2 CORINTIOS 11

Esohuihuohuijjinishocuanajo Pablohua tehuecapoa

1Jiquio jjeya eya tehueaña esohui baneineicue, jamatii quiaa eya sapadojjoma' jayojja mimiani aje pojja'a. Eya oe che shajja-ajjacue quiaa. 2Bacue, ecuea miquianaya queanahue poani. Jamaya Eyacuiñajjiya eya jjashahuabameequicanaje miquianajo. Eyaya quiana sohuihuohuineinaje Jesosa Quitojonei ejjashahuabaqui'yojji. Miquiana ojayanei epo'yojjijo eya jjashahuabaquipoquianitii. Joya ecua dejjaa epona queapame peanijje jaajjimanei ani sacani quijje ehuanajji onijje queabihui eba'epoquijji, jamaya eyaya quiana queaja'a ba'emeesa-aña Quitonijje queapame ejjapeequipoquijji ojee. 3Jamatii eya queayeno jjashahuabaquiani miquianajo. Ma ecua yahuajonei edosiquiaa peyoja yamiyasijje nobiquimajje Eva dasiacapoa oja esohui siajjejo, jama pea-aiya quiana jjeya jjadasiameequichana oja esohui siajjejo Quitonijje ejjapeepajeaqui'yojji. Esohuihuohuijjinishocuaa miquianaya Quitojo ejjashahuabapajeaqui'yojji dasiacachana. Jama jjapomeequimajje Quito queajea apajeaje'yo quiaa. 4Ma queaquehua pea esohui a'yojji poanicuana Jesosajo miquiaaya jamatiiya oja esohui shajja-ajjaña queabihuineeya, ehuiyasijje oya nequimeeaña pea-ai. Ma ecuaa huohuineinaje esohui Jesosajo jama pojjeama comaaya huohuicani, pea. Ma queaquehuanee mimianicuana Edojjoshahuapamejo jamatiiya jjequinobiaña quiaa. Eyacuiñajjija quia Edojjoshahuapame miquianajaya eyamijo enequijji pojjeamajo ohuaya huohuicani. Macuaaya esohui queapame Quitojo pea esohui aca'yani ma ecua miquianaya ebionei jjashahuabaqui'yonaje jama pojjeama, pea. Jamatii queabihuiya quiaa oya shajja-ajjaña. 5E'e bacue, eya jjabaquiani queapame chacochacopoquiani Eyacuiñajjija babaca ma peacuana jjabaquiani Eyacuiñajjija babaca pea-ai ona sohuihuohuiquinequijji poani jayojja. Ma dejjacuaa acani cuana queapamenee chacochacoani. Eya pea-ai queapame chacochacoani jjabaquiani, peajja pojjeama. 6Eya esohui ona ejjachichaqui anijo janobajjimanei huohuicuajiajja, jamatii ecuea Eyacuiñajjija esohui ebanei ehuohuipoquiajji. Ojjaña ecuanaja chaco queapame apoquianaje, jamajjeya Eyacuiñajjija esohui ecuanaja ebanei ehuohuijji.

7Ecuea miquianaque Eyacuiñajjija esohui queapame Quitojo huohuiya poquimajje miquianaja bejjo huohuiajjajjima poa. Eya ca oe jjabaquiapoa miquiana asahuajji poani jamatii sosema'. Miquianaya jjeya queaja'a ba'epoquiani bacaje Eyacuiñajjiya majoya ecue chacojoya. ¿A'a eya jama poa queamimishi? Chojja de. 8Ecuea miquianaya bejjo huohuiajjajjima poa. Eyaya ca pea meshicuanajo ba'eca Jesosaja epeejjicuana esohuijo jjachichaquipoquianija bejjo jjesheapoa. Jamatii ecuea ma meshijo sohuihuohuijjimaa oja bejjo jjesheapoa miquianaque epoquijji miquiana sohuihuohuiya. Miquiananijje echacochacojji eyaya bejjo jjesheapoa, miquianaja quia bejjo pojjeama. 9Majoya aje quijje Jesosaja epeejjicuanaja quia bejjo bobi jjeshejji quiajeyo'yomajje eya miquianaja meshijo nequiapoa aema', bejjoma' pea-ai. Jamatii nequija ecuea miquiana huohuiajjajjimatii poa bobijo, bejjojo pea-ai. Ma ca pea Jesosaja epeejjicuaa Macedonia meshijo nequi poeya eya asahuacañapoa, bejjo quiacañapoa pea-ai. Ecuea quiana ca queacamaja pomeejjima poa bobijo. Jjeya pea-aiya quiana ecuea ehuohuiajjajji pojjeamatii poaje bobijo, bejjojo. 10Quito caca siajje po-ajjaneinei. Jamajjeya eyaya esohui e'ejojonei aña siajje pojjeama ojaya epeejji poaniyajjejojoya. Eya queabihui mimipoquianitii ecuea echacojo Quitojo. Ojjaña provincia Acaya meshijo ba'ecacuanaja jiquio eya mimiani ecue chacojo macuanaja e'ejojonei pojjeama poani aca-ajja. 11¿Yajjajo shai ecuea quiana huohuiajjajjima poa bejjojo, aquianacuanajo pea-ai? ¿A'a ecuea miquianaya botiama poanajejojoya mihuohuiajjapoa bejjojo? Chojja, majo pojjeama. Eyacuiñajjija ebatii ecuea quiana queajeanee poani.

