1 JUAN 5

Jesosaja epeejjicuaa jiquio meshijo nequicaja ejjashahuabaquijji cajaa acapoqui'yani

1Ojjaña joya Jesosajo e'ejojonei Eyacuiñajjija huoojea ese nahue'yojji poanijo jjashahuabaqui'yanicuana Eyacuiñajjija bacua poani ojaya'yo. Bacue, eseyaya oe dejja echiimese queajea amajje oja bacuacuana queajea apea-aije. 2Jamajjeya eseya Eyacuiñajji queajea asapomajje, oja esohuijo jjashajja-ajjaquisapomajje, esenijje Jesosaja epeejji oja bacuacuana queajea apoquiaje. 3Eyacuiñajji seja queajea acapoquijji jama ba'a: Oja esohui etehuecuanajo se jjashajja-ajjaquicapoquijji. Oja esohui etehuecuana queacamajanee pojjeama poani oya jayojja eba'epoquijji. 4Bacue, ojjaña joya e'ejojonei Eyacuiñajjija bacua ojaya'yo poanicuaa jiquio meshijo nequica dejjaja ejjashahuabaquijji queamimishi cajaanei acapoqui'yani. Jamajjeya joya oja esohuijo queaja'a jjashahuabaquianiya jiquio meshijo nequicaja ejjashahuabaquijji queamimishi cajaa acapoqui'yani. 5¿Acheya jiquio meshijo nequicaja ejjashahuabaquijji queamimishi cajaa acaje'yo? Ojjaña joya Jesosajo e'ejojonei jjashahuabaquica'yanicuaa mahuisohuaneiya. Eyacuiñajjija bacua poanicuaa jiquio meshijo nequicaja ejjashahuabaquijji queamimishi cajaa acapoqui'yani.

E'ejojonei Jesosa Eyacuiñajjija Bacuaejja poani

6Yahuajonei Jesosa Quito poeapoa. Oya enaojjohuasijje jjaiñajeanobiameequiapoa queahuisocuanaja ebajji. Ohuaya oja na' cuayameequica'yapoa pea-ai. Jamajjeya oya enaojjohuasijjenei iñajeanobia pojjeama poa, ohuaya oja na' cuayameepea-aiquicapoa. Eyacuiñajjija Edojjoshahuapameya ma esohui Jesosajo queaja'a bameesahuacapoquiani cuana, oya siajje po-ajjanei. 7Enequi tres Jesosa Quitojo queaja'a huohuipoquiajji poani. 8Mahuiso ojo queaja'a huohuipoquiajji poani ba'a: Edojjoshahuapame, enaojjo ma o jjaiñajeanobiameequiapoa enajo, oja ena' pea-ai ma ohua cuayameequica'yapoa acui ecuiata'apeejo. Jiquio tres Jesosajo oya esohui pea-aiya huohuicani. 9Eseyaya esenijje dejjaja esohui shajja-ajjamajje e'ejojonei poani baña. Eyacuiñajjija esohui caca oe queapameneenee poani, jamajjeya shajja-ajjaneicapoquijji. Majoya eseyaya Jesosa Quito e'ejojonei Eyacuiñajjija Bacuaejja poani baña oja esohui queapamenee Jesosajo shajja-ajjamajje. 10Joya Eyacuiñajjija Bacuaejjajo jjashahuabaqui'yanicuana Eyacuiñajjija esohuijji ba'epoquiani, oja sapajo huanacapoquiani. Joya Eyacuiñajjijo jjashahuabaquiajjanei cuaa ca Eyacuiñajji siajjepojji jayojja acani oja quia esohui Jesosa Quitojo ohua e'ejojonei pojjeama poso acaniyajjejojoya. 11Jiquio oja quia esohuiya eseya queaja'a huohuicani Eyacuiñajjiya oja Bacuaejjajo jama poani ba'a: Eyacuiñajjiya eseya ba'etiitiimeecaje'yo onijje Eyahuasijje oja Bacuaejjajo. 12Jamajjeya ojjaña joya Eyacuiñajjija Bacuaejjajo jjashahuabaqui'yanicuana ba'etiitiije'yo onijje Eyahuasijje. Joya Eyacuiñajjija Bacuaejjajo jjashahuabaquiajjacuana ca Eyacuiñajjinijje eba'etiitii'yojji pojjeamatii poaje.

Oe-ejjenei esohui ehuohuijji tehuecapoa

13Eyaya quiana ojjaña joya Eyacuiñajjija Bacuaejjajo jjashahuabaqui'yanicuana jiquio esohui tehueaña miquianajaya queaja'a ebajji e'ejojonei ba'etiitiije'yo quiana onijje Eyahuasijje quijje.

14Jamajjeya eseya jjeya meteama Eyacuiñajjinijje mimipoquiani. Esejaya eba eseya oja ejjashahuabaquijji jayojja mimime poajo ohuaya shajja-ajjacani. 15Jamaya eseya jjabaquiani Eyacuiñajjiya eseja mimicuana shajja-ajjacani. Esejaya eba pea-ai ohuaya eseja mimi jayojja acapoquije.

16Oe Jesosaja epeejji queamimishi poani bamajje mimicue ojo Eyacuiñajjinijje jamatii ma mimishijo oya ejjasejjaquitii pojjeama poaje. Majoya Eyacuiñajjiya oya eshetii nequimeecaje ma oja mimishijo ojaya oya emanomee'yojji pojjeama poaje. Bacue, enequi pea mimishi ese oja manomee'yojji poani. Jamajjeya dejja jama queamimishi poajo mimica-ajja Eyacuiñajjinijje ojo. 17Ojjaña joya Eyacuiñajjija esohui jama pojjeama poani queamimishi. Enequi mimishi ese manomee'yojji epojji pojjeama.

18Esejaya eba ojjaña joya Eyacuiñajjija bacua poani ojaya'yocuana queamimishitii ba'epoqui'yoajja Eyacuiñajjija Bacuaejjaa oya nahuecapoquianijjejojoya. Jamajjeya oya edosiquianaja queamimishitii epomeepoquiajji pojjeama po'yani. 19Eseya queaja'a jjabaquiani Eyacuiñajjija'yo poani. Esejaya eba ojjaña jiquio meshijo ba'ecacuana edosiquiaa huoojeacapoquiani queamimishitii epojji. 20Esejaya eba pea-ai Eyacuiñajjija Bacuaejja jiquio meshiyasijje poeapoa. Ohuaya eseya queaja'a jjashahuabameequicanaje Eyacuiñajji e'ejojonei poaninijje ejjapeequipoquijji. Jamajjeya se Eyacuiñajji e'ejojonei poaninijje ba'epoqui'yani, oja Bacuaejjanijje pea-ai ojaya'yo. Jesosa Quito e'ejojonei Eyacuiñajji poani. Maaya eseya ba'etiitiimeecaje'yo onijje Eyahuasijje. 21Ecue bacuanei jayojja quiana poani Quitojo. Jjajaahuananeiquipoquicue quiana oe. A'a eyacuiñajjinisho dejjaja ne bihuiajji. A'a e'ejojonei poso ajji.

Currently Selected:

1 JUAN 5: ESE

Highlight

Compare

Copy