1 KORINTUS 15
15
Allah, Kristus ajaorowasumtume atakam
1Dejoo owe akotnak! Dere era akoretamo Allah Akot Atakam, bimak binip tara ajanimomemtammin. Tare era atakam, atakamnak aporekem. Tanom era atakam eemnak ambesemkoromekem. Erarawa tanom emes ajakajiremmakam. 2Tare Allah Akot Atakam bajiiosom apok aemtakam, era atakam tara ajortaerteman— tare era atakam bambi bamesem apok apaye.
3Era akoretamo atakam, anakotnak atakam. Tuhanam era atakam dera atetamen. Era atakam ere: Kristus dadosa bakokomosomtam, dambir atemtamero. Ere Alkitab atakam jipu. 4Owe ere, Kristus era dambir ipit eka jipa bomon ajiitaetiies. Bare bamintep arawa, Allah, Armat Ipit ajaoromwasumtume. Anom Alkitab atakam jipu. 5Armat Ipitam Petrus bipu ajateome. Ararawa, abajamkai owe 12 abipuam ajateome. 6Ararawa, Armat Ipit ajamkaies owe 500am, wan owe bokaimam, bipu ajateome. Waaam wan owe tanane aomatisa. Wan ere, dambir ametemes. 7Ararawa, Yakobus bipu ajateome. Ararawa era atakam bakoretam bamirimemom owe takes bipu ajateome.
8Asepnak arawa, Are debipuam ajateomen. Dere jii bape bare aofeosemas ajisamsemas jii tamen are. 9Me wan Yesus atakam bakoretam bamirimemom owe, ere juas aptam. Dere ere, juas apok. Denom Yesus basitim bajarisiap owe ajurusumaaru. Erarawa, owe dere Kristus atakam bakoretam bamirimemom ipit bajie, ere dere awar apok. 10Allah ere, dere asan akot bambi atetamen. Erarawa, dere waa Yesus atakam bakoretam bamirimemom ipit aememo. Are dere era asan akot bambi atetamen, ere bambi pak apok. Dere Allah karai daytinak aeetamaaru. Me wan Yesus atakam bakoretam bamirimemom owe ere, karai koser aeetamaaris. Era daytinak aeetamaaru karai ere, dema apok. Allah takan aemaarin. Ere era asan akot bambi atetamaarin pak are. 11Emesare, era atakam akoretamen, der apaye, era owe apaye, ere awar. Dare ere, Allah Akot Atakam tara akoretamom. Tanom era Allah Akot Atakam ambesemekem.
Allah asamot owe ajaoromwasumtumto atakam
12Emesare, dare Allah, Kristus ajaoromwasumtume atakam, tara akoretamom. Me, tare wan oweam, “Allah era dambir owe bajaoromwasumtum apok aemtem,” emes atakam aesimemakam. Emes atakam ere, wama tamenem? 13Allah era dambir owe bajaoromwasumtum apok aemto apaye, Are Kristusam bajaoromwasumtum apoknak aeme. 14Allah Kristus bajaoromwasumtum apok ere, era akoretamom atakam, ere bambi atakam. Me ambesemekem pakam bambi pak. 15Dare, Allah, Kristus ajaoromwasumtume atakam, ateman atamom. Me, Allah era dambir owe bajaoromwasumtum apok aemto apaye, anom Kristus bajaoromwasumtum apoknak aeme. Oweam, dare Allah pote ateman atamom emes apormaroas. 16Allah era dambir owe bajaoromwasumtum apok aemto apaye, ere anom Kristusam bajaoromwasumtum apoknak aeme. 17Allah Kristus bajaoromwasumtum apok apaye, tare Kristus eemnak ambesemkoromekem atakam, ere bambi taka. Allaham tadosa bimak binip bajanimemtam apok aeme. 18Emesamare, Kristus eemnak ambesemkoromes dambir atemes oweam, ere danais aemtiimas. 19Me Kristus jiirey aeemarom, era jatiaptam aemapmarom pak taka erare? Emes apaye, dare asan pota owe aemapom. Me wan asamot owe takes ere, asan akotnak.
