1 KORINTUS 14
14
Me Allah Jip bambi batetam pak wan atakam
1Emesare, owe ajamfaimamkoromay. Me, Allah Jip batetam pak jak aseseremay. Me Allah atakam bakoretam tastu pak, ere jak daytu aseseremay. 2Me Allah Jip batetam asamot owe amsam apok atakam bakore owe, are atakam asamot owe bakorom apok. Are atakam Allah akoromemas. Oweam aatakam jane bajie apok aememas. Are Allah Jip batetam bomonnak atakam akoremas. 3Me, Allah atakam bakoretam owe ere, atakam asamot owe akoromemas. Era atakam, owe, Tuhan bajamkai fiak baemapom pak. Are ataane baowe atakam. Are jak akot baemapom pak. 4Allah Jip batetam asamot owe amsam apok atakam bakore owe, Tuhan bajamkai fiak apa aemapomemas. Me Allah atakam bakoretam owe ere, Yesus basitim bajarisiap owe takes, Armat Ipit bajamkai fiak aemapomemas.
5Emesare, dere tare takes Allah Jip batetam asamot owe amsam apok atakam kupis bakore, akot ajimin. Me, dere, tare takes, Allah atakam bakoretam akotnak ajimin. Era asamot owe amsam apok atakam kupis jow bauumtaer owe taasan baemem apok apaye, ere atakam bakore anakot apok. Me, Allah atakam bakoretam owe ere, anakotnak. Wan owe ere, era asamot owe amsam apok atakam kupis jow auumtaertas, are Yesus basitim bajarisiap owe Yesus bajamkai fiak aemapomemas. 6Dejoo owe akotnak! Dere tara ajinaomemtey, wanam Allah Jip batetam kaaowe atakam kupis akoretey apaye, dere asan akot tara boem wama tamenem? Dere ere, Allah atakam dera aporomtamtan tara akoromten apaye, dere Allah amsam pak bomon atakam tara akoromten apaye, dere Allah wan aokoromtan atakam tara akoromten apaye, dere atakam tara aememtamten apaye, ere dere asan akot tara aemmin.
7Me jati apok pakam emes are. Me suling atee bae oweam, era gitar atee bae oweam, so baso apok atee aetas, owe era so jane baemejie asan apok. 8Wanam, era fwi bajam ipit, fwi baso apok ajamto, owe jii owe bajamom baemekenem asan apok. 9Emesamare, tare atakam baso apok akoretakam, owe taatakam jane baemejie asan apok. Wore bambi atakam taka akoretem are. 10Ara tapirmi ere, atakam tananenak aemanses. Wan owe era atakam takes jane ajimas. 11Owe atakam akoretas, wanam dere era atakam jane bajie apok aemtey, dere kaaowe saman ipit emes tamen aememtemin. Era oweam kaaowe saman owe emes tamen aememtemas. 12Tanom are. Tare Allah Jip batetam pak bataet, jak baseseromem daytinak aemmakam. Emesare, tare Yesus basitim bajarisiap owe, Armat Ipit bajamkai fiak baemapom pak bataetkorom, emes jak aseseremay.
13Emesare, Allah Jip bataatam asamot owe amsam apok atakam kupis bakore owe, atakam Allah bajanimtas. Are Allah, era asamot owe amsam apok atakam kupis jow bauumtaer bimak binip ara batetam, atakam bajanimtetertas. 14Dere Allah Jip batetam asamot owe amsam apok atakam kupis akoretey, wanam atakam Allah ajanimtey, dejak bomon pak atakam Allah ajanimtemin. Me debimak binip ere, bambi taka. 15Erarawa dere wama pak emtey? Emesare, dere atakam Allah ajanimtey, dere dejak bomon pak atakam Allah bajanim, akot aesimtemin. Denom bimak binip aptam atakam Allah bajanim, akot aesimtemin. Dere Allah basitim so aetey, dere dejak bomon pak so bae, akot aetemin. Denom bimak binip aptam so bae, akot aetemin. 16Tare terima kasih atakam Allah akoromtakam, me, tajak bomon pak taka terima kasih atakam akoromtetertas, era jane ajitas bambi owe, “Ara atakam, ere atakamnak,” emes bakore, wama tamenem? Are taatakam jane bajie apok aemtemas. 17Tanom terima kasih atakam akotnak akoromtakam apaye, era atakam, wan owe Kristus bajamkai fiak baemapom apoknak aemtem.
18Tare Allah Jip batetam asamot owe amsam apok atakam kupis bakore, ere janderes. Dere ere, daytinak. Erarawa, dere terima kasih atakam Allah akorommin. 19Owe Yesus basitim ajarisiaptas, dere era owe, jane ajitas pak juas ban takakope, atakam bimak binip aptam era owe bakorom, ere akot. Ere era owe baememtam atakam are. Dere ere, Allah Jip batetam asamot owe amsam apok atakam tanane, owe bipu bakore, ere pota taka. Are era atakam jane bajie apoknak aemtemas.
