BAPOROMTAM ATAKAM 10
10
Malaikat taka ajaokoamse surat kope atoome atakam
1Emesare, dere wan fiaknak malaikat taka, era Surga oup aendae aporo. Are wonamo fasar, pakaian tamen, ajiimome. Bakaoam akuus afojimtopome. Abiam jee apone tamen aturumdae. Akamtanam jisimak jee tamen. 2Are aban, ajaokoamse surat kope atoome. Era suratam emepapaimome. Armat Ipit era bo bai era itimbup andaesoeme, wanam era tamo bai ara tapirmi andaesoeme. 3Are atakam daytinak afaketaere— era singa afaketaeremas atakam tamen are. Atakam afaketaererawa, era wur poman ban jamnukam takan ajumes. Era ajumes pak atakamam are. 4Me wur poman ban jamnuk atakam akores arawa, dere era atakam surat baeapom aememo. Dere ere, Surga oup atakam jane ajio. “Era wur poman ban jamnuk akoremas atakam, atukumompey. Era atakam, surat baeapom bas.” Emes atakam aesime.
5Emesare, era itimbupam, tapirmiam, andaesoeme aporo malaikat, abo ban oup ajiraomtemeteme. 6Me malaikat, Allah era jiine baememaar Ipit ere, emes apore. Are Allah, wonamo oupam, ara tapirmiam, itimbup bwiam, era pak takesam, emes akenemapome Ipit apore. Erarawa are, Allah juas ajie, wanam ataaji fiaknak aee. “Allah, era aemto pak bokamisim apok. 7Me, era malaikat ketujuh afwi ajamto, Allah era bomonnak atakam asakamtiie pak aemkoromtem. Bonak ere, Are asakamtiie atakam, abambi karai baetam owe akorome. Era owe, Allah atakam bakoretam owe are.” Era malaikat emes atakam aesime.
8Emesare, bonak jane ajio Surga oup atakam, jane aojio. “Wonom era malaikatpu aesosey— era itimbup bwi tenam, tapirmiam, asondaemmar malaikata. Worarawa, era ban atoommar ajaokoamse surat kope ataerey. Era suratam emewawaramome.” Emes atakam aesime. 9Emesare, dere malaikatpu ambaremo, wanam, atakam akoromo. “Ara ajaokoamse surat kope dera tetaman.” Emes atakam aesimo. Armat Ipit ere, atakam dera akoromen. “Ara surat bataerey, wanam bandey. Ara surat arawa, wojak bomon asesa aemtem. Me, wookone bomon, ara surat embore bwi femase tamen aemtem.” Emes atakam aesime. 10Derarawa, malaikat era ban atoome surat ataero. Denom era surat ando. Era surat deokone bomon embore bwi femase tamen aeme. Me, ando ere, era surat dejak bomon asesa aeme. 11Armat ipit arawa, “Allah, owe samane tanane, atakam akorem. Are tapirmi tanane oweam, taka taka atakam owe tananeam, raja owe tananeam, atakam akoremara. Emesare, wore era akoremar atakam kaaowe akoretamey.” Emes atakam aesime.
Currently Selected:
BAPOROMTAM ATAKAM 10: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
