1 JUAN 4

Eyacuiñajjija esohuijo, esohuihuohuijji siajjepojjijo pea-ai tehuecapoa

1Ecue dohuecuana jjo'icuana Quitojo, ecuea quiana queajeanee poani, jamajjeya eyaya quiana huohuiaña. A'a ojjañatii Edojjoshuahuapameja quia esohui ajji poanicuana e'ejojonei oja huoojeanei poso ajji quiaa. Ebionei oja ye esohui shajja-ajjaneicue so'o ebajji a'a e'ejojonei ohuaya esohui queapame huohuicani. Queahuisonee epoqui esohuihuohuijji siajjepojjicuana Eyacuiñajjija huoojeanisho poani. 2Jamajjeya miquianajaya bacajji ache dejja e'ejojonei Edojjoshahuapameja quia esohui yejji poani. Ojjaña joya Jesosa Quito e'ejojonei dejjapojji epo yamijji poeapoa jiquio meshiyasijje huohuijji poanicuana comaya caca e'ejojonei Eyacuiñajjija Edojjoshahuapameja quia esohui yejji poani. 3Ojjaña joya jama esohui queapame Jesosajo huohuime po-ajjacuana caca Eyacuiñajjija Edojjoshahuapameja quia esohui yejji pojjeama. Macuana Jesosa Quito sapo-ajjanei poanija ejjashahuabaquijji poani. Miquianaja eshajja-ajja jama queaquehuanee jjashahuabaquime poaje cuana quijje Quitojo. Jjeya caca jamaya jjashahuabaquiani cuana Quitojo o sapo-ajjanei ba'e.

4Ecue bacuanei jayojja quiana poani, Eyacuiñajjija'yo poani. Ma esohuihuohuijji siajjepojjicuanajo miquiana jjeya jjadasiameequi'yoajja poani Eyacuiñajjija nequimee miquianaja eyamijo oja Edojjoshahuapame queaca'anee poanijojoya. Jiquio meshijo nequica edosiquiana ca jama pea-ai pojjeama, iyeca'aca'a oya poani. 5Dejjacuana eponacuana Eyacuiñajjima' jayojja ba'eca ojayanei ejjashahuabaquijjijotii ba'epoquiani, majoneitiiya mimipoquiani. Majoya jiquio meshijo ba'eca oja epeejji poanicuaa ojaya ejjashahuabaquijji shajja-ajjacapoquiani. 6Ecuana caca oe Eyacuiñajjija'yo poani. Joya Eyacuiñajjinijje jjapeequipoquianicuaa ecuanaja esohui shajja-ajjacani. Joya Eyacuiñajjima' jayojja ba'eca ca ecuanaja huohui esohui shajja-ajjasapo-ajjanei poani. Majoya ecuaa queaja'a baña acheya esohui e'ejojonei Edojjoshahuapameja quia huohuicani, acheya eshahuaja esohui peacuana dasiajji huohuicani baña.

Eyacuiñajjiya ojjañacuana queajeanee acapoquiani

7Ecue dohuecuana jjo'icuana, esenijje ba'eca Jesosaja epeejjicuana queajeanee acapoquijji Eyacuiñajjiya eseya peacuana queajeanee ameesahuacaniyajjejojo. Ojjaña joya peacuana queajea apoquiajji poanicuana e'ejojonei Eyacuiñajjija bacua poani, ojjaña macuanaya onijje jjapeequipoquiani. 8Joya peacuana queajea a-ajja poanicuana caca Eyacuiñajjijo jjashahuabaquiajjanei poani. E'e, Eyacuiñajjiya ojjaña meshijo ba'ecacuana queajeanee acapoquiani. 9¿Yajjajo jjabaquicajji Eyacuiñajjija eseya queajeanee poani? Oja Bacuaejja oenei jiquio meshiyasijje ohua huoojeacapoajojoya ese onijje eba'etiitii'yojji Eyahuasijje, majoya eseya jjabaquicajji ojaya eseya queajeanee poani. 10Jjabaquicue quiana oe esejaya ebionei Eyacuiñajji queajea pojjeama poa eseyaneitii ca o queajea a-ajja poani. Ohuaya ca se ca oe ebionei queajeanee acoocapoa. Jamajjeya ohuaya oja Bacuaejja huoojeacapoa mano'yohua eseja mimishicuana cuijea'yojji. O manoje'yo bamajje eseja mimishicuana chama'yo acapoa Eyacuiñajjiya.