20Dejoo owe akotnak! Tare bimak binip atetaramtakam, jii koser bimak binip atetaramemas emes tamen bas. Me, tare pota pak baem, ere jii koser pota pak baem amsam apok emes tamen aememay. Bimak binip atetaramtakam ere, duturu owe tamen bimak binip atetaramay. 21Alkitab emes atakam are:
“Dere kaaowe saman owe, atakam asakamtamtemin. Era owerawa, deatakam ara aemapes owe akoretamtemas. Erarawa kaaowe ir pitin, atakam deowe akoretamtemas. Me, deowe, deatakam ji bae apok aemtemas.”
Tuhan emes atakam aesimen. 22Me Allah Jip batetam asamot owe amsam apok atakam kupis, Kristus eemnak bamesemkorom owe abaporomtam pak apok. Me, ere Kristus bamesem apok owe, abaporomtam pak. Me Allah atakam bakoretam ere, Kristus bamesem apok owe abaporomtam pak apok. Ere Kristus eemnak bamesemkorom owe abaporomtam pak.
23Me Yesus eemnak bamesemkorom owe takes ajarisiaptas, wanam takes Allah Jip batetam asamot owe amsam apok atakam kupis akoretetertas, ararawa, bambi owe apaye, Kristus bamesem apok owe apaye, ajiitas, are tare jaytu owe, emes atakam akoretemas. 24Me, owe takes Allah atakam akoretas, wanam Kristus bamesem apok ipit apaye, bambi ipit apaye, ajiito, are era atakam jane ajitem. Ararawa, ajak bomon dosa aportem. Are adosa atakam asakamtiitem. 25Me ajak bomon tiruu pakam, baso ajateamestem. Ararawa, bi fop andaejiaptem. Are, “Allah tare takan aemomman,” emes atakam aesimtem.
Kristus basitim bajarisiap owe, takes bafaafekorom atakam
26Dejoo owe akotnak! Ara akoremin atakam wama tamenem? Ajarisiaptakam, tare oweo aememayekem so baetam apaye, atakam baememtam apaye, Allah bomon atakam bakoretam apaye, Allah Jip batetam asamot owe amsam apok atakam kupis bakore apaye, atakam jow bauumtaer apaye, emes aemtemakam. Me, era aemtakam pak takes, owe, Kristus bajamkai fiak aemapomay. 27Owe, Allah Jip batetam asamot owe amsam apok atakam kupis bakore aememtas, are owe tanane bas. Owe jamnuk apaye, bamintep apaye, bakoretas. Are atakam jow auuema, jow auuema, emes baemtas. Jipit takarawa, era atakam jow bauumtaerto. 28Era asan atakam jow bauumtaer owe apok aportas, era owe, Kristus basitim bajarisiap asan, atakam apok bajiaptas. Amba atakam bakoretas. Atakamam Allah bakoromtas. 29Owe Allah atakam akoretas, owe jamnuk apaye, bamintep apaye, bakoretas. Me wan owe takes ere, ara atakam, bimak binip batetaramkoromtas. 30Allah, aatakam bimak binip, wan era asan aemapto ipit atetamto, era bonak ipit atakam bakarito. 31Tare takes Allah atakam bakore jow auuema, jow auuema bajie asan erare. Era owe takes atakam baememtam pak. Anom owe takes jak fiak baemapom pak. 32Me Allah atakam bakoretam tastu pak aptam owe, era atakam bakari fiak pak aptam. 33Allah, batutum pak pota ajim. Me, are owe asan akot baemap akot ajim.
34Tapes, Yesus basitim bajarisiap asan, atakam apok bajiaptas. Are atakam bakore bas. Emesare, era samaniin samaniin, Yesus basitim bajarisiap turu owe emes aememas. Era tapes, oorey atakam ji baetas. Era pak Allah atetame Basakamtam Atakam jipu. 35Tapes bajatepor akot ajitas, are ambiis, apa tame bomon, bajateportas. Tapes, Yesus basitim bajarisiap asan atakam bakore, ere damke pak.
36Tare ere, ara atakam potay? Tare Allah atakam bonak tara porejinaoe? Tare era atakam jane tapa jiekeme? 37Wan owe abimak binip ere, “Dere Allah atakam bakoretam ipit.” Wan owe ere, “Dere, Allah Jip batetam pak ataeto.” Emes bimak binip atetaramemas. Me, tare ara aeapomtammin surat, ere Tuhan abasakamtam atakam. Era owe emes baporkoromtas. 38Owe ara atakam jane bajie apok aemtas, tanom era owe atakam jane bajie bas.
39Dejoo owe akotnak! Emesare, Allah atakam bakoretam tastu pak bataet, jak aseseromay. Me Allah Jip batetam asamot owe amsam apok atakam kupis bakoream, atii bata bas. 40Era aemmakam pak takes akot aemay. Are takes afaafekoromay.
Currently Selected:
1 KORINTUS 14: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