20Me, Allah Kristus etejaoromwasumtume. Kristus Allah bonaknak ajaoromwasumtume Ipit arare. 21Jipit taka dosa aemen. Erarawa asamot owe dambir aememas. Wan Ipit taka ere, akot pak aeme. Erarawa asamot owe ajaorwasittemas. 22Owe takes Adam arurupis. Erarawa owe takes dambir aememas. Emesamare, Allah Kristus bajamkai owe takes, ajaoromwasumtumtem. 23Allah, oweo aememayes abarepu ajaoromwasumtumtem. Are Kristus bonak ajaoromwasumtume. Wanam Kristus aofasito, Allah Kristus aoweam ajaoromwasumtumtem. 24Emesare, Asepnak Bare aemamestem. Kristus, era pemerintah takesam, era basakamtam atakam owe takesam, era fiak owe takesam, akarimtiitem. Erarawa, are takes aoomepkoromtem. Are takes, Aritipit Allah, atetamtem. 25Emesare, Kristus atakam aosakamtamkoromtem— Allah ajii owe takes akumimosomkoromto bare ajiire. 26Era asepnak akarimtiito jii owe, ere dambirnak. Erarawa owe dambir boem apok aemtemas. 27Alkitabam, “Allah, Kristus basakamtam atakam takes basakamtamkorom, emes atetame.” Emes atakam aeapoma. Me, ara atakam, “basakamtam atakam takes basakamtamkorom,” ere Allah taka basakamtam apok. Emesare, Allah era basakamtam atakam takes basakamtamkorom atetame Ipit erare. 28Me Allah Andep, atakam asakamtamkoromto, Andep Aritipit atakamam ji aeekoromtem. Emesare, Allah Andep atakam takes basakamtamkorom atetame Ipit arare. Erarawa Allah takes aemomemkoromtem.
29Wan owe Kristus bajamkai owe apores. Ararawa, are wan dambir aemes owe bwi bakupimtaer atakam ajanimes. Era dambir owe ere, bajaorwasit apok aemtas apaye, wan owe era owe bwi bakupimtaer, wama tamenem? 30Danom are. Danom era ju ajiraomar, asan pota aememmarom. Era dambir owe bajaorwasit apok aemtas apaye, dare emes baem wama tamenem? 31Dejoo owe akotnak! Dere ju afaafemar, “Dere waa dambir aemtemin apeno,” emes bimak binip atetaramemin. Emesare, taraye deraye Kristus Yesus daTuhan, takan ajamkaimarom. Erarawa dere jak akotnak. Emesamare, dere atakam tara akorommin. 32Me Efesus ere, dere wasen jokoman binatang owentakam aemo. Era asan pota aememo ere, dere bambi asamot ipit aememo apaye, ere wama akot pakem? Allah, era dambir baem owe bajaoromwasumtum apok aemto apaye, dare owe, wan owe akoremas atakam jipu baem: “Dare to dambir aemtemarom. Erarawa dare waa paknam daytu adamo.” Emes atakam aesimemas.
33Owe potet tara batutum bas. Turu owe, jaos owe akikimomemtas, me anom owe jaos aoememtemas. 34Bimak binip baso botetaramay. Era aememakam dosa, akariay. Wan aemapakam owe Allah tamsam apok. Ara akoremin atakam, damke tara bakamemom atakam.
Ai damo atakam
35Wan owe ere, emes atakam ajateporemas. “Allah era dambir owe bojaoromwasumtum wama tamenem? Era owe wama damo emomemtas?” Emes atakam aesimemas. 36Janda bas! Eek ajapomtakam, era eek ofa apok aemamestopaye, akeneam bajit apok aemum. 37Era ajapomtakam pak, bambi eek taka. Are ajitememas pak akene tamen apok. Era eek, ere gandum eek apaye. Wan eek apaye. 38Allah ere, era atakam amba asakamtiie akene, era eek atetamum. Are era eek taka taka apa akene akot atetamum.
