2 CORINTIOS 12

Eyacuiñajjiya Pablo queahuiso bameecapoa oya jjacahuibaquiani jayojja ani

1Dejjacuana, eponacuana pea-ai jjabihuiaquica-ajja jamatii eya jjabihuiaquije so'o. Jjeya eyaya huohuije quiana ma Emeshimeseneiya e jjacahuibaquiani jayojja ani bameecapoa huisotiijo. 2Ecuea eba oe dejja Jesosaja epeejji.#12.2 Nota: Oya Pablo ojotii mimiani.* Yahuajonei 14 shequiajame huiso ejjayejjequijo nequi Eyacuiñajjiya oya dojosohuaquicapoa Eyahuasijje quea-aonee o aniyasijje. Ecuea bajjima a'a oya yamiñatii, a'a edojjoshahua pojja'a dojosohuaquicapoa, Eyacuiñajjija ca ebatii poani. 3-4Ecuea ebanei ma dejja e'ejojonei dojosohuaquicapoa quea-aonee Eyacuiñajjija meshi queapamenee aniyasijje. A'a yamiñatii pojja'a, a'a edojjoshahua pojja'a ecuea bajjima. Eyacuiñajjija ca ebatii. Majo nequiya ohuaya esohui queapameneenee jiquio dejjaja mimijjimanei shajja-ajjacapoa. 5Ma dejjajo eya queabihuinee mimije so'o miquiananijje jamatii eyanei ca ejjabihuiaquijji ecuea echacojo pojjeama poaje. Eya ca e ca'a-ama poani jjabameequijjicuanajo jjabihuiaquije. 6Bacue, eya jjabihuiaquisapomajje eya sapadojjoma' jayojja pojjeama pome eyaya esohui e'ejojonei añajojoya. Jamatii eya majo jjabihuiaquiajja. Eya Eyacuiñajjijo queapamenee chacochacopoquiani esohui queaja'anee huohuiaña queahuisocuanajo jjabameequisapoani eyanei jjabihuiaquianijo pojjeama. Jamajjeya queahuisocuaa eya queaca'anee nequiani pea dejjacuana jayojja jama pojjeama bacaje. 7E'ejojonei Eyacuiñajjiya eya queahuiso bameecapoa esohui queapamenee eya jjacahuibaquiani jayojja ani. Jamajjeya eyanei queapame queaca'anee ejjabaqui poanijje majoya Eyacuiñajjiya ebionei eshahua Satanás bajjani eya queanee ameecanaje eya majo ejjabihuiaqui poanijje. Maaya eya queaneetii pomeecani ecue yamijo ebionei eshahua Satanás bajjaniya. Jamaya Eyacuiñajjiya ameecanaje eyanei queaca'a poani ejjabaqui poanijje. 8Jamajojoya eya tres mimime poanaje Emeshimeseneinijje majoya oja e neeama epomee'yojji nishojo. 9Emeshimeseneiya ca eya jama acanaje esohuiquipajje ba'a: “Ecuea miya ehuaquiamee'yojji pojjeama poaje. Eyaya mi ca ecueanei ejjashahuabaquijjijo queaca'a nequimeepoquiaje jamatii miya queaneetii ba'e. Miyaneitii ca'a-ama poani jjabaquimajje eya queaca'anee mi asahuapoquiajji poani baje” jamaya eya acanaje. Jamajjeya eya jjabihuiaquipoquije jiquio e ca'a-ama poani jjabameequijjicuanajo. Jama pomajjeya eya Quitojo queaca'a ba'epoquije, ejotii pojjeama. 10Jamajjeya eya queabihui poani eya ca'a-ama poani jjabaquimajje. Eya queacamajanee acanijo, queanee pomeecanijo, bobi, daquicuana ecuea chamajo, ejo jjamata-aquianicuana shajja-ajjamajje pea-ai, jamatii eya chacochacopoquianitii queabihui. Jiquio e queacamajanee acani cuaa Quitojo jjabaquimajje jamatii eya queabihui poani. Eyanei ca'a-ama poani jjabaquimajje majoya eya Quitojo queaca'a nequipoquije.

11Bacue, eya sapadojjoma' jayojja miminaje eyatii jjabihuiaquiani jjabaquimajje. Miquiaaya ca eya jama mimime pomeenaje. Miquianaya caca oe e queapame chacochacopoquianijo queabihui mimicajji poanaje peacuananijje, eyanei pojjeama. Ma jjabaquiani Eyacuiñajjija babaca dejjacuana ona sohuihuohuiquinequijji queapame poani miquianajaya meshijo nequi, jama pea-aiya eya poani. ¡Eya caca peajja pojjeama! 12Eyacuiñajjiya eya jama nequimeecapoa bamajje miquianaja ecojjaa queaja'a bacajji poanaje eya e'ejojonei oja babaca poani ona sohuihuohuiquinequijji epojji. Eya ma onaa queacamajanee acapoquianitii eya chacochacopajeajjimatii nequipoquiapoa. Miquianaja meshijo nequiya eyaya dejjaja ajjima'neinei queahuiso apoquiapoa. Eyacuiñajjiya eya queaca'anee pomeecapoa oja echacojji eapoquiajji. 13E'e pojja'a becacuana jama poani ejo ba'a: “Pablohua Jesosaja epeejjicuana pea meshijo ba'eca queahuiso sohuihuohuicapoquiani, ecuana Corinto meshijo ba'eca ca oepojjinei.” Chojja, jama pojjeama eyaya Jesosaja epeejjicuana queahuiso sohuihuohuipoquiaña. Miquianajaya bejjo ecuea huohuiajjajjima poa. Jamajjeya quiana oe a'a queaquene pojji enijje eya bejjo mihuohuiajjajje.

