KELUARAN 21
21
Lekat lulut neu ate-ate
(Ul. 15:12-18)
1Oke te Uisneno nakua a'an neu Nai Musa nak, “Amfe lekat lulut le i neu atoni Israel: 2Leka him sos ate mese na'ko hi uf anmes, in mes anmepu neu ki anbi ton ne in nanan. Anbi ton hitu mes hi mifetin in ma ka nabe'i fa he him baen sa'-sa'. 3Leka in fe ka mabia fa anbi leku in anfani ho ate, so in fenai kais nok anbi leku in anpoi. Mes kalu in anmafe nalali anbi leku in anfani ho ate, in fe nabe'i nokan. 4Leka in usif anmafeba in nok bife es, oke te in napeni anah, bife ma li'ana nane anfani in usif in-ini, ma ka nabe'i fa in nok ate nane anbi leku nafetin in. 5Mes leka ate nane naton nak in annek in fenai, in anah sin, ma in usif, ma kan lomi fa he nafetin in, 6in usif mes neki in neu bale luli besa. Anbi nane anlenu ate nane anhake ma nasnaiton anbi eno ai ni na'ko ume onen totis, ma in usif mes anposu ate nane in luken. Ma in anfani in ate anbi in neno monit.
7Kalu bife Ibrani in amaf nasosa in on ate, bife nane of ka nafetin fa anbi ton ne namsopu, nasuli nok ate-ate atoni. 8Leka in kan halin fa in usif in nekan le ansali hen mafe nokan, so nasosa nafani in neu in amnasi. Bife nane ka nabe'i he nasosa neu atoni anao amnemat, natuin in usif ka natis fa in manta'en, ma in ka naton fa amneot ma amnonot. 9Leka atoni mese ansos ate bife he nati' anmafeb nok in anah, ate bife nane mes anmo'e on in anah anmes. 10Kalu li'anmone nane anmafe anteni, in anmu'i sutais nabala he in anfe mnahat ma blua pake ma ale sa' onle in anmo'e neu in fenai ahunut. 11Leka in ka natis fa in sutais nane, so leko in nafetin in fenai nane ma kan simo fa baen.”
Lekat lulut antom mo'et maufinu
12“Sekau es antepo atoni bian talantia anmate, mes namate in amsa. 13Mes leka in kan sali fa neu hen tepo in, ma in kan sali fa he namate in, in nabe'i naen neu bale mese le of Au lek ani neu ko, ma in of mapanat anbi nane. 14Mes kalu atoni mese in nekan anmaputu ma in ansali he namate atoni bian, oke te in naen neu Au baki fuat he mapanat, atoni nane mes hi maiti ma mimate in.
15Sekau es antepo in amaf ai in ainaf mes mimate in.
16Sekau es nasik-babak atoni mese, mes mimate in, leka in nasosa nalali atoni nane ai atoni nane fe anbi in ume.
17Sekau es ansukat in amaf ai in ainaf, mes mimate in.
18Leka anbi mabanat mese atoni mese antepo atoni bian neki fatu ai antufu in mes ka namate in, in of ka napeni fa kasat. Kalu atoni le mabiso nane antup 19natuin bisot nane, mes namuni te in anfen ma nao anfani neki tias, atoni le anbiso in anpaloli talante naleko ma in an'op neune.
20Sekau es antepo in ate atoni ai in ate bife talantia anmate, in mes napeni kasat. 21Mes kalu ate nane kan mate fa anbi neno mese ai neno nua in nanan, ate nane in usif ka napeni fa kasat. Opat le in napoitan in ate nane namneku anfani on kasat neu in.
22Kalu atoni fauk-fauk anmabanan ma atoni mese na'ko sin natanbok neu bife a'aput mese talante in namofu li'ana, ma ka namen fa anbi aon bian, atoni nane of anbaen opat le in anaen onle in mone antoti ma alef lasi anlomi. 23Mes leka bife nane ansutai menas le mafena anesi, kasat neu atoni nane esle' smanaf anseka smanaf, 24mataf anseka mataf, nisif anseka nisif, nimaf anseka' nimaf, haef anseka haef, 25papa' anseka papa', papa' mamnotu anseka papa' mamnotu, fu'un anseka fu'un.
26Sekau antepo in ate matan talante anfolo, in mes nafetin ate nane anfani opat neu in matan. 27Kalu atoni mese antepo in ate talante in nisin nat'ipu, in mes nafetin ate nane anfani opat neu in nisin.”
Sutais neu ale atoni amu'it
28“Kalu bijae keso mese anfoti atoni mese talante anmate, mes anpoli bijae nane neki fatu talante anmate, ma in sisi ka nabe'i fa he miahan, ma atoni amu'it nane of ka napeni fa kasat. 29Kalu bijae keso nane in afotis kun, ma in usif nane napeni nalali amnauba, mes in kan panat fa mu'it nane, oke te leka bijae nane anfoti atoni mese talante anmate, mu'it nane mes anpoli neki fatu talante anmate, ma in usif amsa of namate nani. 30Mes leka bijae tuaf nane nabe'i in opat, in an op anmatom nok sutais hen soi nan in asmanan. 31Kalu le namate nane li'anmone ai li'anfeto, lekat le i anmatom nokan amsa. 32Kalu le namate nane ate atoni ai ate bife, bijae tuaf nane of an op noni muti bo'tenu neu ate nane in usif, ma bijae nane so anpoli neki fatu talante anmate.
33Sekau es naiti oe mata in toben ai anhani oe mata ma kan tobe fa, oke te bijae keso ai bikase luke mnanu, anmofu antam neu in nanan, 34oe mata nane in usif of an op neu mu'it nane in tuan, mes kais in naiti mu'it amates le nane. 35Kalu atoni mese' in bijae keso namate atoni bian bijae keso, mu'it tuaf nua en nane so sin nasosa mu'it le fe anmoni ma anbati in noni. So sin amsa anbati mu'it amates nane in sisi. 36Mes kalu sin nahin nalali nak bijae keso nane in afotis, ma in tuan kan panat fa, so in anseka neki bijae keso amonit, ma in nabe'i naiti mu'it amates nane neu in.”
Currently Selected:
KELUARAN 21: AOZ
Highlight
Copy
Compare
Share
Want to have your highlights saved across all your devices? Sign up or sign in
