IBRANI 8
8
Yesus daAllah Tame Pak Baem Daytinak Ipit atakam
1Era akoremarom atakam fwe are: emesare, dare Allah Tame Pak Baem Ipit Daytinak aemapom. Era akotnak Allah, Surga oup aemapem. Ere daAllah Tame Pak Baem Ipit Daytinakam Allah bo poman aemapem. 2Armat Ipit, Allah Tame Pak Baem Ipit Daytinak, emes pak aememem. Are Surga oup Allah Tame era Allah Turunak Asan, emes pak baem aememem. Era pitini tame, ere anakot tame. Asamot owe era tame baeapom apok. Me, Tuhan era tame aoeapome.
3Allah, era atakam aTame pak baem owe takes, pak Ara batetamam, pak Ara bataetiitamam, emes ataketamen. Emesare, daAllah Tame pak baem Ipit, pak atetamum. 4Armat Ipit ara aemansa tapirmi baemem ere, Are Allah Tame pak baem ipit baemeemem asan apok. Emesare, ara aemansa tapirmi, Allah Tame pak baem owe, pak, Musa aeapome Basakamtam Atakam jipu, atetamemas. 5Era owe era aememas pak ere, anakot apok. Era anakot pak, ere Surga oup are. Ararawa, era anakot pak jipu emes tamen aemmas. Ere Musa aeme pak emes tamen are. Armat ipit era pitini Yahudi owe samayen tame baeapom aememe ere, Allah, atakam armat ipit akoromen: “Era fami oup aememem, Dere era tame, ataketamo. Emesare, era tame aeapomtakam, ere dokoretamo atakam jipu taka aemkoromey.” Emes atakam aesimen. 6Emesare, Allah ere, aTame pak baem owe, potanak pak baem ataemomen. Are ere, Yesus, akotnak pak baem ataemomen. Erarawa Allah bonak ataaji aee atakamam, ere potanak. Me Yesus ere, Allah ai ataaji aee atakam, atakam asamot owe akoromattamen. Me Allaham era aemto pak akotnak, ataaji aeen. Erarawa era ataaji akot. 7Me bonak ataaji aee atakam akotnak ere, Allah ai ataaji baee apok. 8Me, Allah, aowe era pota pak aemes aporen. Ararawa, emes atakam akoren:
“Tuhanam: ‘Era aamsekunaoto bareiin, Dere ai ataaji, Israel oweam, Yehuda saman oweam, aeetemin.
9Era ataaji aeetey atakam, ere bonak ataaji aeeo atakam emes tamen apok. Bonak ere, Dere era owe arfaisomar ban akemomtino. Derarawa, era owe, Mesir tapirmi ambetomjiso.
Era owe ere, era ataaji aeeo atakam ji bae apok aemes. Emesare, dere era owe banamek botaiomem apok aemo.’ Tuhan emes atakam akorem.
10Me Tuhan arawa, ‘Era bareiin aamsekunaoto ere, Dere emes ataaji Israel owe aeetemin: Dere dobasakamtam atakam bimak binip era owe atetamtemin. Denom dobasakamtam atakam era owe jak bomon ataapomtemin.
Dere era owe aAllah aememtemin. Era oweam deowe aememtemas.
11Emesare, era juas apok owe takesam, era juas aptam owe takesam, ajamkaitemanis. Erarawa Israel owe, atapirmi owe, atakam boememtam apok aemtemas. Are, “Tuhan ajamkaiay,” emes atakam ajoo owe bakorom apok aemtemas.
12Era owe, pota pak aemes. Dere ere, era owe soro ajiomemtemin. Denom era owe adosa, bimak binip bojanimomem apok aemtemin.’ Tuhan emes atakam aesima.”
Allah emes atakam aesimen. 13Me Armat Ipit ai ataaji atakam akore ere, Are era bonak ataaji, tarai ataaji aemapome. Emesare, era tarai atakam emak fiak aemapem. Era tarai ataaji apakapiosto baream, ere setep.
Currently Selected:
IBRANI 8: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