Pablohua huohuicanaje o poquio'oyajjijo oja meshiyasijje

14Eya apoa epo nequi epoquio'oyajji miquianaque, tres poquime huiso poaje. Ecuea miquiana queacamaja epomeejji pojjeama poaje bobijo. Miquianaja aquiana, bejjocuana ehuohuiajjajji pojjeama poaje. Majo pojjeama eya poquije, miquiana bao'oyaa ca eya poquije. Bacue, echiimesecuaa oja bacuacuana jaahuanacani, bejjo quiacani pea-ai. Ebacuacuana ca oja chii jaahuana-ajja, bejjo quia-ajja. Eya ca iña miquianaja chii jayojja jjabaquiani. 15Eyaya quiana huohuineisa-aña queaja'a eba'epoquijji. Bacue, eyaya ojjaña ecuea bejjo queabihuiya jeajeame miquiana asahuajjijo. Ojjaña pojjajo queacamaja chacochacopoquime miquiana ba'emeesahuajjijo. E'ejojonei ecuea quiana queajeaneetii popoquiani. Eya jama poanijo, ¿yajjajo shai quiaa eya jjeya queajeapishana aña?

16Miquianaya e'e poaje ecuea miquiana bejjojo bobicuanajo pea-ai huohuiajjajjima poanaje. Jamatii pa ca beca mimiani ejo ba'a: “Pablohua ecuanaja bejjo chichameecanaje siajje pomajje ojayanei ya'yojji.” 17¿A'a ecue huoojea dejjacuaa miquianajaya chicha bejjo quehuadojocanaje ecueanei yajji? ¿A'a ohuaya quiana siajje aquicanaje? Chojja. 18Eyaya Tito huohuiajjanaje miquianaque epoquijji. Onijjetii eyaya pea Jesosaja epeejji huoojeapea-ainaje. ¿A'a acuae quiana Titohua siajje aquicanaje? Chojja. Bacue, eya, Tito pea-ai oya jjashahuabaquime poanaje miquiana asahuajjijo. Ecuana caca Quitojo queapame chacochacopoquiani.

19E'e pojja'a miquiana jjashahuabaquiani ecuana jama mimime poanijo ejjanahuequijji achajja ecuana chacochacopoquiani. Jamajo pojjeama. Ecuana ca jama mimime poani Eyacuiñajjija ebajji ecuana Quitonijje ojee nequipoquiani ojaya'yo, Jesosaja epeejjicuana ecue dohue ecue jjo'i poani. Ecuana jama mimime poani miquianaya Jesosaja epeejjicuana queaca'a eba'epoquijjijo. 20Jjeya eya queayenopishana poani quijje miquianaque poquio'oyamajje beca quiana queaja'a pojjeama ba'e'yo eyaya bañaquije. Eya beca quiana jama ba'e'yo bañaquisapo-ajja. Miquianaya pojja'a e basapo-ajja poaje ache esohui e mimije miquiana queaquehua ba'e'yojo shajja-ajjamajje. E'e pojja'a beca quiana oya jjashahuabaquime pojjeama poani Eyacuiñajjija esohuijo. Peaja aquianacuana pojja'a becaa quiaa jeabaña, quenequenecuajiani pojja'a quiana. Pea quiana ca jjabihuiaquipoquiani pojja'a, quehuajje jjaniñebaquiani quiana pojja'a, quehuajje esohui queatai aña becaa quiaa pojja'a. Miquianayaneitii queaca'a jjabaquiani pojja'a, beca quiana ca jjachichaquimajje queashajjaquijjonee ojee mimiani pea-ai pojja'a. Majoya eya queayeno poaje beca quiana jama po'yani baquimajje. 21Eya queayenopishana poani pea-ai quijje miquianaque poquio'oyajo Eyacuiñajjiya eya queabicho pomeecaje miquianajo jama queaquehua ba'e'yo baquimajje. Ohuaya eya queayenonee pomeecaje majoya. Eya paneije beca quiana queaba'ihuiso queamimishitii ba'epoqui'yani baquimajje. Queatainee jjashahuabaquianitii beca quiana peajo ejjacojjoquijjijo, peaja yamijo ejjanapaquijjijo pea-ai. Ma mimishicuana yajjijo beca quiana queabicho po-ajjanei poani.

Currently Selected:

2 CORINTIOS 12: ESE

Highlight

Compare

Copy