12Eya queapame chacochacopoquijetii jamatii miquianajaya bejjo jjeshepojjima' nequi. Peacuana Eyacuiñajjija esohuihuohuijjinisho poanicuana queapamenee chacochacoani jjabaquiani miquianaja meshijo nequi. Ma dejjacuanaya pa jiquio ecua eya quiajja pea-aiya chacochacoani Eyacuiñajjijo. Chojja de, macuana ca sosemajo chacochacoajja. Bejjo sosejje macuaaya sohuihuohuicani. Eya ca iña jama posapo-ajjanei. 13Ma dejjacuana e'ejojonei Eyacuiñajjija babaca pojjeama ona sohuihuohuiquinequijji epojji, siajjepojji ca oya. Jamatii macuana Quitoja babaca poani jjabameequiani queahuisocuanajo. 14Ma dejjacuanaya jamaya nequiani peacuana dasiajji jiquio ecua ebionei eshahua Satanás bajjaniya queahuiso dasiacapoquianitii cuana jama pea-aiya. Eshahuaa siajje acani cuana oya Eyacuiñajjija ángel queajeaja'a poeyanaje poso onaja yajji. 15Jamajjeya oe a'a ma dejjacuanajo jjadasiameequijji. Ebionei eshahua Satanás bajjanija epeejjicuana oja huoojea poeani queapame Eyacuiñajjija huoojeanei jayojja. Macuanaya siajje poani jamatii queapame jayojja ba'epoquiani mimishiama peacuanaja oya ebajji. Comacuanaya queaneeneetii pomeecaje'yo Eyacuiñajjiya oja mimishijo quijje.

