2 CORINTIOS 13
13
Oe-ejjenei esohui ehuohuijji acanaje Pablohua
1Jiquio eya poquije o'oya tres poquime huiso poaje miquianaque esohuihuohuiya, achajja miquiana ba'e baa pea-ai. Eyacuiñajjija esohui yahuajonei etehue jaa jama poani ba'a: “Jjachichaquiajo ache queamimishi ba'yani ebajji, beca dejjaa, tres pojja'a o bajji epohua oya queaja'a huohuicajji oja mimishi ojjaña anicajo.” 2Ma yahuajo eya beca poquime poanajejo miquianaque, eyaya ma queamimishi ba'yanicuana tecueanaje. Jjeya ca eya queahuesha nequi so'o, jamatii oya esohuitiiya huohuiaña joya queamimishi'yo ba'ecuana. Miquiananijje oya jjachichaquipoquiajo eyaya oya jeacuayaje o jjabahuejjaquijji oja mimishijo miquianaque poquimajje. 3Miquiaaya eya shajja-ajjasa-aña ecueanei ejjashahuabaquijji pojjeama eya quiana huohuije. Jamajjeya eya jjabameequije miquianajo e'ejojonei Quitohua eya esohui huohuimeesahuacani. Bacue, Quito queaca'aneetii. Jamajjeya oya queaca'aneetii poani baje quiaa eya ma queamimishitii poanicuana jeacuayaje bamajje. 4E'ejojonei Quito acui ecuiata'apeejo mano'yapoa Dejjapojji epo ca'a-ama. Jjeya ca oya Eyacuiñajji queaca'aneetiija shequimee'yo nequi. Oya jayojja pea-ai ecuana jjabaquiani ca'a-ama poani. Quitonijjetii ejjapeequi nequi ca Eyacuiñajjiya ecuana queaca'anee pomeecaje quijje ma ecuana peajja ajji poanicuana saja-ajji queaja'a.
5Jjabaquicue quiana oe a'a queaja'a jjashahuabaquipoquiani Eyacuiñajjija esohuijo. Achajja ba'epoquiani jjabaquicue oe. Miquianajaya shahuabacajjitii poanaje e'ejojonei Jesosa Quito miquiananijjetii nequipoquiani. E'e pojja'a beca quiana jjabaquinaje ojaya'yo pojjeama, siajjepojjitii ba'epoquiani. 6Ecuana ca e'ejojonei queaja'a ba'epoquiani jjabaquinaje. Jamaya ecuana jjabameequisapoani pea-ai miquianajo. 7Ecuana Eyacuiñajjinijje mimipoquiani miquianaya queamimishi eba'epoqui poanijje. A'a ecuana bacani cuaa oja babaca nequi queapame chacochacoani, a'a queapame pojjeama pojja'a bacani cuaa, majo pojjeama ecuana mimipoquiani Eyacuiñajjinijje. Becacuaa ecuana oja babaca e'ejojonei pojjeama poso acani jamatii ecuana mimipoquianitii miquianaya queaja'a eba'epoquijjijo. 8Eyacuiñajjija esohui queapamenee Quitojo ecuanaja pea huohuimeejjima aca-ajja, pea esohui aca'yoajja pea-ai ecuanaja. Oja esohui queapamenee Quitojo ecuaa caca oe huohuisa-añatii cuana, mahuisotiiya. 9E'e pojja'a ecuana ca'a-ama poani baña quiaa. Jamatii ecuana queabihui poaje miquianaya esohuijo queaca'a tiipoquije bamajje. Jamajjeya ecuana mimipoquijetii miquianaya queaca'a ba'epoquijjijo Eyacuiñajjija esohuijo. 10Eyaya jiquio esohui tehueaña miquianaque poquijjimahuaa. Quijje eya miquianaque poquimajje janobajjimanei pojjeama esohui huohuiñaquije miquiaaya eya shajja-ajjaje. Dejja etii poani queamimica'anee jamaa pojjeama huohuiñaquije quiana. E'ejojonei eya Emeshimeseneija babaca nequiani miquiana Jesosaja epeejji ojee jjachichaquipoquianicuana queaca'a etiimeesahuajjijo. Eya nequimeecani miquiana ejjachichapajeameequi'yojjijo pojjeama.
Esohui oe-ejjenei
11Jiquio ecuea oe-ejjenei esohui ehuohuijji. Queaja'anee oe ba'esapopoquicue jiquio ecua eyaya esohui huohuiaña jayojja. Queabihui ba'epoquicue pea-ai. Miquiananijje ba'e Jesosaja epeejjinijje mimiquicue o yenoama pomee'yojji. Oya jjashahuabaquime pea-ai esohuijo ba'epoquicue queaquijijjijajinee. Eyacuiñajjija quiana queajeaneetii poani. Ohuaya quiana queaquijijjijajinee pomeecani. Maya oya miquiananijjetii nequipoquiani. 12Miquianaja meshijo ba'e Jesosaja epeejjicuana poeje bamajje shemo tojjocue o queapame ajjequijji.
13Queahuiso Jesosaja epeejjicuaa jiquiojo enijje nequiya esohui miquiana queabihui pojji huoojeacani. 14Emeshimesenei Jesosa Quitohua quiana ojayanei ejjashahuabaquijjijo queapamenee ca-acapoquiahuatii. Eyacuiñajjiya quiana queajeaneetii acani jjabaquimajje jjashahuabaquipoquicuetii ojo. Edojjoshahuapameya eseya queabihui pea Jesosaja epeejjicuananijje cajjapeemeequicapoquiahuatii. Mahuiso ecue tehue.
Currently Selected:
2 CORINTIOS 13: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
