2 KORINTUS 3
3
Peleleani-peleleani perjanjian mo boolu
1Oilakai naiya kona tokitaan kai adukon buno kami nggaale kobutonggami koidan? Kabai moola nateali kami palaluu sulat panggaal tuuk komuyu, kabai doi komuyu, buno komo pinalaluu mian badaang bailon? 2Utus kai susuungo komo teali sulat panggaal doi kami, mo totulis doi noanggami lalomo mo moola tiningonii tukon meeng-meeng komian moola basayo. 3#Tob. 24:12; Yer. 31:33; Yeh. 11:19, 36:26 Yanila memeeng komian moola kitayo baikon Utus buno meeng kosulat Kristus mo tulise, mo kinapatu lolo doi kami. Doiya sulatoo tinulis bolikon tukon tinta, bai tukon Mian Bisa Na Roh mo tubo; bolikon koidan doi batutulis bungkukono, bai doi banggapi noano.
4Kami bantile buno doiya, sabab komai manganggaan doi Mian Bisa lolo doi Kristus. 5Kami akiyo komeeng komai alasan sulano mai okitakene baikon kami moola lakukanggene naiya limangia, bai Mian Bisa komo beena bukuanan doi kami. 6#Yer. 31:31 Yanamo komo tealikene kami moola teali peleleani motuuk doi meeng koperjanjian mo boolu; perjanjian mo luwedoi Mian Bisa Na Roh, bolikon doi ukum mo totulis. Sabab domo tinulisoo babayo komatean, bai Mian Bisadoo Na Roh mebee tuboan.
7 #
Tob. 34:29
Doi tempo perjanjianoo mo babayo komatean doiya kinubai tukon ukil-ukile doi batu, ko Mian Bisa laango montoontilang kopanano doi Musa duduso. Kolaango mobuno doiya kona montoontilangan tobikon kobangsa Israel aki namoola mbalenge Musa duduso, mau kai dolaangodoo adukon akiyo doiya kosinggatoo. Nah, kalu kokubaiyano doperjanjianoo mo babayo komateanoo sinahkanggon tukon nalalangan mo buno doiya kona babasalan, 8tantu kona kinubaiyan koperjanjian mo bineekon doi Mian Bisa Na Roh, sinahkanggon tukon lobian koidan kona lalaanganan. 9Kalu doperjanjianoo mo ukume kobanggapi bunomo doiya kona lalaanganan, tantu lobian kona lalaanganan koidan doi perjanjianoo mo moolakene kobanggapi pokindokon tukon Mian Bisa. 10Moola nabinantil baikon oila komo lalaangan doi lolukonoo, akimo nalalaangan koidan sabab kona lalaanganan budodoo nia. 11Kalu meeng kolobo tolongo soisikeen kona taanan, bunomo lakon kolaango, tantu meeng kolobo mo bisa lobian kona lalaanganan koidan.
12Tobikon kai kami daano komai moinian mobuno doiya, maka kami barani bantile buno doiya. 13#Tob. 34:33 Kami aki mai buno Musa mo songgupiyo koduduso tukon kokudung sulano kobangsa Israel aki namoola momokita ko Temeneno laango moadukon poso tukon lapus doi duduso. Yanila napikilan totutupo. 14Tukon polong doi oloyo nia kona pai pikiran daano mototutup tukon kokudung doi tempo yanila nabasaano kobuku-buku kaliangano doi perjanjianoo mo malumbitoo. Kokudungoo tolongo moola toliat kalu komian pomeenggon tukon Kristus. 15Budodoiya nia, kalu yanila basayo Musa nabuku-buku, kokudungoo daano mosunggupiyo yanila napikiran. 16Bai kalu memeeng komian lubat mangadap doi Temeneno, kokudungoo liniato doi mianoo duduso. 17Nah, Temenenodoo mo minakisuuti naimbaa doiyamo Roh. Tukon inaando ko Roh Temeneno nadaanoan, idoomo koidan kona daanoan kobebasan. 18Budodoiya kodudusonggita sasaibino akimo natinonggupi kokudung, tukon kita okitakene ko Temeneno nalalaanganan. Tukon tobikon doiya kita banggadudul binolii teali pokakana Yana; pololokon malumbit kita teali pololokon lalaanganan. Kolalaanganoo luwedoi Roh, tukon Rohdoo doiyamo Temeneno.
Currently Selected:
2 KORINTUS 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
