2 PETRUS 3
3
Tuhan aofasito atakam
1Dejoo owe akot! Ara aemansa surat, tare aometemot aeapomtamo surat arare. Era surat amnuk takes aeapomo ere, dere akot bimak binip taobaporejanimomem aemporo. 2Tare Allah atakam bakoretam turunak owe, tarainak akoretames atakam, bimak binip ajanimomay. Me Yesus Kristus daTuhan, ere dara Bajortaer Ipit. Armat Ipit, owe aatakam bakoretam ambirimemome. Ara owe taowe. Ara owe, Armat Ipit basakamtam atakam, atakam aokoretames. Tanom era basakamtam atakam bimak binip ajanimomay. 3Era bonak akoremin atakam ere, era asepnak bare, asan pota jak basenomem pak jipu baemaar owe ajinaotemas. Tare emes tamsam. Era owe, ere wote tara awotomteman. 4Are, “Yesus bofasie ataaji aee. Era Ipit ere ete? Darisare, ere dambir etetemes. Wanam, Allah ara tapirmi akenemapome bare ajiiream, waa aemansaram, pak takes, era akenemapome pak jipu taka asinta.” Emes atakam aesimteman. 5,6Era owe ere, ara atakam janda baemem akot eraren: Tarainak Allah atakam akoren. Atakam akorerawa, ara wonamo oupam, ara tapirmiam akenemmamsen. Tapirmirawa bwi aejatiamsen. Era tapirmiam bwi waut ataresen. Asep arawa, bwi daytuam era tapirmi akupimomsen. Era tapirmi owe, ara bwi dambir atesen. 7Allaham atakam akoren. Ararawa, waa apormarom wonamoam, tapirmiam, danais baemtii apok aemum. Are era pak Armat Ipit era asan pota owe dosa atakam asakamtiikoromto bare ajiire, danais baemtii apok aemum. Era barerawa, Are ara wonamoam, ara tapirmiam, jisimak bamomtiikorom sesey aeapomum. Allaham era jaos owe atakam asakamtiitem wanam danais aemtiitem.
8Dejoo owe akot! Ara atakam taka bimak binip bajanimem bas: Tuhan, bare taka, tahun 1.000 awar aporem. Anom tahun 1.000, bare taka awar aporem. 9Tuhan era ataaji aee pak baem, airum apok aemum. Wan owe abimak binip ere, Are airumen. Armat Ipit ere, jak jirao tara aememan. Are owe danais baemames potan. Are owe takes dosa bamakemkorom akoten.
10Me, Tuhan Bare, wosom ipit tamen ajinaoamestem. Era bare ere, oup wonamo ajaniostem. Anom wur tamen ajiostem. Baetam, baisam, jiisimak amboskoromtemas. Allah era pak ambomosomkoromtem. Ara tapirmiam, ara tapirmi pak takesam, ajaniostemas. 11Allah, era pak takes ambomosomkoromtem. Dare emes apormarom. Emesare, tare wama owe ememtakam? Tare turunak owe aememay. Tanom tadamo anakot aptam, Allah atetamay— 12tare Allah Bare aemamesto banamek apemmakam. Tanom era bare fef baemames aemtampormakam. Era bare, era wonamo oup, jisimak ambomtiikoromtem. Era baetam, era baisam, ambapnak awotepemtem. Erarawa are bwi taka ajaorestem. 13Me, Allah ere, ai wonamoam, ai tapirmiam, bakenemtii ataaji aee. Turunak oweam era asan aemapaartemas. Dare era pak banamek apemmarom.
14Dejoo owe akot! Tare era bare baemames banamek apemmakam ere, pota apoknak owe aememporkoromay. Turunak owe aememporkoromay. Tanom Allah ajamfaimamporkoromay. 15Me daTuhan jak jirao aememe. Era pak, owe bajorem asan akot pak. Tare emes bimak binip ajanimomay. Allah, dajoo ipit akot juas Paulus, bimak binip baso atetame. Me Paulus arawa, emes atakamam surat tara aeapomtamen. 16Armat ipitam emes atakam taka asurat takes aeapome. Me wan aeapome atakam, ere bomonnak are. Era janda oweam, era bajamkai fiak apok oweam, atakam jane bambi ajimas. Wanam apa atakam aokoremas. Erarawa era owe asan potanak amba ajirisemmas.
17Dejoo owe akot! Tare ara akoremin atakam tamsam. Erarawa, tanom turunaka! Tare ara basakamtam atakam ji bae apok owe apote aememas pak bajamkai-ombar. Tanom Yesus Kristus bajamkai fiak, bamompim-ombar. 18Yesus Kristus daTuhan, Are dara Bajortaer Ipit. Tanom era atetammar asan akot baemomem, betema betema ajiaaray. Tanom Armat Ipit aememar pak baporkorom, betema betema ajiaaray. Emesare, waa, owe Armat Ipit tere baeomkoromtas. Anom Armat Ipit tere baeomkoromaartas.
Currently Selected:
2 PETRUS 3: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