Pablo oja eba'ejjijo jjabihuiaquicajji poanaje

16A'a quiaa eya sapadojjoma' jayojja mimiani poso ajji. Eya sapadojjoma' jayojja mimiani bamajje jamatii eya mimimeesocue quiaa. Jjeya eya oepojji jjabihuiaquije ecuea eba'ejjijo. 17Jiquio jjeya eya mimije esohui Emeshimeseneija huohuimeejo pojjeama. Ecueanei ejjashahuabaquijjijo ca mimije sapadojjoma' jayojja ejjabihuiaquijji so'o. 18Esohuihuohuijjinisho poanicuana jjabihuiaquiani ojaya echacojo joya ecua Eyacuiñajjima'cuaa acani jama pea-aiya peacuanaja oya ebajji. Jamajjeya eya pea-ai jjabihuiaquije so'o peacuanaja eya ebajji. 19Miquianaya queasapaja'anee poani jjabaquiani jamatii ma sapadojjoma' jayojja huohuicani dejjacuaa shajja-ajjapoquiaña quiaa. Jama quiana queapame pojjeama poani. 20Jjabaquicue quiana oe, miquiaaya shajja-ajjaña joya emiquianamese posapoanija esohui. Ma dejjacuana jjabihuiaquipoquijji poani, miquiana dasiajji poani, miquiana peajja jayojja ajji poani, miquiana mata-ajji poani pea-ai, jamatii oja esohui shajja-ajjaña quiaa. 21Beshahuanei eya esohui jama huohuisapo-ajja poani ba'a: “Ecuana pa ca'a-ama poani emiquianamese jama ejjapomeequijji.” Chojja, jama poca-ajja. Bacue, ecuana sapadojjoma' jayojja pome jama jjabihuiaquime pomajje. Ma dejjacuana miquiananijje nequi jjabihuiaqui poanijojoya eya pea-ai jjabihuiaquije. 22¿A'a pa ma dejjacuana hebreo dejja poani? Eya pea-ai hebreo dejja. ¿A'a pa ma dejjacuana israelita poani? Eya pea-ai israelita poani. ¿A'a pa ma dejjacuana Abrahamja osecua? Eya pea-ai Abrahamja osecua. 23¿A'a pa ma dejjacuana Quitojo chacochacoani? Eya pea-ai Quitojo chacochacopoquiani queapamenee oya jama pojjeama. Eya pojja'a sapadojjoma' jayojja mimiani ejjabihuiaquijji, jamatii eya shajja-ajjasocue quiaa. Eya pea meshicuanahuasijje queahuiso chacochacopoquinaje Quitojo, ma dejjacuana ca jama pojjeama. Eya queahuiso jeanobiameecapoa cuaa ejjajeanobiaquijji equiyasijje oja esohuijo, ma dejjacuana ca jama ajjima'. Eya queahuiso cuianeineicapoa cuaa oja esohuijo, ma dejjacuana ca jama ajjima'. Beshahuanei eya manomeeca'yapoa dejjamasecuaa queahuiso, ma dejjacuana ca jama ajjima'. 24Bacue, judío dejja etiicuaa cinco huisome meshijo nequiya eya cuiasejjajeameeme acapoa jjono ejeapashajjajjaa. Oe meshijo oe cuiajo treinta y nueve huisome cuiasejjajeame ameecapoa etiicuaa ma pojjajotii. Jamaya eya acapoquiapoa cinco huisome meshicuanajo. 25Tres huisome meshijo nequi eya cuianeineicapoa cuaa acuiya. Oe jajahuejjajeame eya acapoa cuaa meiya. Ma e besapoquijji ponequiapoa bishe'ai tres huisome jaanobijeaquiapoa bae-ai enaojjohuasijje. Beshahuanei eya hui'i'yapoa. Oe bishe'ai jaanobijeaquiajo eya jamatii jjeejjeeba'e'yapoa enaojjojo oe mecajje oe epojjajo pea-ai. 26Eya queahuiso meshicuanahuasijje poquinequiapoa. Cueicuana johui queaquemo eoquejo besapoquiapoa. Eya ejeojjijje siipojjicuana nequijje jjayejjequiapoa. Enijjejaajji judiocuana quenequenecuajiapoa enijje. Peajaajjicuaa botiamanei eya acapoa pea-ai. Eya queacamajanee acapoa. Eya queacamajanee acapoquiapoa cuaa ciudadjo nequi, ma oepojji dejjacuana nequi meshijo pea-ai. Bae-ai enajje besapoquianijo queacamajanee poa. Jesosaja epeejjinishocuaa eya botiamanei acapoquiapoa pea-ai. 27Eya chacochacomajamajanequiapoa queahuisonee bobi jjeshejjijo. Queamecahuiso eya jamatii jjapojjaquiapoa cahuijjimatii. Eya queashoenee, queanabataja pea-ai nequiapoa. Queahuiso epojjajo eya jamatii chacochacoapoa bobi ijjiapojjima'tii nequi. Eya queahuoejo queacamajanee ponequiapoa. Ecuea daquimoo pea chama' poa ehuoshojji queahuoejo.

28Mahuisojoneitii pojjeama eya queacamaja nequipoquiani. Eya ojjaña pojjajo jjashahuabaquipoquianitii achajja Jesosaja epeejji queahuiso meshicuanajo jjachichaquipoquianicuana ba'epoquiani. A'a esohuijo queaca'a tiipoquiani jjachichaquimajje eya majo pea-ai jjashahuabaquiani queahuiso. 29Oe Jesosaja epeejji ca'a-ama poani bamajje eya pea-ai jjabaquiani ca'a-ama o asahuajji epojji. Pea dejjaa Jesosaja epeejji queamimishi pomeecaje bamajje eya queayenonee poani. Eya queaquene poani pea-ai ma o queamimishi pomeejji poaninijje. 30Bacue, eya jjabihuiaquiajja Eyacuiñajjija echacojji queapame añajo. Eya ca jjabihuiaquije ma e ca'a-ama poani jjabameequijjicuanajo, e queacamaja pomeejjicuanajo pea-ai. 31Eyacuiñajji esejaya Emeshimesenei Jesosa Quitoja Chii bihuiacapoquijjitii ojjañacuaa. Ohuaya eya bacanitii eya siajje po-ajja. 32Yahuajo eya ciudad Damasco meshijo nequijo emeshimese Aretas bajjanija nequimee etii poani dejjaa soldadocuana nequimeecapoa oja ciudad esecuejjani cuayaquijjijje e majje cuayaquiajo e iñajjequijji nisho. 33Ma meshijo nequipea-aipoa Jesosaja epeejjicuana. Oja eshaja-aijo biomajje eya quehuajje jeaoqueacapoa cuaa esecuejjanisisijje eyajje queahueshapishana esecueyasijje. Jamaya eya quehuapoquiapoa soldadocuanaja eya iñajjimatii.

Currently Selected:

2 CORINTIOS 11: ESE

Highlight

Compare

Copy