2 Timothy 1

1Jesus ṫawahoṡiye ki le Paul miye. Wak̇aƞṫaƞka ṫawahoṡiye heċa makaġe, na he Jesus ċaje ki iyuoḣlogya wiċoni oihaƞke waniċa waƞ yuhapi okohipi ki he makʹu.

2Timothy, ċiƞkṡi wiċayapi tewiċaḣilapi ki iyeċel teċiḣila. Wak̇aƞṫaƞka Ateuƞyapi na Jesus Christ Iṫaċaƞ uƞkiṫawapi ki uƞṡinila kte, na niyawaṡte kte, na okablaya uƞniċiyiƞ kte!

Do Not Be Ashamed of the Lord - Iṫaƞċaƞyapi Ki He Iṡteċe Ṡniyo

3Aƞpetu na haƞhepi iyohila waċeċic̄iciye. Atewiċuƞyaƞpi ki ob Wak̇aƞṫaƞka ċeuƞkiyapi ki he takuni iṡteċe ṡni wopila ewakiye, tohaƞl ċiksuya ċaƞna wopila eṗe. 4Yaċeye ċa naċiḣ'uƞ na ċiksuye, na waƞċiƞyaƞka waċiƞ, heċel iyomakipi kte. 5Nihuƞ Eunice ṫawowiċala ki tohaƞya waṡʹake ki he nakuƞ weksuye. Nik̇uƞṡi Lois ṫawowiċala ki iƞṡʹeya waiyehaƞ waṡʹake, na niƞṡʹeya iyeċel lena luha. 6Nape uƞ aċipuṫake ċa wowiċala ki le taƞyaƞ ilagyayiƞ kte. 7Woniyaƞ-Wak̇aƞ ki uƞ aniniyaƞpi haƞtaƞnaṡ takuni k̇ouƞkiṗapi kte ṡni, eṡʹeyaṡ wookiye, na wowauƞṡila uƞyuhapi kte, na ahouƞkicʹiṗapi kte.

8Wak̇aƞṫaƞka ṫoiye ki he iṡteċe ṡniya iwoyaglakiƞ kte. Na Wak̇aƞṫaƞka ṫaƞtaƞhaƞ uƞ owiċakaṡke tipi el kaṡkamake ki le nakuƞ imaṡteċe ṡniyo. Wak̇aƞṫaƞka ṫawowaṡʹake ki uƞ woteḣi waƞ wauƞyakapi eyaṡ iniyaṡni Woṫaiƞ Waṡte ki he uƞkoyakapi kte. 9Wak̇aƞṫaƞka uƞkaḣniġapi na niuƞyaƞpi heċel ṫaoyate heuƞċapi kte. Takuƞni ikipiya ecuƞkʹuƞpi ṡni eyaṡ, Wak̇aƞṫaƞka ehaƞni heċetu kta ċa yuṡtaƞ egnake. Eċiƞ lila wauƞṡila ki heuƞ ehaƞni taku yaƞke ki hena iyaƞke ṡnihaƞni, Jesus Christ iyoḣlogya lena egnake. 10Wak̇aƞṫaƞka ṫawowauƞṡila ki he yuhaunkiyapi ċiƞ, na he Christ Jesus iyoḣlogya uƞkahipi. Wanikiya uƞkiṫawapi ki he Christ Jesus e, he tʹe ki heuƞ Woṫaƞiƞ-Waṡte ki nauƞḣ'uƞpi, le oiyokpaze el iyojaƞjaƞya he na wiċoni oihaƞke waniƞl uƞyuhapi.

11Wowaṡi miṫawa ki he, Woṫaƞiƞ-Waṡte ki eyawapaha kta, na wahoṡiye, na wauƞspewiċakiya wiċaṡa hemaċa. 12Heuƞ waƞna makakije, eyaṡ heuƞ imaṡteċe ṡni. Waƞji wiċawala ki he slolwaye ki heuƞ, na taku waƞ iwahomaye ki he, mak̇a ihaƞke ṡni hehaƞyaƞ taƞyaƞ awaƞwaglakiƞ kte ki he slolwaye. 13Ektaḣci wooglake na wookaḣniġe kʹeya uƞspeċiciye kʹuƞ he takuni yuṫokca ṡni sutaya gluha najiƞ yo. Na Christ Jesus ṫawowauƞṡila na ṫawowiċala ki hena awaċiƞyaƞ gluhayo. 14Woniya-Wak̇aƞ ki oniċiyiƞ kte, taku waƞ ihaƞkeya waṡte ċa yuhaniċiyapi ki he taƞyaƞ awaƞyaƞka yo.

15Asia mak̇oċe el Iṫaƞċaƞ wiċalaya uƞpi kʹuƞ hena iyuha amayuṡtaƞpi, Phygelus ena Hermogenes k̇o.

16Onesiphorus ena ṫatiwahe ki ob uƞṡiwiċala kte leċel waċewakiye. He owiċakaṡke tipi el kaṡka emagnakapi kʹuƞ hehaƞ imaṡteċe ṡni na e e blihelmaye. 17Na hehaƞl Rome oṫuƞwaƞhe el hi kʹuƞ hehaƞ iyemaye ṡni hehaƞyaƞ taƞyelaḣci omale. 18Aƞpetu waƞ el wayasupi kihaƞ Jesus Iṫaƞċaƞ he Wak̇aƞṫaƞka iyuƞġiƞ kte, he Onesiphorus uƞṡilakiƞ kta waċewakiye. Ephesus oṫuƞwahe el he lila omakiya ċa slolyayapi.

Currently Selected:

2 Timothy 1: LKTNT20

Highlight

Copy

Compare