2 KORINTUS 5
5
1Sabab kami toiyo kalu bonua – doiyamo butonggita – kita mo dungoliyo doi dunia nia mimanas, ko Mian Bisa naikon masadiakene doi kita meeng kobonua doi surgaa, Mian Bisa mo kubaiyo tukon moonggol sidutu-posidutukon. 2Doi bonua lalomo budodoo nia, kita mondommuk sabab kita peleenggene tuuno modungol doi nda bonuadoo lalomo doi surgaa. 3Bonuadoo doiyamo butonggita mo boolu. 4Kalu daano kita modungol doi bonuadoo lalomo doi dunia nia, kita mondommuk sabab konda tanggungan motoong. Bolikon kai kita yase tongosodii doi butonggita nai dunia nia, bai sabab kita yase mapake butong mo doi surgaadoo, sulano kobutonggita mo moola mate komo tubo kuasaiyo. 5Komo moolakene doiya doi kita tolongo Mian Bisa susuungo, tukon Yana beekene Na Roh doi kita buno meeng kotambo.
6Sabab doiya konoanggami sidutu moonggol. Kami toiyo baikon kalu kami daano modungol doi butonggami nia, kami pododoonggon tukon dobonuadoo naikon kami modungoliyo tukon Temeneno. 7Sabab kami tubo tolongo mangangga doi Kristus, bolikon alaskanggene oila komo moola kinita, 8doiyamo kosababpo konoanggami namoonggol. Kami yase tuuno sulano mai poalaas kobutonggami nia, sulano namoola podungoli tukon Temeneno. 9Tobikon doiya kami kakaate tutuuno sulano nasanaang konoano, mau tempo kami doi mai bonua dimbaa kabai indaa. 10#Rm. 14:10 Sabab bisa kita sasaibino naikon inantokon doi Kristus napangadilan, tukon memeeng komian malaat pabalos mololoi tukon nakokubai doi dunia nia – kokubai momonondok kai kokubai molokis.
Pomonondokonan tukon Mian Bisa lolo doi Kristus
11Kami toiyo oila koalatino komatakutan doi Temeneno; doiyamo kosababpo kami kakaate moekeenggele komian tentang butonggami. Ko Mian Bisa tingoniiyo tutuuno kami, tukon yaku moinikene mau komuyu potingoniiyo kami doi noamuyu lalomo. 12Mau buno naiya kami aki kai mai kabiyo sulano ponggaale kobutonggami. Kami tolongo yase mebee meeng koalasan mo monondok doikoo sulano teali tanggaal doi kami, sulano komuyu potoiyo bulaando komuyu potimbiliyano komian badaang tolongo kitayo komian duduso tukon bolikon nalenggang. 13Kalu kami memang tokita tandomo, doiya takainomo tuuk doi kopontingan Mian Bisa. Tukon kalu kami tokita sehat, doiya tuuk doi mukopontingan. 14Kristus namaasi komo kuasaiyo kami; tukon kami sadaliyo baikon kalu meeng komian lapamo mate tuuk doi sasaibino komian, maka doiya koalatino baikon sasaibino komian lapamo mate. 15Kristus mate tuuk doi sasaibino komian, sulano komian badaang mo tubo, akimo natubo tolongo tuuk doi butongo susuungo, bai tuuk doi Kristus mo lapamo mate tukon inotuboi koidan tuuk doi yanila nakopontingan.
16Tobikon doiya, kami akimo mai nilaiyo komian menurut banggapi napotoi. Bisa kami biasa nilaiyo Kristus doi segi banggapi, bai naiya budodoo akimo. 17Mian mo lapamo pomeenggon tukon Kristus, tealimo banggapi moboolu tutuuno. Komo malumbito akiyono – sasaibino tealimo boolu. 18Sasaibino doiya Mian Bisa komo limange. Lolo doi Kristus ko Mian Bisa kubaiyo kita pomonondokon tukon Yana, maka bintekene kita sulano komian badaang bailon mominoolakon pokokindokon tukon Mian Bisa.
19Kami babotilanggene baikon tukon perantaraan doi Kristus, ko Mian Bisa kubaiyo kobanggapi pokindokon koidan kobutongo. Mian Bisa kubaiyo doiya aki natuntute kobanggapi nakasalaan-kasalaan mo lapamo kubaiyo tuuk doi butongo. Mian Bisa lapamo bintekene kami sulano mai babilitakene bilitadoo.
20Jadi kami naiya Kristus nabito-bito. Lolo doi kami Mian Bisa susuungo komo pelenggene kona teteba. Tukon Kristus sambuno, kami kabiyo tutuuno, potalimayo ko Mian Bisa naululano kolimano mo moolakene komuyu pokindokon tukon Yana. 21Kristus aki nabaladosa, bai ko Mian Bisa tealikene Yana tanggunge konda dosa, sulano kita pokindokon tukon Mian Bisa sabab pomeenggon tukon Kristus.
Currently Selected:
2 KORINTUS 5: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
