RASUL-RASUL SALITANO 21
21
Paulus ampakon doi Yerusalem
1Kami palamisi tukon katua-katua jemaat Efesusoo, doibundu otinggalemo yanila. Maka kami talabut banggadudul doi togong Kos; tukon modoakon kami polong doi togong Rodos. Luwe idoo kami talabut banggadudul doi Patara balabuanno. 2Doi Patara kami pososuunggene kokapal komo yase doi Fenesia. Maka kami lakit doi kapaloo tukon kami luwemo 3tukon talabut polong kami kitayo kotogong Siprus doi bobonggami taalikon; bai kami talabut banggadudul konoikene ko Siria. Kami ampakon lolo tano doi Tirus, sabab idoo do kapaloo mai lakitan daano mobangobuluson muatan. 4Doi tampatoo kami ampakon lubotiiyo komian mo anggayo Yesus, maka dungol tukon yanila meeng kominggu kona kalumbit. Luwedoi Mian Bisa Na Roh napobontiikon yanila otunggule Paulus sulano naaki naampakon doi Yerusalem. 5Bai salataa kabus kotempono motuuk komai dungolan idoo, kami otinggalemo yanila tukon banggadudulkenemo komai ampakonan. Yanila sasaibino polaing-laing tukon napai boloki maka nalabuk yanila antekene kami polong doi kota tonggulungo. Indaa doi tobun bibilo, kami sasaibino osulang maka sambeang. 6Lapa doiya kami pokanggi lima paumeng tukon paumeng, maka kami lakito doi kapal tukon yanila koidan mulemo doi napoo bonua.
7Kami talabut banggadudul luwedoi Tirus polong doi Ptolemais. Indaa kami ampakon lubotiiyo koutus-utus mo mangangga, sulano mebee kinatauwan doi yanila, tukon dungol meeng kooloyo doi yanila. 8#Kis. R. 6:5, 8:5 Modoakon kami luwemo koidan, maka polong doi Kaisarea. Idoo kami ampakon doi guru injil kosambuno Filipus, maka dungol doi nabonua. Yana daano meeng komian doi pituiladoo mo pinili doi Yerusalem. 9Sangkap kona pau boine lapamo Mian Bisa beena kosanggupan sulano babilitakene kobilita moluwedoi Mian Bisa. 10#Kis. R. 11:28 Sambuno moimoiya kooloyo kami indaa lubat luwedoi Yudea komeeng konabi kosambuno Agabus. 11Yana lubat doi kami maka naalayo Paulus napabaan oako. Tukon do pokoot oakodoo yana keete koaino tukon limano susuungo maka nabantile, “Naiyamo ko Mian Bisa Na Roh nabinantil: Kotumbuno naiya pabaan nia oako naikon kinoot pokakana naiya doi Yerusalem doi Yahudi miano, tukon sinalakanggon doi mian mobolikon Yahudi.”
12Salataa kami ndongoliiyo doiya, kami tukon sasaibino koutus mo dungol doi Kaisarea doo kabiyo tutuuno doi Paulus sulano yana inai naampakon doi Yerusalem. 13Bai yana timbiliyo, “Oila kona totuuk Utus mokokiil buno naiya sampe kubaiyo konoanggu nia teali susa? Yaku lapamo basadia bolikon tolongo sulano kulinako indaa, bai koidan mau kai kumate tobikon Yesus.” 14Paulus aki nayase lengele kami, maka kami tade mopantane yana. “Sodiiyomo baino Temeneno namongiasan komo teali,” komai bantilano.
15Sambuno dungol idoo moimoiya kooloyo, kami tulolosiyomo komai lolonggu, maka kami taus doi Yerusalem. 16Moimoiya koutus luwedoi Kaisarea moampakon koidan polaing-laing tukon kami sulano napo antekene kami doi Manason nabonua, sabab doi nabonua komai mooloan. (Manason daano meeng ko Siprus miano mo malumbito kona tealian Yesus Napololaing.)
Paulus lubotiiyo Yakobus
17Sambuno kami polong doi Yerusalem, utus-utus idoo talimayo kami tukon sanaang kopai noano. 18Modoakon Paulus ampakon polaing-laing kami molubotiiyo Yakobus; sasaibino katua-katua jemaat daano idoo koidan. 19Sambuno lapa bangadat doi yanila, Paulus basalitakene doi yanila sasaibino kolangge mo lapamo Mian Bisa kubaiyo mololoi doi yana doi antara mian mobolikon Yahudi. 20Sambuno lapa molongol Paulus nasalitadoo, yanila sasaibino nggaale ko Mian Bisa. Doibundu yanila bantile doi Paulus, “Utus Paulus! Utus sio mutoiyo baikon daanomo doi libu-libuso ko Yahudi miano mo manganggamo doi Yesus. Yanila sasaibino mian-mian mo turut-turutan taatiyo Musa naaturan. 21Tukon budodoiya yanila ndongoliiyo baikon Utus otunggule sasaibino ko Yahudi miano komo dungol doi antara bangsa bailon, sulano nalapaase Musa naaturan. Utus otunggule yanila naaki napo sunate kona pau-pau kai loloiyo koadat-adat Yahudi. 22Budodoiya ko Yahudi miano mo lapamo manganggadoo tantu naikon lengele baikon Utus modaanomo dimbaa. Jadi, budodoiya bulaandomo? 23#Bang. 6:13-21 Kona monondokan tulutiyomo komai otunggul. Daano kosanggapo komian naimbaa lapamo mongkubai toon doi Temeneno. 24Ah, siokai Utus muampakon mongkubai acara bakiliyousian butong posinggat-singgat tukon yanila, tukon tanggunge yanila naonggos sulano yanila nabuuk moola dinalulu. Tukon nabuno doiya naikon totingonii doi sasaibino komian baikon oila kona pai linongol tentang Utus aki nabisa, sabab Utus susuungo ampakonggene Musa naaturan. 25#Kis. R. 15:29 Bai manganai mian mo bolikon Yahudi mo manganggamo doi Yesus, kami lapamo makapatu surat doi yanila tentang komai kaputusan baikon yanila aki namoola kaane kokinaan mo lapamo sinosubakon doi pilogot, aki namoola kaane kosau, kai kaane koiyayon sailo motokoot mate, tukon aki namoola mongkubai kokubai-kokubai mo lokis.”
