BAPOROMTAM ATAKAM 9
9
1Emesare, malaikat kelima afwi ajame. Derarawa, era tapirmi akondae bais taka aporo. Allah, kunci era bais atetame. Era kunci kakotenak jipa jimsap bapaim kunci. 2Era bais era jipa jimsap apaime. Era jimsap apaimerawa, jisamun apuejise. Era jisamun, ere daytinak joo jisamun tamen are. Era jipa apuejise jisamunam, era wonamo oup jiiti atamtopome. Ere era jee akapimompe. 3Kaisini tananeam era jisamun aemtepe asan apipiendaes. Allah asesa, era kaisini takes atetamtetere. Era asesa, ara tapirmi ande asesa awar. 4Allah ere, atakam era kaisini tanane akorome. “Tare era tapirmi takapin bajurusum bas. Erea pak akeneam, era wusam, bajurusum bas. Dere ere, wan asamot owe abipis bi baokomapom apok aemo. Emesare, tare era owe taka ajurusumay.” Emes atakam aesime. 5Armat Ipitam, era kaisini tanane, era owe bambi bajurusum, pir ban taka, atetame. Me, are era owe batatii apoken. Era owe ajirisemtas pak, era ande, asamot owe sisi ajatemar asesa emes tamen are. 6Me pir ban taka, owe dambir baem jati daytu atitirimemas. Me, are dambir baemeem asan apok. Are dambir baem jak aseseromemas. Me, are dambir apoknak.
7Era kaisini tanane, ere jii bajamom aememes kuda tamen are. Era kaisini tanane akuus taka taka, pak aemapteteres. Era pak, ere akotnak emas tamen are. Era kaisini tanane abiam, asamot owe bi tamen are. 8Afiniam, ere tapes fini tamen are. Asisiam, singa sisi tamen are. 9Are pak ajamam taka taka ajiimomemteteres. Era pak, ere baju besi tamen are. Era kaisini jaro takes, ajumtetere. Me ajumtetere pak, kereta tanane ajumemas tamen are— era kuda era jii bajamom asanpu faaronak ajimtaeremas kereta ajumemas tamen are. 10Era kaisini tanane epemak, ere taot ande apemak sisi awar. Erarawa are owe sisi ajatetem. Are aepemak bomon, owe bajurusum fiak pak, aemomemteteres. Are era fiak pak pir ban taka aemomemteteres. 11Era kaisini tanane abaomep ipit, ere kakotenak jipa banamek ataimar malaikat are. Ibrani atakam ere, ajuas “Abadan” are. Yunani atakam ere, ajuas “Apolion”. Era juas daatakam “Danais Baemapom Ipit”.
12Me bonak asan potanak pak ajiire. Wan asan potanak pak amnuk arawa, aondaetemanis.
13Erarawa, malaikat keenam afwi ajame. Derarawa, atakam jane ajio. Era atakam, Allah pak jis bajaatam joo funiti eak taka apok, akorejisime. Era joo, ere emas joo. Era jooam Allah bipua. 14Era atakam, era fwi aptam malaikat keenam, akorome, “Allah, malaikat eak taka apok, era ju daytu juas Efrat, banam ajikapome. Emesare, wore era malaikat asusurumey.” Emes atakam aesime. 15Bonak ere, Allah, malaikat eak taka apok, asamot owe sepertiga batajimirtii, atakam etejasosotiie. Are malaikat era owe batajimirtii jamam, baream, piram, tahunam, atakam etejasosotiie. Erarawa malaikat keenam, wan malaikat eak taka apok, era owe batajimirtii, asusurumtame. 16Kuda beak ten ajares tentara oweam, 200 juta. Denom emes atakam jane ajio.
17Era pak bambi aporo ere, dere era kudaam, era kuda beak ten aemjares oweam, emes bi aporo: Era kuda beak ten ajares owe, baju besi, ere jamam taka taka ajiimomemteteres. Era baju besi, ere jisimak esakam tamen are. Ere esakam anama jirmwi are. Era kuda kuus takes arawa, singa kuus awar. Jisimak jeeam, jisamunam, ambapnak jirmwi pakam, era kuda taka taka okone ajisteteres. 18Era kuda okone ajisteteres jisimak jeeam, jisamunam, ambapnak jirmwi pakam, ere asamot owe asan potanak baemapom pak bamintep are. Asamot owe sepertigaam, era asan potanak baemapom pak bamintep bomon, ere dambir ates. 19Era kuda tanane, asamot owe batajimirtii fiak pak, aokone are. Era fiak pak, aepemakam are. Era kuda epemak takes, ere amber tamen are. Era kuda epemak taka taka, amber kuus aptam tamen are. Ararawa, aepemak, owe ajurusumes.
20Emesare, era asan potanak baemapom pak bomon dambir apok owe, aban akenemapomes pak basitim, bamakem apok. Are era biiam, era etoam asitimaaris. Era eto, ere emasam, perakam, tembagaam, ekaam, wusam, emes pak are. Me, era eto, baemepor asan apok. Are atakam jane baemejie asan apok. Are baemejar asan apok. 21Era owe ere, owe ajaies pakam, era bii aptam owe atakam ji aea ajaiesam, era tani tamane bajamdamat aema ajaies pakam, era pak wosom aea ajaies pakam, bamakem apoknak aemes.
Currently Selected:
BAPOROMTAM ATAKAM 9: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
