RASUL-RASUL SALITANO 20
20
Paulus ampakon doi Makedonia tukon Yunani
1Salataa kondondoongo doi Efesus tanaango koidan, Paulus kombule kojemaat tukon beena dolongan doi yanila. Doibundu yana mabantil kinatauwan dungolo maka yana banggadudulkene kona ampakonan doi Makedonia. 2Yana duutiyo kolipu-lipu Makedonia tukon mebee badaang kootunggul motuuk doi mian mo mangangga doi Yesus indaa sulano namebee dolongan doi yanila. Doibundu yana ampakon doi Yunani. 3Tolu kobituwon kona kalumbit yana dungol indaa. Maka salataa yana daano mobato-batotobo talabut ampakon doi Siria, daano kobilita baikon ko Yahudi miano pomeenggon sulano naakateyo yana. Tobikon doiya yana putusemo sulano naabali lolo doi Makedonia. 4Sopater Pirus napau mo luwedoi Berea ampakon polaing-laing yana; buno koidan Aristarkus tukon Sekundus Tesalonika miano, tukon Gayus Derbe miano. Koidan Timotius, Tikhikus tukon Trofimus, mian moluwedoi Asia. 5Yanila lukoniyo kami maka totiiliyo kami doi Troas. 6Sambuno lapa Lamekanano Roti Moakiyo ko Ragino, kami talabut tinggale ko Filipi. Sambuno lima kooloyo doibundu kami pokombuli koidan tukon yanila doi Troas. Indaa kami dungol meeng kominggu.
Napupusan Paulus nadutiyano ko Troas
7Minggu popook kami pototongi sulano kaan posinggat socara mondoutusan, Paulus basa-basalita tukon komian, sabab namodoakon yana bapikilo molengget. Polong pintanga kopopook Paulus banggadudul basalita. 8Doi kombiang babo lalomo, tampat mai pototongianoo, daano badaang koposi. 9Meeng kotabo kosambuno Eutikus osulang doi lolombong. Sabab Paulus aki natade-tade basilingan, do tabodoo tealimo pipiit tuuno polong yana tomboosokon doi lolombongoo, maka otuwong doi bilit luwedoi tingkat kotoluno. Tempo yanila nabingkatano, yana lapamo mate. 10Bai Paulus obulus doi bilit, maka lubanggene kobutongo doi tabodoo maka nalebeke. Paulus bantile, “Inai mokhawatil, yana daanoon motubo!” 11Doibundu Paulus liba koidan doi babo, maka namongobos-obos loti tukon kaan posinggat-singgat. Sambuno lapa kona kalumbit mobasalita tukon do mianoo polong dowa-dowa, Paulus lenggeto. 12Komian badaang mobabayo mule do tabodoo tubo doi nabonua. Yanila lasayo sanaang tukon tohibul.
Doi Troas ke Miletus
13Kami ampakon doi kapal maka talabut matailuk doi Asos sulano mai lobotiyo Paulus doi kapal idoo. Yana lapamo moature buno doiya sabab yana naikon badombalaakon lolo bendal. 14Sambuno pososuung doi Asos, Paulus soisobiton liba doi kapal maka kami talabut ko Metilene. 15Luwe indaa kami talabut koidan, tukon modoakon polong doi tampat mo posasalaanggon tukon Khios. Lua kopopook kami polong doi Samos tukon modoakon koidan doi Miletus. 16Paulus lapamo tataapkanggene sulano naaki nasapu doi Efesus, sulano inai nasakukene kotempo doi lipu Asia. Yana yase tuuno moso-mosobit polong doi Yerusalem doi oloyono kolamean Pentakosta.
