na Roh komo kuasaiyo. 19#Kol. 3:16-17 Popakeyo kobantilan-bantilan doi nyanyian sadeong nggaa-nggaale tukon lagu rohani, doi mubasa-basalitaan lalomo. Siokai komuyu tukon noamuyu tedes mananikene kongganggaalano ko Temeneno. 20Sidutu tukon tentang oilamo koidan, siokai komuyu pobakinatauwan doi Mian Bisa Tama, doi Yesus Kristus sambuno nda Temeneno.
Langkai tukon boloki
21Tuuk odotiiyano Kristus, siokai komuyu popoodotii meeng tukon bailon.
22 #
Kol. 3:18; 1Ptr. 3:1 Boloki, odotiiyo kona langkai, pokakana doi Temeneno. 23Sabab kolangkai yana teali kapala doi boloki, buno Kristus teali kapala doi jemaat tukon yanamo susuungo koidan ko Tomundo Pasalamat doi jemaat mo teali butongo. 24Bunomo pokakana koidan jemaat odotiiyo ko Kristus, bunomo lakon doi sasaibino kolangge koboloki sio naodotiiyo kona langkai.
25 #
Kol. 3:19; 1Ptr. 3:7 Langkai seange komu boloki, pokakana Kristus seange kojemaat tukon salakanggene kobutongo motuuk doi jemaatoo. 26Kristus kubaiyo doiya sulano Yana namoola kumesiyo do jemaatoo tukon naotunggul tukon lolo doi paisu basauwan, sulano doibundu Yana moola salakanggene doi Mian Bisa. 27Tukon buno doiya Kristus kubaiyo jemaatoo kokondong tukon babasal tukon bilisii doi salaano, akiyo kona salaan kai oila kosala bailon. 28Bunomo lakon koidan kolangkai sio naseange kona boloki pokakana yana seseange kobutongo susuungo. Mian mo seseange konaboloki koalatino yana seseange kobutongo susuungo. ( 29Akiyo komeeng komian mo misikitene kobutongo susuungo. Kobalino, yana pialayo tukon dagaiyo buno Kristus koidan pialayo kona jemaat. 30Kita toiyo doiya, sabab kita daano anggota-anggota doi Kristus butongo.) 31#Tea. 2:24 Doi Kitab Moliyous lalomo totulis, “Sabab doiya meeng komala-malane naikon otinggale kotamano-tinano tuuk pomeenggon tukon naboloki, tukon luailadoo teali meeng.” 32Ayatoo mobinantil daano koalatino mo atean. Tukon yaku taamikene doiya doi napotaamian ko Kristus tukon jemaat. 33Doi ayatoo motabantil daano kona potaamian koidan tukon komuyu: Siokai memeeng kolangkai seseange kona boloki pokakana yana moseange kobutongo susuungo tukon siokai memeeng koboloki kakaate tuuk odotiiyano kona langkai.
Currently Selected:
EFESUS 5: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
