BAPOROMTAM ATAKAM 8
8
Bakamimapom pak ketujuh atakam
1Emesare, Domba Jii era buku bakamimapom pak ketujuh akoromtaere. Akoromtaere ere, Surga oup, setengah jam apaye binokonak aemanse. 2Denom Allah bipu aemememas malaikat owe poman ban jamnuk bi aporo. Allaham fwi poman ban jamnuk era malaikat owe atetame.
3Wan malaikat takarawa, Allah pak jis bajaatam joopu ambarome. Are emas to pak atoome. Era to pak, pinim akot pak bataapom asan are. Emesare, era malaikat, pinim akot pak daytu ataere. Era pak, Allah pak jis bajaatam joo jis bajaatam pak are. Era pak jis bajaatam asan, ere emas. Ere owe baomep fe baemap asanpu are. Emesare, era turunak owe takes atakam Allah ajanima ajaies, malaikatam era pak Allah jis ajaatama ajaies. 4Emesare, era pinim akot pak jisamun, era malaikat ban ten apuetemete. Era jisamunam, era turunak owe Allah bajanim atakam, Allah bipu takan apumtemetemes. 5Era malaikat arawa, era pinim akot to pak ataere. Are Allah pak jis bajaatam joo jisimak ataere. Wanam are jisimak era tapirmi akoromdaeme. Wurkoram ajarare. Kuurkoram ajume. Bwerkoram asarampime. Ajiekoram aesime.
Fwi poman ban jamnuk atakam
6Wanam, era fwi poman ban jamnuk atoomes malaikat owe poman ban jamnuk aememes. Are era fwi bajam awotemes.
7Emesare, bonak malaikat afwi ajame. Fwi ajamerawa, are jufu es eka tananenakam, jisimakam, damo esee aptam aartamtaae. Ararawa, era pak era tapirmi ajuumsamdaeme. Emesare, era tapirmi sepertiga ambomtiie. Wus sepertigaam ambomtiie. Era takapin takesam ambomtiikorome.
8Wanam, malaikat kedua afwi ajame. Are daytinak pak taka, fami jis jee tamen, era itimbup bwi akoromdaeme. Wanam bwi sepertiga esee ajaorese. 9Era bwi bomon jatiaptam pak sepertiga dambir aemes. Era kapal takes sepertigaam danais aemesteteres.
10Wanam, malaikat ketiga afwi ajame. Bais taka daytinak arawa, era wonamo oup aekondae. Era bais, sese tamen aapetatare. Emesare, bais era ju takes sepertiga andaefostetere. Era baisam bwi era tapirmi amba atetefejisemar asan takes sepertiga andaefostetere. 11Era bais juas “Asesa Wus”. Era bwi sepertiga takes asesa bwi ajaorese. Era bwi, ere asesanak. Erarawa era bwi andes owe tananenak dambir aemes. 12Wanam malaikat keempat afwi ajame. Allah era jee poman sepertiga jiiti atamtiie. Are era pir poman sepertigaam, era baet sepetigaam, era bais sepertigaam, jiiti atamtiie. Erarawa era bare, jok ju jirao apoknak aeme. Eamam era sare pak jirao apoknak aeme.
13Emesare, denom banamek apeomo. Dere warao taka wonamo oupnak apietemete aporo. Dere era warao afaketaae atakam jane ajio. Era atakamam, “Wan malaikat bamintep fwi ajamtemas. Erarawa era tapirmi owe, asan potanak pak bamintep aemaptemas.” Emes atakam aesime.
Currently Selected:
BAPOROMTAM ATAKAM 8: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