11Ecue dohuecuana jjo'icuana, Eyacuiñajjiya eseya jamaya queajeaneetii acapoquiani jjabaquimajje esenijje ba'eca Jesosaja epeejjicuana esejaya queajea acajji. 12Ojjañacuanaja esejaya Eyacuiñajji bajjimanei poani eseja ecojjaja. Jamatii esenijje ba'eca Jesosaja epeejjicuana eseyaya e'ejojonei queajea apoquiajo Eyacuiñajji esenijje nequipoquije. Majoya Eyacuiñajjiya eseya peacuana queajeanee ameesahuacapoquije queahuiso ojaya ejjashahuabaquijji jama. 13Eyacuiñajjiya ojaya Edojjoshahuapame eseya quiacanaje esenijje enequipoqui'yojjitii. Jamajjeya majoya eseya jjabaquiani Eyacuiñajji esenijjetii nequipoquiani, eseya onijje jjapeequipoquiani pea-ai oja quia Edojjoshahuapamejo. 14Eyacuiñajji Echii-aiya oja Bacuaejja huoojeacapoa jiquio meshiyasijje ojjaña meshijo ba'ecacuana nahue'yohua. Ecuaaya oya bapoa ecuanaja ecojjaa e'ejojonei oja huoojea. Jamajjeya maya ecuaa huohuiaña quiana. 15Ojjaña joya Jesosa Eyacuiñajjija Bacuaejja e'ejojonei ajji poanicuana Eyacuiñajjija'yo poani. Ojjaña macuananijjeya Eyacuiñajji nequipoquianitii.

16Eseya jamaya queaja'a jjashahuabaquinaje Eyacuiñajjiya eseya queajeanee acapoquiani jjeya, quijje pea-ai. Jamaya eseya jjabaquipoquiani. Bacue, Eyacuiñajjiya ojjaña meshijo ba'ecacuana queajeanee acapoquiani. Jamajjeya joya peacuana queajea apoquiajji poanicuana Eyacuiñajjija'yo poani, onijje jjapeequipoquiani pea-ai, Eyacuiñajji ojjaña macuananijjeya nequipoquiani. 17Eyacuiñajjiya eseya queajeaneetii acapoquiani jjabaquimajje meteama se poaje oe-ejjenei epojja apoa poajo ojjañacuanaja mimishicuana ja'anei huohui'yojji. Ma pojjajoya eseya metejjimanei poaje ona queaneenee pomeecaje'yo shajja-ajjamajje. Bacue, eseya ma ecua Jesosa Quito jiquio meshijo nequipoquiapoa jama pea-aiya poani. 18Joya Eyacuiñajjiya queajeanee acapoquiani jjabaquijji poanicuana meteama'yo ba'epoquiani. Jamajjeya eseya ohua queajeanee acapoquianitii jjabaquimajje meteama'yo ba'ecapoquijji. Bacue, joya queametetii ba'epoquianicuana jjashahuabaquiani acheshono oya queanee pomeecaje'yo oja mimishijo. Jamajojoya aje joya queametetii ba'epoquianicuana jjabaquiajja Eyacuiñajjiya oya queajeanee acani.

19Eseyaya peacuana queajeanee apoquiaña Eyacuiñajjiya ebionei eseya queajeanee acoocapoajjejojoya. 20Becacuana pojja'a jama poani ba'a: “Ecuea ca Eyacuiñajji queajeanee.” Jamatii ohuaya jama pomajje ma epojjajotii oja dohue poani Quitojo botiamanei acani. Jamajjeya coma dejja siajjepojji. Bacue, joya oja dohue queajea a-ajja poanija Eyacuiñajji queajea eapea-aijji pojjeamatii poaje. Comaaya oja dohue bacani ecojjaa jamatii ojaya oya jea-ama poani. Jamajjeya ojaya Eyacuiñajji e'ejojonei queajea eajji pojjeama poaje Eyacuiñajji oja ecojjajo jjabameequiajjajojoya. 21Jesosa Quitohua jiquio esohui jama huohuime acapoa ba'a: Joya Eyacuiñajji queajea apoquiajji poanicuanaja onijje Jesosaja epeejjicuana queajea apea-aicajji.

Currently Selected:

1 JUAN 4: ESE

Highlight

Compare

Copy