2 Timothy 2
2
A Good Soldier of Christ Jesus - Christ Jesus Ṫaakiċitapi ...
1Heuƞ etaƞhaƞ, ċiƞkṡiwiċayapi ki iyeċel teċiḣila, Christ Jesus ṫawowaṡte ki uƞ waṡʹagniyiƞ kte. 2Tokel wauƞspewiċawakiye ki he namayaḣ'uƞ. Ċa he iyeċel niṡʹeya Iṫaƞċaƞ wiċalapi ki hena owiċayakiyakiƞ kte, na lena iƞṡʹeya iyopteya oyakapi kte.
3Akiċita ċaƞtetʹiƞzapi ki he iyeċel Christ Jesus ṫaakiċita heniċa, woteḣi ohaƞ yauƞ eyaṡ bliheliċ'iya yo. 4Akiċitapi ki taku waƞ el iċ'iċuƞzapi ki he eċela ahokiṗapi kte, akiċita iṫaƞċaƞyapi ki he iyokipiya ċiƞpi ki heuƞ. 5Tuweni ṡkal'akiċiyapi el wooṗe ki hena ahoṗapi ṡni haƞtaƞṡ ohiya okihi ṡni, . 6Wojuwiċaṡa eya wowaṡi eċuƞpi ki hena taku ojupi ki hena ṫokaheya glutapi kte. 7Taku eya oċiċiyake kʹuƞ hena iyukcaƞyaƞ yauƞ haƞtaƞaṡ Wak̇aƞṫaƞka taƞyaƞ okaḣniḣċiyiƞ ktelo.
8Woṫaƞiƞ Waṡte waƞ oblake ki leċel oyakapi ċa oċiċiyakelo. Jesus Christ he David wiċoiċaġe hetaƞhaƞ na wiċuƞtʹe etaƞhaƞ kini. Lena oċiċiyakelo. 9Woṫaƞiƞ Waṡte blaoṫaƞiƞ ki uƞ kakiṡmakiyapelo. K̇o maza uƞ makaṡkapi eyaṡ Wak̇aƞṫaƞka ṫaoiye ki leċeḣc̄i kaṡka okihipi ṡni. 10Ċa taku keyaṡ makakijiƞ kte, heċel Wak̇aƞṫaƞka ṫaoyate ki Jesus Christ ognayaƞ wowaḣtani etaƞhaƞ woaktuƞje na oihaƞke wanilya wiċoni hena waƞyaƞkapi ktelo. 11Wiċoyake ki le wowicak̇e:
“Christ kiċi uƞtʹapi kihaƞ
ake kiċi uƞnipi kte.
12Waċiƞuƞṫaƞkapi haƞtaƞṡ
ṫawokiċuƞze ouƞṗapi ktelo.
Christ sloluƞyaƞpi ṡni uƞkeyapi haƞtaƞṡ
iƞṡʹeyaƞ sloluƞyaƞpi ṡni keyiƞ ktelo.
13Na Christ wic̄auƞlapi ṡni eyaṡ
iye heċena wic̄aicʹila ktelo,
ċiƞ iye taƞyaƞ slolicʹiye heuƞ.”
An Approved Worker- Wowaṡi Eċuƞ Waƞ Heċetulapi
14Taku ki lena tuweni ektuƞṡwiċakiye ṡni yo. Na Wak̇aƞṫaƞka aniblesya lena leċel iwahowiċayayiƞ kte, he woiye uƞ ahoiyekiċiyapi kte ṡni. Ahoiyekiċiyapi ċaƞna tuweni wookiye iċu ṡni. Eṡʹeyaṡ, tuwe naḣ'uƞpi ki hena uƞṫuƞwiċayapi. 15Wak̇aƞṫaƞka etkiya iċ'ic̄'uya wowaṡi eċanu kte, na taku heċetu ki hena iṡteċeṡniyaƞ olakiƞ kte.
