IBRANI 10
10
1Me Musa Basakamtam Atakam Buku ere, anakotnak pak apok. Me, ere era ajinaoto akot pak emes tamenkope. Tahuniin tahuniin, owe, era pak taka, Allah ataetiitama ajiemas. Era pak baem ere, Allahpu bamerem owe, owe turunak baemeemapom asan apok. 2Era pak baem, Allah basitim owe adosa akokomosoma ajie ere, era owe adosa bimak binip bajanimomem apok aema ajies. Are era pak Allah botaetiitam apok aema ajies. 3Me, Allah bataetiitam pak, era owe adosa, tahuniin bimak binip bojanimomem pak are. 4Emesare, oorey sapi esee apaye, oorey kambing esee apaye, dosa baemekokomosom asan apok.
5Emesare, Kristus ara tapirmi bandae aememe ere, Armat Ipit atakam Allah akoromen:
“Wore owe pak Wora bataetiitam apaye, pak Wora batetam apaye, emes pota ajiem. Me Wore asamot damo Dera akenemapomtamenim.
6Wonom owe pak jis Wora bajaatamkorom apaye, dosa bakokomosomtam pak Wora batetam apaye, jak baseseromem apok aemem.
7Derarawa, atakam Wora akoromo: ‘Allah! Dere aomaia. Dere era jak aseseromemarem pak jipu baem aememmin. Era Alkitabam Dere emes atakam akoromman.’ Emes atakam aesimo.”
Kristus emes atakam aesimen. 8Emesare, Armat Ipit era bonak akore atakamam: “Wore, owe, pakiin Wora bataetiitam apaye, pakiin Wora batetam apaye, pakiin jis Wora bajaatamkorom apaye, dosa bimak binip bajanimemtam pakiin Wora batetam apaye, emes pak pota ajiem. Wonom emes jak baseseromem apok aemem.” Emes atakam aesimen. Emes pak baem ere, era basakamtam atakam jipu. 9Me Armat Ipitam wan atakam akoren. “Dere aomaia. Dere era jak aseseromemarem pak jipu baem aememmin.” Emes atakam aesimen. Emesare, Armat Ipit era tarai pak tai akarimtiie, wanam ai pak tai ataetiitamen. 10Me Yesus Kristus, Allah akot apormar pak jipu aemen. Are adamo, bare takanak Allah ataetiitamen. Ere boem pak apok. Emesare, Allah, dadosa akokomosomtamero.
11Me Yahudi Allah Tame pak baem owe takes, juiin afaafeajie aemema ajaies. Are pak baem aemema aemema ajaies. Are era pak taka Allah atetama ajaies. Era pak baem ere, dosa bakokomosom pak apoknak. 12Kristus ere, dosa bimak binip bajanimemtam pak takakor Allah ataetiitame. Ere boem apok. Emesare, Armat Ipit era pak aeme ere, Are Allah bo poman andaepakiapen. 13Waaam, Armat Ipit era asan aemapa. Are Allah ajii owe akumisomkoromto bare banamek apema. 14Armat Ipit, pak takakor Allah atetame. Era pak aeme, Are dosa akokoroses owe, owe turunak aemapome. Era oweam owe turunak aememaaremas.
15Me Allah Jipam ateman atammaro. Allah Jip bonak atakamam:
16“Tuhanam: ‘Era pak asakapiamesto, Dere emes ataaji era owe aeetamtemin:
Dere debasakamtam atakam era owe jak bomon ataapomtemin. Denom, era basakamtam atakam bimak binip, era owe atetamtemin.
17Dere, era owe adosaam, debasakamtam atakam aooes pakam, bimak binip bajanimomem apok aemtemin.’ Tuhan emes atakam aesime.”
Allah Jip emes atakam aesima. 18Emesare, Tuhan, owe adosa, bimak binip ajanimemtame. Erarawa, owe dosa bakokomosomtam pak, Allah botaitiitam apok.
