2 PETRUS 2
2
Pote atakam baememtam owe atakam
1Bonaknak ere, Allah atakam bakoretam pote owe, Allah aowe takan aememes. Emesamare, pote atakam baememtam oweam tare takan emes taka aememtemas. Are pote atakam tiruu aememtamtemas. Me, aatakam ji bae owe ere, danais aemaptemas. Kristus era owe dosa fiak pak asurumtame. Me, era owe, Armat ipit apatimtemas. Era oweam danais fef aemaptemas. 2Owe tananeam era asan pota pak ajamkaitemas. Me, Allah atakam, Allah Bamarem Bokot Anakot arare. Era owe ere, tame atakam era bokot anakot atetemas. 3Era pote atakam baememtam owe, pak daytu asenomemas. Erarawa are tapak bataet, pote atakam tara akoromteman. Tarainak, era dosa Atakam Basakamtii Ipit, ara owe adosa, atakam asakamtiie. Era owe Danais Baemtii Ipit, ere ise apok.
4Bonaknak ere, Allah, era dosa aememes malaikat owe takes, seis akot bajie apok aemen. Are era malaikat owe neraka bomon ajuumdaemen. Anom era malaikat owe, ara dosa atakam basakamtiikorom bare ajiire, era jiiti jafa bomon baemapaar, ataapomen. 5Anom era bonaknak owe seis akot bajie apok aemen. Are daytinak bwi era jaos owe bajurusum ataendaemen. Are ere, Nuham, wan owe poman ban jamnukam, ajortaeren. Me Nuham akoretamen. Are era owe, owe turunak baemem atakam akoretamen. 6Emesare, Allah anom era kota Sodom oweam, era kota Gomora oweam, owe jaos, emes atakam asakamtiien. Erarawa Are era kota jisimak ambomtiikoromen. Era pak aeme ere, Are jaos owe era asep bare bare aemtas pak aporomtamen. 7Allah ere, Lot ajortaeren. Me Lotam Allah akot apormar pak jipu aemen. Are era jokomannak owe aasan potanak pak apore, wanam jak pota aememen. 8Ara turu ipit, era jaos owe takan aememen. Are juiin afaafeaarir, era owe aasan potanak pak aporen. Are era owe aokorea ajaies atakam jane ajaien. Erarawa are jak apok aememen. 9Me, Bii Kapar Ipit, turunak owe, dosa baem atatapimtaaem. Me, Allah era pak bojorem fiak pak era turunak owe batetam amsam. Anom era jaos owe dosa atakam basakamtiikorom bare ajiire, bajurusumaar amsam. 10Era asan potanak pak, era ajak bomon asan pota pak basenomem jipu baemam, Musa Basakamtam Atakam bifaneam, emes owe apaknak erare.
Era owe era asan pota pak baem, ombare apok owe erare. Are kuus fiak owe erare. Are tame atakam era Surga oup malaikat owe bakore ombare apok aemememas. 11Malaikat owe, ere fiak. Are Surga oup juas aptam owe. Era pote atakam baememtam owe ere, kumiti. Are juas aptam owe apok. Me, era malaikat oweam, era owe aoememmas jaos pak, atakam pota Tuhan bipu bakore apok aememas. 12Era owe ere, bimak binip apok binatang tamen are. Are ajisamses ere, are siso ara ajatatepmas ajisamses tamen are. Anom batatii ajisamses tamen are. Are amsam apok pak, tame atemas. Owe, era owe, bimak binip apok binatang tamen atatiitemas. 13Era owe, owe ajurusumes. Emesare, are ajirisemtemas. Anom jok asan pota pak baem jak akot aemememas. Are damke tara akamemomeman. Are dosa jirsat jaytu owe. Are amos tare takan andemas ere, are potet tara atutuman. Are emes baem jak akot aememas. 14Are pota tapes andimarjaraaremas. Are dosa baem jak asenomaaremas. Are era fiak apok owe, dosa baem atatapimtaaemas. Are pak bataet amsamnak owe. Emesare, Allah era jaos owe bajurusum atakam akore. 15Era owe era imtuu bokot anakot beken ajietiies. Ararawa, bokot janda aememes. Are Beor andep juas Bileam ajare bokot, ajares tamen are. Me Bileam uang jak asenomen. Erarawa uang bataet, jaos pak aemen. 16Me atakam amsam apok keledai, asamot atakam akoren. Are era Bileam pota aeme pak bajatemotaer aren. Are Allah atakam bakoretam ipit era jaytu tamen aeme pak akarimen.
17Era pote atakam baememtam owe, eojafa bwi sa asamtiimas tamen are. Emesare, kuur daytu, jaka sesak awumosomum. Era oweam era jaka sesak tamen are. Allaham era owe era jiitinak asan ajasosoapome. 18Era owe amba aemetemtemmas. Me, aokoremas atakam bambi pak. Wan owe, asan pota pak japen akoremas. Era pote atakam baememtam owe ere, ara owe pota jak basenomem pak jipu baem atatapimtaaemas. Are era owe, siso bomon bajatatep tamen are. 19Era pote atakam baememtam owe, ataaji era owe aetamemas. “Tare daatakam ji aetakam, Allah tare aBasakamtam Atakam ji bae, atakam tara bakorom apok aemteman.” Emes atakam aesimemas. Era pote atakam baememtam owe ere, pota pak baem, baemekariem asan apok. Era asan pota fiak pak, era owe aemomem. Emesare, owe era pak baem baemekariem asan apok apaye, era pak era owe aemomemas. 20Emesare, dara Bajortaer Ipit, Yesus Kristus daTuhan are. Era Armat Ipit amsam owe, ara aemansa tapirmi asan pota pak ambompimes. Me, era owe era pota pak aojamkaitas apaye, are asan potanak aemaptemas. Bonak ere, era owe Yesus Kristus amsam apok aemapes, are asan akot tamen aemapes. 21Me, ara owe, turunak owe baemem pak amsam aemapes. Wanam, are era pak beak sos asotames. Are, Allah era owe atetame basakamtam atakam, beak sos asotames. Me, are era owe turunak baemem pak amsam apok ere, are asan akot tamen. 22Oweam emes baetaa atakam akoretamemas: “Juuri era bo aboemaspu aofasiemas.” Wanam, “Owe, wo taso bwi ambumtas, era wo semoo aoeem.” Emes asimemas. Emesare, era pote atakam baememtam owe aemes pak, ara baetaa atakam, atakamnak aporommas.
Currently Selected:
2 PETRUS 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
