EFESUS 4
4
Butonggita napomeenggonan
1Doiyamo kosababpo yaku – meeng komian motinalunggu, mo tinaan sabab leleaniyo ko Temeneno – kabiyo tuuno doi komuyu: potubo pokokonoikene tukon polenggang buno mian mo lapamo Mian Bisa uange. 2#Kol. 3:12-13 Siokai komuyu sidutu poekependeyo konoamuyu, pomantalamuyuk, tukon sabar. Otudoikene komu seang tukon tomboniiyo meeng tukon bailon. 3Kakaate tutuuno sulano tubo tukon dame sulano pomeenggonan Mian Bisa Na Roh mo tealikene tataap topiala. 4Tolongo daano meeng kobutonggita, tukon meeng ko Roh. Bunomo lakon koidan komuyu inuang tuuk meeng komoinian mo pokakana. 5Tolongo daano meeng ko Temeneno, meeng komanganggaan, meeng kobasauwan paisu salani, 6tukon meeng ko Mian Bisa mo teali Tama sasaibino komian. Yanamo ko Temeneno sasaibino kodunia antoko, mo balimang lolo doi sasaibino, tukon balakuasa doi lalomo sasaibino.
7Kita suwe-suwele mantalima meeng kosabeat lolo doi Kristus nabineekon. 8#Sad. 68:18 Doi Kitab Moliyous lalomo totulis,
“Sambuno Yana liba doi lipu mo tatandak,
Yana mababa badaang komian motinaan;
tukon Yana mebee sabeat-sabeat doi banggapi.”
9Nah, kalu binantil, “Yana liba” koalatino yana tumbe-tumbeno lapamo obulus polong doi lipu napende-pendean tuuno doi buta sakean nia. 10Tukon Yana mo lapamo obulus Yanamo koidan komo liba polong doi lipu mo lobian dodoon kona tatandakan doi sasaibino kotimbu tukon sasaibino kodunia antoko tongusokon tukon nadaanoan. 11Yana komo “momebee sabeat-sabeat doi banggapi”; kosongobos biningkat teali rasul, kobailon teali nabi; kobailon koidan teali pangampakonggon Bilita Monondokoo, tukon kobailon koidan biningkat teali guru-guru tukon popiala jemaat. 12Naiya kinubai sulano ko Mian Bisa namian nalinongkapi tutuuno sulano namoola leleaniyo ko Temeneno tukon nabangune ko Kristus butongo. 13Tukon buno doiya kita sasaibino teali meeng doi manganggaan mo pokakana tentang Mian Bisa Napau. Tukon kita tealimo mian badaang mo babasalo pololokon malumbit pololokon sosuungi kona talakanaan buno Kristus. 14Maka kita akimo nda buno labuk-labuk koidan mo doombaa-doombulo tukon takaikanggi doombala doisumai doi solok lupa-lupa kootunggul doi mian badaang mo bakokolii. Yanila atapayo komian tukon yanila napandoiyan bakokolii. 15Aki! Kobalino kita sio nda bantile kolangge mo bisa tukon noa momoono seang, tobikon doi sasaibino kolangge kita pololokon malumbit pololokon teali talakana buno Kristus, mo teali kapalaiyo kita. 16#Kol. 2:19 Doi napimpinano kita, sasaibino koanggota doi butonggitadoo tosusun monondok, tukon koidan pinotaamikon kololosuano meeng-meeng. Tukon kalu meeng-meeng anggotadoo balimang buno doiya, maka sasaibino dobutonggitadoo naikon tobolii teali tabokon tukon bukuan mololoi seang.
Tuboan mo boolu doi Kristus lalomo
17Tobikon doiya tongo Temeneno sambuno, naiyamo komo naikon yaku mo bantile tukon tegaase: inaimo potubo koidan buno mian badaang mo aki natingoniiyo ko Mian Bisa, tukon pikikene komo akiyo. 18Yanila napikilan kalipookano. Yanila aki natingoniiyo kotuboan Mian Bisa mo beekene, sabab yanila tutuu akiyo kona potoi oioila tentang Mian Bisa. Yanila buno doiya, sabab motikas konoano. 19Yanila akiyono konoano momammaa koidan tobikon yanila loloiyomo sasaibino konoanoila napisuu, tukon tubo balolowa konoanoila nainiyas.
20Bai Kristus Yesus komuyu tingoniiyo bolikon buno doiya! 21Komuyu lapamo lengele tentang Yana! Tukon buno kona pololaing-pololaing, komuyu lapamo inotunggul koidan tentang ko Mian Bisa nasipat-sipat mo daano doi Yana! 22#Kol. 3:9 Tobikon doiya potinggale kobanggapi momalumbito tukon cara tuboan looluk mo minanas doi namongiasan mo atapayo. 23Siokai konoamu tukon komu pikilan nakiniboolu sasaibino. 24#Tea. 1:26; Kol. 3:10 Siokai komuyu potubo buno banggapi boolu mo tinealikon buno Mian Bisa natuboan; doiyamo tukon lenggang mo talakana, moloyos tukon moliyous.
25 #
Zak. 8:16
Tobikon doiya Utus-utus sasaibino, inaimo pokala-kala. Pokubaiyo doi namoloyosan meeng tukon bailon, sabab kita sasaibino kobutonggita danoon mopomeenggon tukon Kristus butongo. 26#Sad. 4:4 Kalu komuyu nggimal, inai pobatadikene nggimalanoo Teaikene komuyu baladosa. Inai ponggimal polong meeng kooloyo, 27sulano ko Ibiliis aki namalaat todanan. 28Mian mo biasa pondikuk sio natade mopondikuk. Kobalino yana sio nabalimang sulano namalaat tambo tukon moloyos tukon moola tulungiyo komian mo kakulangan. 29Kalu komuyu basilingan, inai popakeyo kobantilan mo manggilit. Tolongo popakeyo kobantilan-bantilan pokindok tukon mebee tulungan doi mian bailon. Bantil-bantilan mobuno doiya naikon lubatene komonondokan doi mian badaang mo lengele. 30Inai mosusakene ko Mian Bisa Na Roh noano. Komuyu lapamo binee tanda tukon Roh, teali Mian Bisa langge. Dorohdoo koidan buno meeng kojaminan baikon Oloyo Tongosodiian naikon lubat doikoo. 31Poalapuse sasaibino konoamuyu namasakitan, abos noa tukon nggimal. Inaimo ponggele-nggeleamon tukon pomasa-masangol. Inai koidan nadaano konoamuyu mosikit kabai palasaan bailon mopokakana tukon mosikitan. 32#Kol. 3:13 Kobalino siokai komuyu namonondok konoamuyu tukon poposeang meeng tukon bailon, tukon sio popoompuni buno Mian Bisa koidan ompuniyo komuyu lolo doi Kristus.
Currently Selected:
EFESUS 4: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