Dare Allah setep bamarem atakam
19Dejoo owe akotnak! Yesus aesee ajirimdaemtame. Erarawa dare Allah Turunak Kamar bajii wosao jak aememmarom. 20Armat Ipit, ai bokot, Allahpu bajar, akenemapomtamero. Era bokot, ere jiinenak bokot. Era bokot Allah tame jimsap kain atarame aofeme. Era jimsap kain, Yesus adamo emes tamen are. 21Danom Allah Tame pak baem ipit daytinak aometa. Era ipit, Allah Tame, armat aememem. 22Emesare, danom Allah eemnak ambesemkoromom. Danom pir bae apok jak atoomom. Bonak ere, dajak bomon atakam taka, dare pota pak daytu aemom, emes aokoretetereroes. Allah ere, era pota pak takes akokomosomtamero. Oweam atet apok bwi akupimtaereroes. Emesare, Allah setepnak aememamo. 23Allah ataaji aeetamero. Armat Ipitam pote apok. Danom, “Dare Armat Ipit jiirey aeemarom,” emes atakam aesimmarom. Emesare, danom jiirey fiak aeeaaramo. 24Danom darmamon bimak binip atetaramamo. Dare, owe, owe bafaimam, owe akot pak baemam, darmamon ataane ajamoweamamo. 25Dare Allah basitim takan bajarisiap, bakari bas. Wan owe ere, emes baem emekaries. Emesare, dare Yesus aofasito bare setep apormarom. Erarawa dare jak fiak darmamon ajamemapomamo.
26Emesare, dare atakamnak jane ajiekoromom apaye, wanam dare dosa baememaar akot aportam apaye, dadosa bakokomosom pak ere apok. 27Dararawa, era ajinaoto pak ombare daytinak aemtemarom. Era ajinaoto pak, ere Allah, owe adosa asakamtiito atakam are. Anom Allah, aatakam baoo owe jisimak bomon ambomtiito pak are. 28Owe Musa aeapome Basakamtam Atakam aootas, wanam wan owe jamnuk apaye, bamintep apaye, era baoo pak ateman atamtas, era owe era baoo owe atatiiemas. Are era owe soro baem apok aememas. 29Emesare, Allah Andep bai aojipipirjarmas owe, wama tamenem? Are Yesus esee, bambi esee emes tamen aemmas. Era esee ere, Allah ataaji, anakot baemapom pak. Era eseeam era owe adosa akokomosome. Emesare, era oweam, asan akot ara aememar Allah Jip, bifane afeomememas. Emesare, emes owe, bajirisem daytinak aemtemas. Musa Basakamtam Atakam baoo owe ere, kope emes ajirisemtemas. 30Emesare, jipit taka atakamam, “Dere biti ajitemin. Dere bitiptam ajitemin.” Wanam, “Tuhan, aowe dosa, atakam asakamtiitem.” Emes atakam aesimen. Emesare, dare era atakam akore ipit damsam. 31Era Jiine Allah, owe bajurusum aememto, era owe ombare daytinak aememtemas. 32Me bonak aemaarukum pak bimak binip atetaramay. Tare, Allah Akot Atakam, atakamnak aporekem. Tararawa, bajirisem daytinak aemekem. Me, era ajirisemekem pak tara bakumimosom apok. 33Wan bare, owe, tare tame owe bipu aten. Are tara ajurusumen. Wan barerawa, era owe, wan owe emes taka wan aomes. Tararawa, wan oweam takan aememekem. 34Are wan owe buji tame bomon ataejiimes. Tararawa, era owe seekot aoorporekem. Are tapak takes tasa aetaaes. Tare ere, era pak jak akot aememekem. Tare akot nak pak aemomekem aporekem. Era aemomekem pak, ere jiine pak. 35Emesare, era jak fiak aememmakam pak bamompim bas. Ere tare asan akotnak baem pak. 36Tare Allah akot apormar pak jipu aemtakam, Armat Ipit era ataaji aee pak tara atetamteman. Emesare, jak jirao aememaaray. 37Ere Alkitab atakam jipu:
“Me andaeto Ipit fef emes andaetem. Anom baemekenkene apok aemtem.
38Me duturunak owe, Dere eemnak ambesemkorommanis. Erarawa are jiinenak aememaartemas. Me, era owe aotasiemtas apaye, Dere era owe akot apok aportemin.”
Emes atakam aeapoma. 39Me, dare bootasiem owe apok. Danom danais baemames owe apok. Dare Allah eemnak ambesemkorommarom. Erarawa dare ajoremtemarom.
Currently Selected:
IBRANI 10: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
