EFESUS 6
6
Labuk-labuk tukon tamano tinano
1 #
Kol. 3:20
Labuk-labuk! Buno pololaing Kristus, poloingiyo komuorang tua sabab doiyamo komo moola kinubai. 2#Tob. 20:12; Kua. 5:16 “Odotiiyo kotamamu tukon tinamu” doiya daano meeng kopalenta tumbeno doi Mian Bisa tukon dinondiikon, 3doiyamo: “Sulano ikoo mumonondok tukon nabulusan komu umur doi dunia nia”.
4 #
Kol. 3:21
Utus-utus mo teali tama! Inai pobulaandekene kopo labuk-labuk sulano naaki napo teali nggimal. Kobalino, popialayo yanila tukon atulan tukon Temeneno naotunggul.
Ata tukon natuan
5 #
Kol. 3:22-25
Utus-utus mo teali ata! Loingiyo komu tuan napalenta doi dunia nia. Kubaiyo doiya tukon palasaan moodotiiyo tukon molole tukon koidan bisa-bisa buno komuyu kubaiyo doi Kristus susuungo. 6Inai pobabunokon doiya tongo doi tempo komuyu daano modinagai, tolongo sulano pomalaat panggaal doi banggapi. Bai siokai komuyu pokubaiyo babunokon Kristus naata mo daano loloiyo ko Mian Bisa namongiasan tukon tootubo konoano. 7Balimangan komuyu mo daano limange bunomo do atadoo, siokai komuyu polimange tukon noa tedesan naadukon buno Temeneno kopo lineleani, tukon aki nabaino banggapi. 8Poneneeke baikon memeeng komian, mau ata mau kai mian mobebas, naikon mantalima posoboli doi Temeneno motuuk doi langge-langge nakinubai mo monondok.
9 #
Kua. 10:17; Kol. 3:25, 4:1 Utus-utus mo teali tuan! Siokai komuyu pobabunokon buno doiya doi poata. Inaimo pokubaiyo potokuti-potokuti. Neneeke komuyu tukon domu ata-atadoo, sasaibino daano komeeng kona balainggonan, doiyamo Temeneno doi surgaa. Yana aki nalilike komian tambongo.
Langkaapo ko Mian Bisa Nasenjata
10Kona pupusan, siokai komuyu poteali bukuan tukon bukuanan komuyu mo laate doi Temeneno nakuasa, sabab komuyu pomeenggono tukon Yana. 11Popakeyo sasaibino kopo pakakas sinadia polobosian Mian Bisa mo beekene doikoo, sulano komuyu moola bataanggon lawane ko Ibiliis nakuasa. 12Sabab kita berjuang bolikon tolongo lawane kobanggapi, bai lawane sasaibino kosetan-setan nabukuanan mo kuasaiyomo nalounu nia mo lokis. Kita lawane koibiliis nabukuanan mo kuasaiyo kodapang. 13Tobikon doiya, diabudodoo, popakeyo sasaibino ko Mian Bisa nasenjata polobosian, sulano doi oloyo mo lokis komuyu moola lawane komusuh namolobosian. Tukon sulano kalu komuyu lapamo berjuang polong pupus, komuyu daano motambongan tuuno.
14 #
Yes. 11:5, 59:17 Siokai komuyu pobasadia momeenggon. Popakeyo komololean doi Mian Bisa buno poboot oako, tukon komoliosan buno mubokukum besi. 15#Yes. 52:7 Sio komololean natuuk doi babilitakanano ko Bilita Monondok mo babayo komonondokan teali musapatu. 16Samba-samba kotempo pakeyo komu manganggaan doi Temeneno teali mupangalin; tukon manganggaanoo komuyu moola posoiyo kopana matano modaano koaung moluwedoi ibiliis. 17#Yes. 59:17 Poalayo kasalamatanoo bunokene songko besi, tukon Mian Bisa nabantilan buno sabel moluwedoi Mian Bisa Na Roh. 18Kubaiyo sasaibino doiya loolainge tukon sambeang sulano mumangkabi potombonii doi Mian Bisa. Doi memeeng kotodanan, posambeang bunomo lakon Mian Bisa Na Roh nalolaingano komuyu. Siokai komuyu sidutu badagai tukon inai pokala. Posambeang sidutu motuuk doi Mian Bisa namian. 19Tukon posambeang motuuk doi yaku koidan, sulano doi tempo kubasilinganan, Mian Bisa beena yaku bantilan-bantilan mo kana. Tukon sulano yaku barani moola basilinganggene kolaasiano Bilita Monondokoo. 20Sabab Bilita Monondok doiyamo, yaku teali meeng komian mobabasal, tukon budodoiya daano doi talunggu lalomo. Posambeang sulano yaku barani basilinganggene tentang Bilita Monondokoo, buno bulaando dakubantilano.
Teteba napupusan
21 #
Kis. R. 20:4; 2Tim. 4:12 #Kol. 4:7-8 Tikhikus, utusonggita tukon peleleani mo molole doi Temeneno nalimang lalomo, naikon pailukene doikoo sasaibino kolobo tentang doi yaku, sulano komuyu toiyo daku tuboan, tukon daku limang. 22Doiyamo kosababpo yaku sumboliiyo yana doikoo sulano napailukene komai tuboan doikoo sasaibino, sulano naekeenggele konoamu.
23Boliisi ko Mian Bisa Tama, tukon Temeneno Yesus Kristus natealikene sasaibino kojemaat sulano napomeenggon tukon poseang-seang tukon tataap mangangga doi Kristus. 24Boliisi ko Mian Bisa nabalakaatiyo Utus sasaibino mo seange konda Temeneno Yesus Kristus tukon seang mo aki namoola poso.
Komai Hormat, Paulus
Currently Selected:
EFESUS 6: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
