IBRANI 9
9
Allah era tarai ataaji aee atakam anama ai ataaji aee atakam
1Era bonak ataaji, Allah Ara basitim aeremtiitame pak atakam are. Anom Allah basitim tame atakam are. Era tame ere, ara aemansa tapirmi pak. 2Owe, pitini samayen tame aeapomesen. Era bonak kamar juas “Allah Turu Kamar” eraren. Era kamar bomon, pelita asanam, mejaam, Allah bipu bataetii amosam, aemapesen. 3Era Tame bomon, wan kamar aemapen. Era kamar, pitini jimsap asep aemapen. Era kamar juas “Allah Turunak Kamar”. 4Era kamar bomon, emes jooam, era Ataaji Atakam Aptam petiam, aemapesen. Era joo, pinim akot pak, Allah bajaatam asanen. Era peti pitiniam emasen. Era peti bomon arawa, emas to pakam, Harun waku pakam, era pwe jamnukam, aemansesen. Era emas to pak, banda pak juas manna aptamen. Bonak ere, era waku pak, akene ajiten. Era eka jamnuk arawa, Allah basakamtam atakam wao aptamen. 5Era peti oup, malaikat owe eto jamnuk, aemtepemisen. Era Allah akotipitnak eto, banamek atandaememisen. Era eto jaroam, era dosa bimak binip bajanimemtam asan, apapaimtepemisen. Dare ere, waa era atakam baemekorekorom asan apok.
6Owe, era bonak pitini samayen tame emes taka akenemesen. Me Allah Tame pak baem oweam, juiin afaafemar, era bonak kamar, pak Allah baemtam, ajiia ajiiemas. 7Allah Tame pak baem ipit daytu ere, tahuniin tahuniin, bare taka, era bomon kamar ajiia ajieme. Are esee atoomjiia ajieme. Wanam, era esee Allah atetama ajieme. Ere adosa bimak binip bajanimemtam esee. Anom bambi owe era amsam apok aemteteres dosa bimak binip bajanimemtam esee. 8Dare emes takes apormarom, wanam Allah Jip emes atakam baso akoretammaro: Era bonak jimsap pitini samayen tame emes aemansaaarir ere, bambi owe Allah Turunak Kamar baemejii asan apok. 9Emesare, era bonaknak aemaaris pak, waa, dara aporomtammaro. Era atakam: Allah basitim owe, pak Allah atetamaaris. Are pak Allah ataetiitamaaris. Me, era pak baem, era owe, turunak owe baemeemapom asan apok. 10Era pak baem ere, banda pakam, bwiam, pak, bwi baeosom pak kupisam, atakam are. Era pak baem, ere bambi basakamtam atakam taka. Allahrawa, era ai ataaji atakam atetame ere, are era tarai ataaji atakam akarimtiie.
11Me, Kristus etendae. Are Allah Tame Pak Baem Ipit Daytinak. Are era andaeto akot pak, atakam akorem. Anom pitini samayen tame bomon, pak aemum. Era tame, ere daytukor. Anom akotnak. Asamot oweam era tame baeapom apok. Era tameam ara aemansa tapirmi pak apok. Era bonak tame ere, kope. Anom pota. 12Kristus ere, era Allah Turunak Kamar, bare takakope ajiie. Ajiie ere, Armat Ipit kambing esee apaye, sapi esee apaye, batoomjii apok. Are aesee taka atoomjiie. Are dadosa takes asurumtamteterero. Era esee dare jiinenak baememaar esee. 13Owe karao pak aemtas, Allah Tame pak baem owe, kambing esee apaye, sapi jipit esee apaye, jis ajaaes ai sapi jimit apaye, emes pak era owe damo ten atuturumapomtas, are era owe era karao pak taka aeosomtamemas. 14Era pak ere, koser. Me Kristus esee ere, daytinak pak aemmaro. Allah Jip, ere jiine baememaar. Are Kristus takan aemomen. Erarawa Kristus, adamo Allah ataetiitamen. Era ataetiitame pak, anakotnak pak. Emesare, era akot aemporaarum pak, dambir aptam pak taka. Kristus esee ere, dambir pak asurumtammaro. Aeseeam, dajak bomon pota pak atakam, akokomosomtammaro. Erarawa dare, Jiine Allah, bambi karai baetam are.
