KELUARAN 20
20
Plenat Bo'mese
(Ul. 5:1-21)
1Oke te Uisneno nakua In a'an, ma le i In a'an sin, 2“Au le i hi Uisneno le eki ki ampoi na'ko Mesir bale anaten ki anbine.
3Kaisa miusi uisneno teta. So hi miluli mibes neu Kau.
4Kaisa anmo'e fatu le'u ai hau le'u neu ko le namas on sa' amsa anbi neno tunan, anbi pah pinan ai anbi oe in nanan anbi pah pinan in nupun. 5Kaisa mibes neu fatu le'u ma hau le'u le nane, natuin Au le i hi Uisneno, ma Au ka lomi fa he minesa Kau nok sa'-sa' amsa. Atoni-atoni le sin nek nanan Kau of Au kas sin talantia sin sufan batan tenu ma batan ha. 6Mes of Au uton Au manekak neu sufa ka'uf nifun-nifun na'ko atoni le sin annek Kau ma sin natuin Au plenat.
7Kaisa amtek Au kanak lafu-lafu, natuin Au, hi Uisneno of Au kas sin sekau le anpake ansan Au kanak.
8Minaeba Neno Snasat ma miupab neno nane anfani neno knino. 9Au fe neu ki neno ne he hi mepu, 10mes anbi neno hitu nane neno snanat le mabeti neu Kau. Anbi neno le nane kais atoni mese amsa anmepu, leko hi, leko hi anah sin, hi ate-ate sin, hi mu'it sin, ai atoni anao amnemat le natua anbi hi pah. 11Anbi neno ne in nanan, Au Uisneno, Au mepu pah pinan ma neno tunan, tasi, nok in nesan oke, mes anbi neno hitu Au masnas. Esle' nane Au, Uisneno, Au fe ani tetus neu Neno Snasat ma Au beti ani neu Kau.
12Mumtausan ho ama ma ho aina, he nati' mupeni aomina ma ua mnanu anbi pah le Au fe ani neu ki.
13Kaisa mamaten.
14Kaisa mapaisa.
15Kaisa mibak.
16Kaisa matutan lasi poi neu atoni bian.
17Kaisa amsinmakan atoni bian in-ini: in ume, in fenai, in ate-ate sin, in mu'it sin, in bikase luke mnanu sin, ai sa' le in-ini.”
Atoni Israel nahenu nok nek amtausa
(Ul. 5:22-23)
18Leka atoni-atoni sin nen lotos ma to'is in hanan, ma sin nit limat, ma tubu le napoitan masu', sin na'tai nok amtausa ma sin anhake anbi lo. 19Sin nak neu Nai Musa nak, “Ho es mumolok mok kai ma of haim nen; mes kais Uisneno es namolok nok kai, of hai mate.”
20Nai Musa natae nak, “Kais mimtau, Uisneno In nem al hen su' ki he nati' hi mituin In piut, ma kais misanab.” 21Mes atoni-atoni nane anhake na'lo nabala, al Nai Musa es anhake anhaumak nope mesokan anbi bale Uisneno ansanu anbine.
Lekat lulut neu baki fuat
22 Uisneno naplenat Nai Musa he nati' natonan to Israel nak, “Hi mit milali neu Au, Uisneno, umolok oke ki na'ko neno tunan. 23Kais anmo'e neu ki uisneno teta na'ko noni muti ai mnatu he miusi neu in, naik na'ko Kau. 24Anmo'e neu Kau baki fuat na'ko afu, ma mitulu anbi bale nane hi bibi kase ma bijae anfani fua mnotu ma fuat halan nekaf. Anbi bale mese-mese le Au lek ani neu ki, anfani bale neu he hi miluli ma mibes neu Kau, of Au aum ma fe tetus neu ki. 25Leka hi mo'e neu Kau baki fuat na'ko fatu, kais hi mo'e na'ko fatu masapi, netuin leka him pake paha' he mipe' fatu, bale fuat nane ka nabe'i fa he him pake neu Kau. 26Kais mifena baki fuat le amnanut talante mes him sae meki elak, he nati' hi aom le ka nabe'i fa he makiso nane natonon.”
Currently Selected:
KELUARAN 20: AOZ
Highlight
Copy
Compare
Share
Want to have your highlights saved across all your devices? Sign up or sign in
