2 KORINTUS 4
4
Buat moluwedoi surgaa doi natangabosan lalomo mo luwedoi buta
1Kami lakukanggene naiya limangia sabab Mian Bisa namonondokan konoano. Doiyamo kosababpo sampe kami aki mai lungguon. 2Kami aki mai mapake cara-cara mokalipookan mo mongkubai maa. Kami aki yase balimang tukon bakakala kabai moputa-putale ko Mian Bisa nabantilan. Kami leleaniyo ko Mian Bisa tukon noanggami mo sanaang mololoi doi namongiasan. Tobikon doiya, kami moinikene doi sasaibino komian nilaiyo kami tukon monondok doi noano lalomo. 3Kalu Bilita Monondokoo komai binabilitakon daano komo akiyoon koidan napinahami, maka tolongo mian badaang mo ompokoniiyo kosusaan tolong komo aki napahamiyo. 4Ilah molokis kuasaiyomo naiya dunia nia tutupemo komian badaang napikiran mo aki namangangga. Yanamo komo hala-halangiyo yanila sulano yanila aki namokita madialan moluwedoi Bilita Monondokoo tentang Kristus nababasalan, mo buno Mian Bisa gambalo. 5Bilita kami mo pelenggene bolikon kai bilita tentang doi kami. Bilitadoo doiya bilita tentang Kristus; baikon Yana daano Temeneno; tukon kami napeleleani sabab Yana. 6#Tea. 1:3 Mian Bisa mo bantile, “Siokai luwedoi kalipookan lalomo maka nasumbut komadialan,” Mian Bisa doiyamo kona sumbutan do madialanoo doi noanggita lalomo, sulano konda pikiran teali madialan sulano nda pahamiyo ko Mian Bisa nalalaangan mo montoontilang doi Kristus duduso.
7Bai do buatoo rohani mo monondokoo kami babayo doi butonggami mo akiyo koanggano nia mo kinubai luwedoi buta. Tukon buno doiya totingoniimo baikon do kuasadoo nababasalan kona tangabosan doi Mian Bisa bolikon doi kami. 8Kami minusu doi sasaibino kolangge, bai kami aki madipot. Kami pusing, bai kami aki mai putus asa. 9Badaang komo musuiyo kami, bai kami aki nabaino dungol susuunggami. Tukon mau kai kami idan-idan mai inumbas polong otuwong, bai kami aki mai mate. 10Sidutu kami lasayo Yesus namatean doi butonggami, sulano kona tuboan koidan teali totingonii doi butonggami. 11Daano kami tubo, kami sidutu motokutikon tukon matean sabab Yesus, sulano kalu buno doiya Yesus natuboan koidan moola inokitakon doi butonggami mo akiyo kotakoso. 12Naiya koalatino baikon doi butonggami lalomo komatean daano mogiat ampakonggene kona kakuasaan, bai kami laba baikon tuboan komo daano mo giat doi butonggami lalomo.
13 #
Sad. 116:10
Doi Kitab Moliyous lalomo talaat naiya bantilan nia, “Yaku mangangga, doiyamo kosababpo sampe yaku basilingan.” Nah, tukon samangat manganggaan mo buno doiya koidan, kami basilingan sabab kami mangangga. 14Kami yakiniyo baikon ko Mian Bisa mo lapamo otuboiyo koidan Temeneno Yesus, Yana otuboiyo kami koidan tukon Yesus, naikon mongotuboi komuyu tukon kami doi salaano. 15Sasaibino doiya daano mukopontingan. Sabab kalu badaango komian motoupiyo ko Mian Bisa namaasi, pololokon badaang koidan kokinatauwan mo pinolonggon doi Mian Bisa; tukon kalu buno doiya ko Mian Bisa inodatii.
Tuboan tukon manganggaan
16Doiyamo kosababpo kami aki naputus asa. Mau kai kami secara tuboan doi dunia pololokon tosuungi kona manasan, bai secara konoanggami kinubai boolu samba-samba kooloyo. 17Tukon susaan mo aki namoindukon nia, kami mo toupiyo soisikeen, naikon yana lubatene doi kami komeeng komondokan mo bolikon langge tukon posidutukon. Do monondokanoo lobian odoon kona babasalan kalu pinotimbongiikon tukon do susaanoo susuungo. 18Sabab kami aki mai palahatikanggene kolangge-langge mo tokita, bai tolongo mo aki natokita. Komo tokita tolongo soisik kona bataanggonan, bai komo aki natokitadoo bataanggon sidutu polong posidutukon.
Currently Selected:
2 KORINTUS 4: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
