BAPOROMTAM ATAKAM 11
11
Ateman batam Ipit amnuk atakam
1Emesare, Tuhan fira atetamen. Era fira, meter awar. Are atakam akoromen. “Wore Allah Tame aesosey. Era Tameam, era pak Allah jis bajaatam jooam tamat atamey. Era asan Allah basitim oweam ajititimarey. 2Me, era tamsan tamat batam bas. Allah, era tamsan, Allah amsam apok owe atetame. Era owe, akotnak kota, pir 42 ajirisemtemas. Erarawa wore era tamsan tamat batam bas. 3Denom fiak pak deateman batam ipit amnuk atetamtemin. Era ipit amnuk jak pota aememtamis, wanam kuusnak ajakuemtemamis. Ararawa, bare 1.260 deatakam akoretamtemamis.” Emes atakam aesime.
4Era ipit amnuk Tuhan bipu aememmamis saitun wus amnuk are. Are Tuhan bipu aememmamis lampu asan amnuk are. Ere, tapirmi Armat Ipit, Tuhan are. 5Owe era ipit amnuk bajurusum aememtas, jisimak era ipit amnuk aokone ajistem. Era jisimak ajokoman owe ambomosomkoromtem. Emesare, era ipita amnuk bajurusum aememtas owe, era jisimak dambir aemtemas. 6Era jipit amnukam, wonamo oup te bandae-ombar fiak pak aemommamis. Te, era ipit amnuk Allah atakam akoretamis bare 1.260, bandae-ombar. Anom bwi, esee bajaoromesem fiak pak aemommamis. Are, ara tapirmi owe, atairiin atairiin takes baem fiak pak aemommamis. Erarawa, are akot aportamis ere, are owe atair baem are.
7Me, are era ateman atamkoromtamis, era kakotenak jipa akunaoto binatang, jii era ipit amnuk ajamomtem. Are era ipit amnuk akumimosomtem. Wanam atatiitem. 8Era dambir ipit amnuk arawa, daytu kota era daytu bokotpu aemamestemamis. Bonaknak ere, owe, era ipit amnuk aTuhan, era kota taka, salib wus oup atatopomes are. Atakam bataetii ere, era kota juas Sodom. Wan juasam Mesir. 9Era owe saman takes wan oweam, taka taka atakam takes wan oweam, era tapirmiin tapirmiin takes wan oweam, banamek era dambir ipit amnuk asiromemtemas. Are bare 3 setengah banamek era dambir ipit amnuk asiromemtemas. Are owe era dambir ipit amnuk se bawuapom atii atetemas. 10Bonaknak ere, Allah atakam bakoretam ipit amnuk ara aemansa tapirmi owe ajurusumemis. Erarawa ara aemansa tapirmi baemap owe, era ipit amnuk dambir aportas, are jak akotnak aemaptemas. Are sia aketemas. Pakam wan tapirmi taejirimtama era tapirmi oweam pak jow auumjinaoma ajitemas. Are Allah atakam bakoretam ipit amnuk, ara tapirmi owe takes tanane ajurusumemis aportemas. 11Emesare, era ipit amnuk, bare 3 setengah dambir aemtemamis. Allahrawa, jeses era dambir ipit amnuk aotetamtem. Era ipit amnuk arawa, bai aowasiemtemamis. Owe era ipit amnuk aportas, are ombare daytinak ambartemas. 12Surga oup atakamam afakendaemtem. “De! Ara asan akunaoami.” Emes atakam aesimtem. Era ipit amnukam emes atakam jane ajitemamis. Ararawa, wonamo fasar bomon Surga oup atemettemamis. Era jokoman oweam era ipit amnuk banamek asiromemtemas. 13Era bare takaam, ajie daytinak asimtem. Era kota sepersepuluh danais aemamestem. Owe 7.000am dambir era ajie damon atemtemas. Era dambir apok owerawa, ombare daytinak ambartemas. Are, tere Surga oup Fiaknak Allah aeomtemas.
14Era asan potanak pak kedua eteesose. Era asan potanak pak ketiga arawa, ameteemamestem.
Ketujuh fwi atakam
15Emesare, malaikat ketujuh afwi ajame. Surga oup owerawa, atakam daytinak afaketaaes. “Me daTuhanam, Aeremtaere Ipitam, ara aemansa tapirmi takes baomepkorom fiak pak atoomemis. Are ara tapirmi aomepkoromaartemamis.” Emes atakam aesimes. 16Emesare, era duturu owe 24, ara owe baomep fe baemap asan Allah bipu aemapemas owe ere, bi fop andaejiapteteres, wanam Allah asitimteteres. 17Are atakam akoromes:
“Tuhan Allah fiaknak! Waa aomatima! Bonaknakam aememaarim. Wore wofiak pak daytinak atoomparem, wanam ara aemansa tapirmi aomepkorommarem.
Erarawa dare terima kasih atakam Wora akorommarom.
18Era tapirmiin tapirmiin owe, jak ambap aememes. Me, Wonom jak ambap aememem. Era dambir aemes owe bajurusum atakam basakamtii baream, ere emeemansar.
Me wobambi karai baetam oweam, woatakam bakoretam oweam, wooweam, Wora basitim juas aptam oweam, juas apok oweam, era aemes pak jipu asan akot batetam bare emeemansar. Wan owe ara aemansa tapirmi danais aemapomes. Erarawa era owe, adanais baemames baream emeemansar.”
Emes atakam aesimes.
19Allah, ara Surga tame jimsap apaime. Owerawa, Allah asamot owe Ataaji Atakam Aptam Peti, era tame bomon apores. Bweram asasarame. Wuram jiriri ajie. Wuram ataejarare. Ajieam asime. Te daytinakam, jufu es eka tananenakam, takan andaes.
Currently Selected:
BAPOROMTAM ATAKAM 11: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