39Damo dasa takesam awar apok. Asamot owe apa damo dasa. Binatangam apa damo dasa. Sakaoam apa damo dasa. Enamoam apa damo dasa. 40Me Surga oup owe, ere apa damo Ara tapirmi owe ere, apa damo. Me Surga oup owe apa akot pak aptam. Ara tapirmi oweam apa akot pak aptam. 41Era jeeam apa akot pak aptam. Era piram apa akot pak aptam. Era baetam apa akot pak aptam. Era baet takes ere, ara akot pak awar apok. Wan baet apa akot pak. Wan baet ere, apa akot pak.
42Allah era dambir owe ajaoromwasumtumto pak, ere emes tamen are. Owe era dambir owe se awuapomemas, era dambir owe jati aptam apok. Me, Tuhan era dambir owe ajaoromwasumtumto, era owe jiine aememaartemas. 43Owe, era dambir owe se awuapomemas, era dambir owe, potaam, kumitiam, are. Tuhan, era dambir owe ajaoromwasumtumto ere, era owe damo akotnakam, damo fiakam, aememtemas. 44Owe, era dambir owe se awuapomemas, era dambir owe, ere asamot damo dasa aptam. Me, Tuhan era dambir owe ajaoromwasumtumto ere, era damo, ere Allah Jip atetamto damo are. Emesare, owe asamot damo dasa aptam damo aemomemas. Wan ere, are Allah Jip atetammar damo aemomemas. 45Anom Alkitab atakam jipu: “Era bonaknak asamot ipit juas Adam jati aptam ipit aememen.” Emes atakam aeapome. Me asepnak Adam ere, jiine owe batetam Jip. 46Era bonak ipit asamot damo dasa aptam ipit. Are Allah Jip atetamto dama ipit apok. Era asep ipit ere, Allah Jip atetamto damo ipit. 47Allah, tapirmi se, era bonak ipit akenemapomen. Me asep ipit ere, Surga oup aendae. 48Ara aemansa tapirmi owe, Allah tapirmi se akenemapome ipit awar. Era Surga oup atemettas owe, ere Surga oup aendae Ipit awar. 49Dare Allah tapirmi se akenemapome ipit damo awar aememom. Wanam dare era Surga oup aendae Ipit damo awar aememtemarom.
50Dejoo owe akotnak! Me ara akoremin atakam ere, era dasa anama esee aptam damo Allah Ai Tapirmi baemejii asan apok. Era dambir batem damo baemeemapaar asan apok.
51Baporay! Dere bomonnak atakam tara akorommin: Dare dambir takes baem apok. Me, Tuhan ai damo atetamtetertemaro. 52Me asepnak fwi bajam jane ajitam, Tuhan, era dambir owe, ametejaoromwasumtumtem. Ere banamek afemeporemas tamen are. Tuhanam ai damo baemapaar atetamtetertemaro.
53Ara ofa aofamestam damo, ofa baemeofames asan apok damo ajaoremtetertemarom. Me dadambir aptam damo, dambir baemeem asan apok damo ajaoremtetertemarom. 54Emesare, ofa aofamestam damo, ofa baemeofames asan apok damo ajaoremtetertam, wanam dadambir aptam damo, dambir baemeem asan apok damo ajaoremtetertam, era pak Alkitab atakam jipu aemtem. Era atakam ere, “Emesare, Allah era dambir pak akumimosome.” Emes atakam aeapoma. 55Wanam, “Dambir pak! Wore dara bakumimosom fiak pak eteperam? Wore sisi dara bajat fiak pak eteperam?” Alkitab emes atakam aeapoma. 56Dare asamot owe dosa aemom. Erarawa era dambir pak, asamot owe bajurusum, emes fiak pak aptam. Musa Basakamtam Atakamam, dare dosa owe, emes aporomtammaro. 57Me, Allah Yesus Kristus daTuhan aeme pak apore. Erarawa Armat Ipit, dosa akumimosomtamemaro. Emes apormarom arawa, dare terima kasih atakam Allah akorommarom.
58Dejoo owe akotnak! Emesare, emes ajakajiremkoromay. Fiaknak aememay. Juiin afaafemar Tuhan karai akotnak aeearay. Me Tuhan aetammakam karai, ere bambi karai apok. Tanom emes apormakam.
Currently Selected:
1 KORINTUS 15: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