16Ikċekċeya woglakapi na waaiyapi ki hena etaƞ iḣeyab igluha yo. Leċetu ki hena taku eċela iwaṡte ki he oyate ki wowaḣtani gluwaṡʹakapi. 17Heċel woglakapi ki he ċaƞtepi ki iyuḣaƞ na akisni okihi ṡni. Wiċaṡa nuƞm Hymenaeus ena Philetus leċel woglakapi. 18Wowiċake ki etaƞhaƞ iḣayabiyayapi, aƞpetu waƞ el wiċuƞtʹe etaƞhaƞ wiċayukinipi kte ki he ehaƞni saƞmiyaye eyapi. Le heċetu ṡni, na etaƞ wiċalapi waƞ hena ṫawowiċalapi ki owiċayuijinapi.
19Wak̇aƞṫaƞka ṫawowiċala ki oagle waƞ akaƞl he ki he yujujupiċa ṡniya he. Akaƞl leċel owapi,''Wak̇aƞṫaƞka ṫaoyatepi ki hena slolwiċakiye. Ċa tuwe Wak̇aƞṫaƞka ċekiyapi ki hena taku heċetu ṡni ki hetaƞ igluḣlayapi kte."
20Etaƞ wijiċaya tipi ki hena wakṡiṡkokpa na uƞ wotapi ki hena maza oteḣika eya, maza zi na maza ska, ċa uƞ kaġapi, na huƞḣ iƞṡ ċaƞ na ċaƞsmuska uƞ kaġapi. Lena huƞḣ takuƞl iyotaƞ waṡte eċuƞpi ċaƞ uƞpi, na huƞḣ iƞṡ waikċeya eċuƞpi ċaƞ uƞpi. 21Oyate ki iƞṡʹeya leċel iwiċayaċiƞpi. Etaƞ taku heċetu ṡni ki etaƞ igluḣlayapi. Na taku owoṫaƞla ki hena eċela eċuƞpi ki hena iwaṡtepi na iyeċel Wak̇aƞṫaƞka iwiċaiyokipi kte. Na heuƞ taku ota waṡteṡte eċuƞpi kte.
22Taku eya oyate ṫeċapi ki iwiċayutan ki hetanhaƞ eḣayab igluzayo. Ohiƞniya taku waṡte eċuƞpiċa ki hena ole yo. Waċiƞyepiċaya igluha yo, wauƞṡila na tuwe ki iyuha ob taƞyaƞ uƞ wo. Oyate eya ċaƞte waṡtepi ki hena ob opiiċ'iya yo. 23Ṫawaċiƞ wanilya na witkoya ahoyekiċiyapi ki hena etaƞhaƞ iḣeyab igluha yo. Woṡiċe eċela lena etaƞhaƞ iċaġe yelo. 24Wak̇aƞṫaƞka ṫaeyapahapi ki hena woṡiċapi kte ṡni. Tuwe ki iyuha ċaƞte waṡteya ċaƞtewiċakiyuzapi kte, na taƞyaƞ wauƞspewiċakiyapi okihipi kte, na waċiƞṫaƞkapi kte.
25Tohanl oyate ki el iniglepi haƞtaƞaṡ aiyopteya iwiċalaksapiƞ kte. Heċel ogna taku heċetu ki he Wak̇aƞṫaƞka okaḣniḣ wiċakiyiƞ na wiċayahomni okihi kte. 26Wak̇aƞṡiċa ki kaṡkawiċayuha, na taku heċetu ṡni ki hena eċuƞwiċakiye, eyaṡ lena etaƞhaƞ Wak̇aƞṫanka wiċakiyuṡka okihi, na e eye Wak̇aƞṫaƞka oholapi kte.
Currently Selected:
2 Timothy 2: LKTNT20
Highlight
Copy
Compare
Share
Want to have your highlights saved across all your devices? Sign up or sign in
© American Bible Society
