2 JUAN 1
1
Eyacuiñajjija esohuijo e'ejojonei jjashajja-ajjaquicapoquijji
1Eya ebabaca etii poani. Jiquio esohui eyaya tehueaña Eyacuiñajjija babaca poani eponaja ebajji, oja bacuacuanaja pea-ai. Eyaya quiana queajeanee apoquiaña. Eyayanei pojjeama, joya Eyacuiñajjija esohui e'ejojonei bapoquiajji poaniya queajea pea-ai quiana acani. 2Eyaya quiana jamaya queajeanee apoquiaña Eyacuiñajjija esohui e'ejojonei poani eseja sapajo nequipoquianitiijojoya. 3Eyacuiñajji Echii-aiya, oja Bacuaejja Jesosa Quito pea-aiya quiana queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua quiana pea-ai ohuaya. Queapamenee caba'emeecahua quiana jamatii queacamajanee ani. Ohuaya quiana queaja'a jjashahuabameequicani peacuana miquianaja queajea apoquiajjijo, oja esohui e'ejojonei poani jayojja miquiana queaja'a eba'epoquijjijo pea-ai.
4Eyaya mique bacuacuana queabihuineeya ba'yonaje oya Eyacuiñajjija esohui e'ejojonei poani jama ba'epoquianijojoya. Jamaya Eyacuiñajji Echii-aiya eseya huohuicani ese queaja'a ba'epoquijji oja esohui queapame jayojjaya. 5Jjeya Eyacuiñajjija babaca epona, eyaya miya huohuiajjaneiaña miquea minijje Jesosaja epeejjicuana queajeaneetii eapoquiajjijo. Jiquio eya jjeya mi huohuiaña esohui eyacua pojjeama miquea eapoquiajji. Oyatiiya ma yahuajo miya shajja-ajjacooapoa esohuitiiya huohuiaña. 6Bacue, peacuana minijje ba'eca queajeanee apoquiamajje e'ejojonei Eyacuiñajjija esohuijo jjashajja-ajjaquipoquiani. Jiquio esohui yahuajonei miquianaja eshajja-ajjaya jama poa ba'a: “Peacuana minijje ba'eca queajeatii apoquiacue.”
Esohui siajje huohuijji poanicuanajo tehuepea-aicapoa
7Jiquio meshijo queahuiso enequica esohui siajje huohuipoquiajji poanicuana ona dasiajji. Jama huohuitaime acani coma dejjacuaa ba'a: “Jesosa Quito caca Dejjapojji epo poejjimaneinei jiquio meshiyasijje.” Joya jama huohui pome poanicuana ca siajjepojji, Quito sapo-ajjanei poani ojjaña macuana. 8Jjajaahuananeiquicue quiana oe coma dejjacuanajo. A'a oja esohui siajje shajja-ajjajji quijje Eyacuiñajjija quia miquianaja chaco sosejje jjeshejjima yajjijo Eyahuasijje. Chacochacotiipoquicue quiana queapame, majoya quijje ma ohua quiasa-acani huisotii jjesheñaquije.
9Joya pea esohui eyacua yejji poanicuana ma Quitoja huohuijjima poa esohui comacuanaya Eyacuiñajji sapo-ajjanei nequipoquiani. Joya Quitoja esohuicuanajo jjashajja-ajjaquipoquijji poanicuana caca oe e'ejojonei Eyacuiñajjija'yo poani, Jesosa Quitoja'yo pea-ai. 10Jamajjeya oe quiaa joya pea esohui e'ejojonei pojjeama yejji poanicuana poeajo, a'a jjequinobiajjequijji miquianaja equiyasijje. A'a esohui o queabihui pojji ajji o poeajo. 11Bacue, joya o queabihui ja'ajjequijji poanicuana o asahuajji jayojja poaje peacuana esohui siajje huohuijji.
Oe-ejjenei esohui acapoa Juanya
12Eyaya quiana esohui queahuisonee huohuisa-aña. Jamatii ma esohuicuana tehuesapo-ajja eya jjeya. Eya ca miquianaque poquisapoani. Majoya miquiana cojjaneijo animajje ma esohuicuanajo mimije. Jama pomajjeya eseya queabihuinee poaje.
13Jesosaja epeejjicuaa Eyacuiñajjija babacaa miquiana queabihui pojji esohui acani. Jiquiojo ba'eca miquianaja dohue, miquianaja jjo'i pea-ai poani Quitojo.
Currently Selected:
2 JUAN 1: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
