RASUL-RASUL SALITANO 19
19
Paulus doi Efesus
1Daano Apolos modaanoon doi Korintus, Paulus daano ompokoniiyo kobabono doi lipudoo maka polong doi Efesus. Indaa yana pososuung tukon moimoiya komian mo lapamo anggayo doi Yesus. 2Yana mansadai doi yanila, “Kai lapamo Utus-utus mantalima Mian Bisa Na Roh salataa komuyu anggayo doi Yesus?”
Yanila timbiliyo, “Akiyoon. Bai kami aki mai sidutu molongol baikon modaano ko Mian Bisa Na Roh.”
3“Kalu buno doiya, tukon basauwan oilakai komuyu mosinau?” Paulus sadaikene.
“Tukon Yohanes nabasauwan,” yanila timbiliyo. 4#Mat. 3:11; Mrk. 1:4, 7-8; Luk. 3:4, 16; Yoh. 1:26-27 Maka Paulus bantile, “Yohanes mansau mian sulano naokitakene baikon dopai mianoo lapamo badodoloon doi napolalim-lalim. Bai daano mobuno doiya koidan Yohanes pailukene ko Israel miano baikon yanila sio naanggayo doi mianoo naikon mo lubat doibundu tukon doi yanadoo, doiyamo Yesus.”
5Salataa yanila lengele doiya, yanila sinaumo luwedoi Yesus sambuno. 6Tukon singgatoo Paulus abesemo kolimano doi yanila, Mian Bisa Na Roh kuasaiyomo yanila, maka yanila tambuuno mobasalita tukon silingan-silingan lalomo mo sosibong tukon pelenggene kobilita moluwedoi Mian Bisa. 7Koaito yanila sasaibino daano uga-ugaate songulo lua komian.
8Doi motoludoo kobituwon Paulus baranimo basalita banggadudul tukon doi mianoo doi bonua kaleda tukon ponggeeleki yanila sulano namolakene yanila tentang bulaando ko Mian Bisa nabaparentaan pokakana ko Tomundo. 9Bai moimoiya doi antara do mianoo matikas konoano tukon aki nayase mangangga. Doi mianoo sasaibino mo pokombuli salaano yanila totulaiyo kootunggul manganai Mian Bisa natetel sulano nasalamatene kobanggapi mololo doi Yesus. Tobikon doiya Paulus otinggalemo yanila, maka ampakon tukon Yesus Napololaing-pololaing doi Tiranus nasikolaan lalomo. Idoo sasamba kooloyo yana posadai potimbili tukon mian-mian. 10Yana lakukene doiya langgedoo banggadudul lua kotaun kona kalumbit polong sasaibino komian mo dungol doi provinsi Asia, mau Yahudi miano mau kai doi bangsa bailon sasaibino molongol Yesus nabantilan.
Skewa napau-pau
11Mian Bisa lakukene kokuasa mominasaindinggon mo bolikon langge luwedoi Paulus. 12Kalu lenso kai toik poboot Paulus oako mo biasa pakeyo binabakon doi mian momasakit, konapoo sakit tangalin tukon kosetan naroh tobuat doi yanila. 13Daano komoimoiya kotalapu Yahudi miano ampakon doi yayaa, momosiika setan naroh-roh doi mian. Talapu-talapudoo soba-sobayo koidan mopakeyo Yesus sambuno sulano nasiikayo setannoo naroh-roh. Yanila bantile doi setan narohdoo, “Luwe Yesus sambuno Paulus mo babilitakenedoo, yaku siikayo ikoo!” 14Meeng koimam kapalano daano kopitu kona pau malaneno, kosambuno Skewa, mo lakukene do langge-langgedoo mobuno doiya.
15Bai setannoo naroh bantile doi yanila, “Yaku tingoniiyo Yesus tukon mau Paulus yaku tingoniiyo, bai komuyu nia indee?”
16Maka do mianoo mo inusoki setan tobiil maka kakate yanila tukon ganaso tuuno polong yanila obulen luwedoi bonuadoo tukon poko-pokolon tukon koidan talalau, sabab yanila napakean bineak doi yanila butongo. 17Sasaibino ko Yahudi miano tukon bangsa bailon mo dungol doi Efesus lengele tentang do kadadianoo, maka yanila teali matakut. Maka Yesus sambuno momeenggon ngginaa-nggaal. 18Badaang komian mo tealimo mangangga doi Yesus, lubat moakuiyo doi mian badaang salaano yanila nakokubai-kokubai doi lounu loolukon. 19Tukon yanila mo moola ampakonggene konamontoiyan guna-guna, yanila pototongikene konapo buku-buku tukon yanila suayo doi mian nabadaangan salaano. Do buku-bukudoo olino kalu pinosuungikon sasaibino koolino uga-ugaatene lima kolono koloon kodoy perak. 20Bunomo doiya tukon caradoo mo hebat tuuno ko Temeneno nabantilan momeeng tasabukon tukon momeeng bukuan kona pangalu.
