KELUARAN 19
19
Atoni Israel sin anbi Tubu Sinai
1-2Nalali te to Israel sin nasaitan Rafidim, ma anbi fun tenu antam neno mese leku sin nasaitan nalali pah Mesir, sin nem antia mnela snaen Sinai. Sin nahakeb sin um-ume anbi Tubu Sinai in un, 3ma Nai Musa ansae neu tubu nane he naeku nok Uisneno.
Uisneno nakua a'an na'ko tubu nane ma anlenu in he natonan to Israel, Nai Yakub in sufan, nak, 4“Hi mit milali sa' le Au mo'e ulali neu atoni Mesir, ma Au eki ki onme neu bale le i nok kuasat le anaek, onle kakatasi panis neki in ana' anbi in ninen. 5Kalu leku le i hi mituin Kau ma mi'ki neu Au Fef Bela, of Au mo'e ki amfani Au to. Pah pinan nok in nesan nane Au ini, mes hi of amfani Au ini le Au nek ani, 6neu Au kun, hi of amtuthae Kau on Ana' fuat knino sin.”
7Ma Nai Musa ansanu ma in no'en ale atopus sin he nati' nabuabok, oke te in naton neu sin ale sa' le Uisneno naplenat nalali neune. 8-9Ma sin alsin natae nak, “Haim lomi he mo'e ale sa' le Uisneno naton nalali neu ko,” ma han taes nane Nai Musa natiab nani neu Uisneno. Oke te Uisneno nakua a'an neu Nai Musa nak, “Au of aum neu ki anbi nope naek in nanan; atoni-atoni of sin nen Au molok neu ko, ma naubon na'ko leku nane sin of anpalsai piut neu ko. 10Leku le i mueku mok atoni-atoni nane, ma amlenu sin he nati' anbi neno le i ma noka naloitan sin aon he naluli ma nabes. Ma sin mes naknino sin blua pake. 11Sin mes naloitnok nalali anbi ansine. Anbi neno nane of Au sanu anbi Tubu Sinai in tunan, bale ale atoni sin of nit Kau. 12Anmo'e taka' anfun natef tubu le i anfani ekat he nati' ka nabe'i fa to anlak anfini. Mukain to nane he kais ansae neu tubu nane, ai hen haumak. Sekau es anfinin ekat nane, in of anmate; 13mes ampoli atoni nane meki fatu ai miklao in, ma ka nabe'i fa hem ono. Lekat le i antom leko neu mansian ai neu mu'it; sin le anfinin ekat nane mes anmate. Anbi leku him nen to'is in hanan, atoni-atoni nane mes sin ansae neu tubu.”
14-15Nalali te Nai Musa ansanu na'ko tubu nane ma anlenu atoni-atoni nane he naloitnok he nanaoba luli besa. In nak, “Ansine hi mes miloitnom, ma anbi tabu le i ka nabe'i fa him tup mibua.” Oke te to nane naloitnok ma naknino sin blua pake.
16Anbi neno tenu, leku nok-noka, anmu'i lotos, kenat ma limat. Nope le anmafau anbol anbi tubu in tunan ma to'is in hanan anaek sin anen. Ale atoni le anbi um-ume in nanan sin na'tai ma namtau. 17Nai Musa neki sin anpoi he naeku nok Uisneno, oke te sin anhake anbi tubu nane in un. 18Masu anamu nan Tubu Sinai anfun natef, natuin Uisneno ansanu anbi in tunan anbi ai. Masu nane ansae onle masu na'ko bale hanat, ma tubu nane an nainun anfun natef. 19To'is nane in hanan anaek kun. Nai Musa namolok, ma Uisneno natae in nok a'lotos. 20Uisneno ansanu anbi Tubu Sinai, ma no'en Nai Musa he nati' in ansae neu tubu nane in tunan. Oke te Nai Musa ansae, 21ma Uisneno nakua a'an neune nak, “Amsanu nai ma mumnauba atoni-atoni nane mak sin ka nabe'i fa hen finin ekat he nem hen kiso Kau. Leka sin antanhai nani amsa, namfau anbi sin of anmate. 22Ma ale Ana' fuat knino le anlomi hen haumak Kau, sin mes he naknino sin aon; kalu kahaf, of Au kas sin.”
23Nai Musa nak neu Uisneno nak, “Atoni-atoni nane of kan saen fa, natuin Ho muplenat mulali kai he nati' hai mibaina tubu le i anfani bale knino ma ampanat ekat le anfun natef nani.”
24 Uisneno natae nak, “Amsanu nai, oke te amfani aum neu bale i mok Nai Harun. Mes Ana' fuat knino sin ma to kais anfin ekat he sin nem neu Kau. Kalu sin anfinin, nani of Au kas sin.” 25Oke te Nai Musa ansanu ma naeku nok to le nane ma natiaba Uisneno In fef ba'an neu sin.
Currently Selected:
KELUARAN 19: AOZ
Highlight
Copy
Compare
Share
Want to have your highlights saved across all your devices? Sign up or sign in