Paulus mabantil bantilan-bantilan pobabandakonan doi Efesus
17Luwedoi Miletus Paulus makapatu teteba dombalaa Efesus sulano nakabiyo doi katua jemaat indaa nalubat pososuung tukon yana. 18Sambuno yanila lubat, Paulus bantile doi yanila, “Utus-utus toiyo bulaando daku tuboan namalumbitan nia doi antara komuyu salataamo oloyo tumbeno yaku lubat doi Asia. 19Tukon napependean konoanggu tukon namadaangan komatanggu paisuno, yaku balimang tuuk Temeneno doi sakisaawan tanga-tangano komo yaku toupiyo sabab tetel lokis doi Yahudi miano. 20Utus toiyo baikon yaku aki kumata-matakut mobontiikene doi utus-utus oila komo balaguna doikoo. Yaku mongotunggul komuyu doi pososuungan-pososuungan mobadaang komian doi bonua-bonua. 21Mau doi Yahudi miano mau doi bangsa bailon yaku sidutu mebee poingotii sulano yanila badodoloon luwedoi yanila nalalim-lalim tukon lubat doi Mian Bisa, tukon namangangga doi Temeneno Yesus. 22Diabudodoo sulano motaatiyo ko Mian Bisa Na Roh napalenta, yaku ampakon doi Yerusalem. Tukon yaku aki kutoiyo oilamo komo teali naikon doi yaku indaa. 23Yaku tolongo toiyo baikon doi samba-samba kokota, ko Mian Bisa Na Roh lapamo tukon tegas mopailukene doi yaku, baikon yaku naikon inusokon doi talunggu, tukon naikon sakisaa. 24#2Tim. 4:7 Bai yaku aki kupopusinggon daku tuboan nia, asal yaku lapamo alapayo daku tugas nia Temeneno Yesus mo beekenemo doi yaku, tukon asal kusatia polong doi kutuboan napupusan tuuk basalitakanano ko Bilita Monondokoo tentang Mian Bisa namaasi.
25Yaku lapamo lubotiiyo Utus-utus sasaibino tukon lapamo babilitakene koidan tentang bulaando ko Mian Bisa nabapalentaan mobuno Tomundo. Budodoiya yaku piki-pikikene akimo naikon nda pososuung koidan tukon Utus-utus. 26Tobikon doiya tukon tegas yaku bantile doikoo doi oloyo nia baikon kalu daano doi antara komuyu komo silaka naikon, doiya bolikono kusala. 27Aki nabiasa yaku dampas luwedoi kulimang sulano kujelaskanggene doi komuyu sasaibino ko Mian Bisa natetel. 28Siokai komuyu podagaiyo kobutomuyu tukon pobadagai kai koidan sasaibino koanggota jemaat mo lapamo Mian Bisa Na Roh salakanggene doi komuyu sulano dinagai; sabab komuyu lapamo biningkat moteali padagai do anggota jemaatoo. Siokai komuyu podagaiyo ko Mian Bisadoo naanggota jemaat pokakana kopadagai domba, sabab ko Mian Bisa lapamo tealikene do anggota jemaatoo koonamo nalangge susuungo luwedoi napaudoo susuungo namatean. 29Dokuampakonanoo, pasti naikon lubat koasulobo-asulobo mobarani doi komuyu tanga-tangano. Tukon komian komo komuyu mo dagaiyodoo naikon tealimo do asulobo-asulobo nakinaan. 30Bai luwedoi antara Utus-utus susuungo naikon sumbot komian mo basalitakene kobilita mo aki natalakana. Yanila kubaiyo buno doiya sulano komian mo lapamo mangangga doi Yesus nateali tapa tukon mololoi yanila. 31Tobikon doiya pobada-badagai! Neneeke baikon doi tolu kotaun kona kalumbit tukon badaang komatanggu paisuno, oloyo popook yaku aki biasa tade mobangotunggul doi samba-samba komian doi komuyu.
32Budodoiya yaku salakanggene komuyu doi Mian Bisa sulano yana komo pialayo komuyu tukon sulano komuyu pobataani doi bilita Mian Bisa namaasi. Ko Mian Bisa daano kona kuasa sulano naekeenggele komuyu tukon mebee balakaat-balakaat mo lapamo sadiakene tuuk sasaibino kona mian. 33Akiyoon nabiasa yaku momomooti doy kai pakean doi meeng komian. 34Utus susuungo toiyo, baikon tukon bukunggu susuunggu yaku balimang sulano nakoonoiyo daku kapalaluuan tukon tula-tulanggu mo malaing yaku. 35Doi sasaibino kolangge yaku lapamo mebee sontoh doikoo baikon tukon balimang kakabukuan buno naiya kita sio nda tulungiyo komian mo aki nabukuan. Sabab kita sio nda neneeke naikon oilamo komo Yesus susuungo lapamo bantile, ‘Lobian koanggano mebeean tukon doi mantalimaan.’ ”
36Sambuno Paulus lapa basalita, yana ladanggene kotuulo tukon yanila sasaibino maka sambeang. 37Yanila sasaibino kokiil maka lebeke Paulus tukon bantile, selamat jalan. 38Yanila susa toloutama sabab Paulus bantile baikon yanila akimo napokitayo yana koidan. Maka yanila antekene polong doi kapal.
Currently Selected:
RASUL-RASUL SALITANO 20: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
