2 PETRUS 1
1
2 PETRUS
Aometemot Aeapome Surat
1Dere Simon Petrus. Dere Yesus Kristus bambi karai baetam ipit. Denom Yesus Kristus atakam bakoretam bamirimemom ipit. Taraye deraye Yesus Kristus eemnak ambesemkorommarom. Me Yesus Kristus dara Bajortaer Ipit. Anom Allah. Are turunak Ipit. Erarawa Are Ara bamesem jak dara atetamero.
2Tare Allaham, Yesus daTuhanam, tamsamnak aememaartakam, Allah, asan akotnak tara aemtamaarteman. Are ji baem jak tara atetamaarteman.
Allah, owe ajatetetere atakam
3Allah dare aakotipitnak aememe pakam, aturunak aememe pakam, emes batoomem ajateteterero. Dare Armat Ipit damsamnak aememaartam, danom owe turunak aememaartemarom. Armat Ipit, ere fiak. Are dare owe turunak baemem, emes fiak pak takes atetamteterero. 4Emesare, Are era daytinak ataaji aeetamero pakam, era akotnak ataaji aeetamero pakam, atetamteterero. Dare era pak atoomemtetertam, danom Allah aememe jak tamen atoomemtetertemarom. Armat Ipitam dare ara aemansa tapirmi jak basenomem pota pak jipu baem, asurumtartetertemarom. 5Emesare, tare Kristus eemnak ambesemkorommakam. Me, tare era taka bas. Tanom wan pak baem, jak baseseromemam daytua. Tanom owe akot aememporay. Tare ere, tamsam daytu aememporay. 6Tare ere, jak fiak aememporay. Tare ere, jak jirao aememporay. Tare ere, owe turunak aememporay. 7Tare ere, tajoo owe afaimamporay. Tare ere, owe takesam afaimamporay. 8Emesare, tare era pak takes aemtakam, wanam era pak betema betema ajitakam, tanom Yesus Kristus daTuhan tamsamnak aememtemakam. Tanom Armat Ipit karai akotnak aetamtemakam. 9Me, era pak baem apok owe ere, banamek jiisi owe tamen are. Are banamek kapie owe tamen are. Allah era owe aemes dosa emekokomosome. Era owe ere, emes bimak binip ajanimemes.
10Dejoo owe akot! Allah tara ajateteteren. Are tara aereremartaateteren. Tare ere, aatakam ji aememporkoromay. Emes aemtakam, tare Armat Ipit bajamkai bamompim apok aemtemakam. 11Erarawa, Allah, Yesus Kristus daTuhan, Aobaomep Tapirmi akotnak tara atoomjiiteman. Era tapirmi, ere jiinenak Yesus Aobaomep Tapirmi. Me Yesus Kristusam dara Bajortaer Ipit.
12Tare era pak tamsam. Tanom ara jane ajimakam atakamnak, bajamkai fiak aemakam. Me, dere era pak bimak binip tara bajanimomemtamaar aemtemin. Era atakam anakot atakam apormin. 13Era dambir atemtey ajiire, dere era pak bimak binip tara bajanimomemtamaar akot apormin. 14Era dambir atemtey bare, ere setepkope apormin. Ere Yesus Kristus daTuhan dera aesimtamen atakam jipu arare. 15Dere dambir atemtey ere, tare ara atakam bimak binip bajanimomaar akot. Emesare, dere ara atakam surat baeapom, jati daytinak aemin.
Petrus, Yesus Kristus aakotipitnak aememe apore atakam
16Emesare, Yesus Kristus daTuhan, fiak pak aptam andae. Dare era pak atakam tara akoromom, dare pote bambi baporomtaer atakam apok. Dare ere, Armat Ipit aakotipitnak aememe pak aptam, dare aporom. 17Aritipit Allaham, Armat Ipit daytinak asitime. Are Armat Ipit aakotipitnak pak atetamen. Are atakam Allah Akotipitnak Aememe Asan aetaendaeme, “Are deTiikor arare. Dere Armat Ipit afaimmin. Denom Armat Ipit, akot ajimin,” emes atakam aesime. 18Allah era atakam ataendaeme ere, dare Yesus Kristus era akotnak fami oup takan aememom. Dare era atakam jane ajiom.
19Emesare, dare Allah atakam bakoretam owe aatakam eemnak aporkorommarom. Tanom era atakam jane bajie akota. Ara atakam, pelita, jiiti asan sare asaramtiiemar tamen are. Era sare, jo apuamsar tamen are. Ara atakam sare aemapoma— era jo baet sarenak, tajak bomon asaramtiitan bare ajiire. 20Bonak ere, tanom ara atakam bimak binip tamsamnak aememay: Allah atakam bakoretam owe aeapomes atakam, Alkitab bomon asinta. Me, owe era atakam, basonak bataetiitam apa bimak binip jipu baemetoomem asan apok. 21Allah atakam bakoretam owe apa bimak binip jipu batoomem wanam atakam bakoretam apoknak aemes. Me, Allah Jip era owe aemomen. Erarawa are Allah atakam akoretamesen.
Currently Selected:
2 PETRUS 1: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