Nggalanggabutan doi Efesus
21Lapamo kajadian-kajadianoo, Paulus tataapenemo sulano naampakon doi Makedonia tukon Akhaya maka nabanggadudul doi Yerusalem. “Salataa lapamo indaa,” Paulus bantile, “yaku ampakon doi Roma koidan.” 22Maka yana mobintokon lua komian doi napotombonii-potombonii, doiyamo Timotius tukon Erastus sulano naampakon doi Makedonia, modaano yana modungol moimoiya kooloyo koidan doi provinsi Asia.
23Uga-ugaate doiya kosinggatoo kona tealian konggalanggabutan mo babasal doi Efesus sabab otunggul manganai doi Yesus. 24Sabab doi kotadoo daano komeeng kotukang perak kosambuno Demetrius, mo mongkubai dewa-dewa nabonua motuuk Dewi Artemis. Do mianoo nausaha lubatene kopandapatan mo babasal doi napolimang-polimangoo. 25Tobikon doiya yana mokombul napolimang-polimang tukon posinggat-singgat polimang-polimang tukang perak bailon, maka nabantile, “Utus-utus! Utus toiyo baikon kita malaat pandapatan doi limang nia. 26Budodoiya Utus lapamo kitayo tukon lengele susuungo oila Paulus nakinubaidoo. Yana bantile baikon dewa-dewa banggapi mo kubaiyo doiya takainomo bolikon dewa. Tukon yana lapamo malaat pandapatan mokubaiyo badaang komian mangangga naikon kona otunggul, bolikon tolongo naimba doi Efesus, bai kasikon posaapon kolipu Asia koidan. 27Kobahano doiyamo baikon naiya ndalimangia naikon malaat sambu molokis. Tukon bolikon tolongo doiya, bai tukon Dewi Artemis nabonua koidan naikon inanggon akiyo kotakoso tukon kona babasalan tinudo-tudongii; bai kai yana dewi mo sinosubai doi sasaibino komian doi Asia tukon posaapon kodunia!”
28Bunomo doiya dopai mianoo molengeledoo yanila noano tealimo moonas, maka yanila wowookon, “Tubo Artemis, dewi Efesus miano!” 29Maka do nggabutanoo tebeaason polong doi posaapon kokota-kota. Doibundu golombolan panggalanggabutoo lakoyo Gayus tukon Aristarkus, doiyamo Makedonia miano mo lainge Paulus doi naampakonan, maka keete yanila doi stadiun kotadoo. 30Paulus yase usok lolainge yanila, bai komian mo anggayomo Yesus indaa pantane yana. 31Moimoiya kopamarenta mobabasal doi provinsi Asiadoo, mo posobat tukon Paulus, mobintokon mian mopailukene doi Paulus sulano yana aki naokitakene kobutongo doi stadiunoo. 32Daano mobuno doiya mian-mian mo pototongi doi stadiunoo lapamo tealimo nggabut. Daano komo nggele-nggeleamon buno naiya, daano komo nggeleamon buno doiya, sabab doi mian badaangoo badaang komo aki natoiyo, oila kosababpo yanila pototongi idoo. 33Kosoobos doi mianoo aanggene Aleksander kona poondosuuk, sabab yanamo komo Yahudi miano dudunggene doi muka. Maka Aleksander mebee paloosan tukon limano sulano namangkabi nabinee todanan nabelayo kobutongo doi mianoo salaano. 34Bai buno doiya yanila kitayo baikon yana Yahudi miano, yanila posinggat mowookon kabu-kabukuan, “Tubo Artemis, dewi Efesus miano!”
35Kona pupusan julu tulis doi kotadoo moola amankanggene do mianoo mobadaang. Yana bantile, “Efesus tumbuno! Samba-samba komian toiyo baikon Efesus kai kokota komo pialayo ko Dewi Artemis nabonua tukon batu moliyous mo otuwong luwedoi timbu. 36Akiyo komeeng komian momoola bantayo do langgedoo. Tobikon doiya potademo tukon inai polakukene komeeng kolangge tukon ndia-ndia. 37Naiya mian nia, komuyu babayo doi sumai bolikon yanila lapamo ndikuke kodewa nabonua kai tobikon yanila lapamo totulaiyo konda dewi. 38Kalu Demetrius tukon dona polimang-polimangoo daano komeeng kona pangaduan moluwedoi meeng-meeng komian, tadikenemo yanila nababayo donapo ulusan doi pangadilan. Kopangadilan tobuka tuuk doiya tukon kopamarenta-pamarenta sidutu daano. 39Bai kalu daano koidan komeeng kolangge mo bailon komo komuyu moyase, doiya sio nainalapa doi lapat umum mo sah. 40Sabab oila komo teali oloyo nia moola silakaiyo kita. Kita moola nda tinudu mongkubai nggabutan, sabab kita akiyo komeeng konda alasan sulano nda obisakene naiya nggabutan nia.” 41Sambuno mobantile sasaibino doiya, do julu tulis kotadoo sumboliiyomo do mianoo mobadaang namule.
Currently Selected:
RASUL-RASUL SALITANO 19: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