15Emesare, Kristus emes aemen. Era Armat Ipit era ai ataaji atakam bajomattam Ipit baemem are. Erarawa Allah ajate owe, asan akot aememaartemas. Ere Allah akore atakam jipu. Owe era bonak ataaji bomon aemapaaris ere, are dosa aemaaris. Me, jipit taka dambir ateme. Era dambir ateme pak, dosa basurumtam are. Ere era owe, asan akot baemapaar are.
16Asamot oweam dambir aemtas pak, ataaji aeeemas. “Dere dambir aemtey, depak emes owe sai asaietamteterey.” Emes atakam aesimemas. Me, era sai basaietam owe, era owe dambir apok aportas, are era pak sai baemesaietam asan apok. Era owe dambirnak aportas, are aapak sai asaietememas. 17Emesare, era ataaji baee owe dambir aemtas, wan owe era ataaji ji atawejomemas. Me, era ataaji baee owe jatiaptam aememtas, wan owe era ataaji ji baemetawejom asan apok. 18Emesare, Allah era bonak ataaji aee ere, Are esee batutumtii atakam asakamtamen. 19Me Musarawa, Allah basakamtam atakam takes, atakam, era owe takes aesimtamkorome ere, are sapi jii eseeam, kambing jipit eseeam, ataeren. Wanam are bwi esee ambetemesemen. Ararawa, fira emes tamen pak juas “hisop” ataeren. Are domba fini esakam era hisop aip akikimapomen. Wanam are era esee era Basakamtam Atakam aptam Bukuam, era owe takes adamoam, atuturumapomen. 20Armat Ipit arawa, “Ara esee are Allah ataaji aemar atakam, anakot pak baemapom are. Allah, tare era atakam ji bae, atakam tara asakamtaman.” Emes atakam aesimen. 21Armat ipit arawa, esee, era pitini samayen tameam, era tame bomon Allah basitim pak takesam, emes tamen atuturumapomen. 22Musa Basakamtam Atakam bomon Allah Tame pak baem owe, esee tananenak atuturumapomemas. Era esee akot baemapom pak. Allaham esee apok aporto, are dosa bimak binip baemejanimemtam asan apok.
Kristus adamo Allah ataetiitame, dosa bimak binip bajanimemtam atakam
23Era pak ere, Surga oup anakot pak emes tamen are. Oweam, ara aemansa tapirmi pak, akot baemapom akot aportas, are esee emes taka atuturumapomemas. Era binatang esee ere, pota taka. Era binatang esee Surga oup pak, akot baemeemapom asan akot. Akotnak pak, Allah bataetiitam ere, era Surga oup pak, akot baemapom pak are. 24Emesare, Kristus, asamot owe akenemapomes Allah Turunak Kamar, bajii apok aeme. Era asan, ere era Surga oup Allah Turunak Kamar anakot emes tamen are. Armat Ipit ere, Surga oup asan ajiie. Waa ere, Armat Ipit Allah bipu aemapem. Are atakam Allah ajanimtamemaro. 25Me Allah Tame pak baem ipit daytu, tahuniin tahuniin Allah Turunak Kamar ajiia ajieme. Are adamo esee batoomjii apok. Are wan pak esee atoomjiia ajieme. Kristus ere, adamo, Allah ataetiitame ere, Are era asan ojiia ojiia bajie apok. 26Armat Ipit emes aemtey ere, Are pakiin pakiin akenemapome baream, waa ajiiream, ojirisema ojirisema jie apeno. Armat Ipit ere, aemapmarom asepnak bare, Are takanak ajiseme. Are dosa bakokomosom dambir amba ateme. 27Emesare, owe takes, dambir takanak atemtemas. Dambir atemtas arawa, Allah, era owe adosa, atakam asakamtiitem. 28Kristusam emes taka aeme. Armat Ipit adamo Allah ataetiitame. Are owe tanane adosa bandatetaer, dambir bare takanak ateme. Are aojisemtem. Me, Are dosa bakokomosom bojisem apok. Are abanamek apemes owe bajortaer aojisemtem.
Currently Selected:
IBRANI 9: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