26Maka Paulus ampakon tukon do mianoo mosangkap maka mongkubai upacara bakiliyousian butong posinggat-singgat tukon yanila doi namodoakonan kooloyo. Doibundu yanila usok doi Temeneno Na Bonua sulano nabotiikene moiya kooloyo koidan maka nasodo do upacara bakiliyousianoo nalapa tukon sosuba motuuk doi yanila suwe-suwele nasinosubakon.
Paulus linako doi Temeneno Na Bonua
27Salataa dotempodoo mopitu kokinobianoo adukono pupus, daano komoimoiya ko Yahudi miano moluwedoi Asia kitayo Paulus doi Temeneno Na Bonua lalomo. Maka yanila baloobukene doi mianoo madaang, doibundu taaniyo Paulus, 28maka wowookon, “Eh Israel miano, tulung! Naiyamo komiano mo ampakon doi yayaa momongotunggul doi sasaibino komian kootunggul-otunggul mo tantaange ko Israel miano, tantaange Musa naaturan tukon tantaange naiya Temeneno Na Bonua nia. Tukon budodoiya yana tolongo babayo komian mobolikon Yahudi miano sulano nausok doi Temeneno Na Bonua lalomo, tukon kubaiyo manggilit naiya tampatia mo moliyous!” ( 29#Kis. R. 20:4 Yanila bantile buno doiya sabab yanila lapamo kitayo Trofimus Efesus mianodoo doi kota polaing-laing Paulus; tukon yanila aanggene Paulus lapamo babayo yana doi Temeneno Na Bonua lalomo.)
30Posaapon kota teali nggalanggabut, tukon sasaibino komian obu-obuleng pototongi. Yanila lakoyo Paulus tukon tandane yana tinobuatonggon doi Temeneno Na Bonua. Tempodoo doiya koidan Temeneno Na Bonua tataapono tinutupo. 31Daano do bito-bitodoo mokakaate akateyo Paulus, daanomo komian mobantikene doi suludadudoo Roma kapalano baikon posaapon komian doi Yerusalem daano monggalanggabut. 32Tuluus do suludadudoo kapalano mangala bubula koperwira tukon suludadu maka moso-mosobit ampakon tukon yanila doi tampatoo monggalanggabut. Salataa do mianoo badaang kitayo do komandaanoo tukon napasukan, yanila tademo mononoliiyo Paulus. 33Suludadudoo kapalano ampakon doi Paulus maka nalakoyo, tukon sumboliiyo komian mokeete yana. Doibundu do suludadudoo kapalano mansadaikene manganai indee doi Paulusoo tukon oila komo lapamo lakukanggene. 34Kosoobos doi mianoo badaang timbiliyo buno naiya tukon kosoobos koidan timbiliyo buno doiya. Kaadaan buno doiya monggabut tobikon do suludadudoo kapalano aki namoola toiyo oila kona tutuuwan komo lapamo teali. Tobikon sabab doiya yana maparentakenemo mian sulano Paulus nabinaba doi markas. 35Salataa yanila babayo yana polong doi tukal, do bito-bitodoo mbuolo tuuno tobikon Paulus sio sasaibino kosuludadu napotombonikene. 36Yanila tinuudukon doibundu doi golombolan bito-bitodoo komo wowookon, “Akateyo yana!”
Paulus belayo kobutongo
37Sambuno adukon usok doi markas lalomo, Paulus bantile doi suludadudoo kapalano, “Moola kai yaku basilingan naapa doiya tukon Tuan?”
“Oila ikoo moola basilingan Yunani?” suludadudoo kapalano sadaiyo. 38“Kalu buno doiya, ikoo bolikon do Mesiroo miano komo buunia mokubaiyo kopo lobosian maka babayo obulenggene kosanggapo koloon komian monggabut tukon makanggi sinapan usok doi padang lalomo?”
39Paulus timbiliyo, “Yaku Yahudi miano; yaku penduduk doi kota Tarsus, kota mo tololongol doi Kilikia. Tolong izinkanggene yaku mobasilingan doi mianoo.”
40Maka sambuno Paulus binee izin mobasalita, Paulus kokondong doi tukal, maka mebee tanda tukon limano. Sasaibino komian teali tenang. Doibundu Paulus basalita doi yanila tukon silingan Ibrani. Paulus bantile,
Currently Selected:
RASUL-RASUL SALITANO 21: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
