Isa 9
9
Nîtûciarîrîtwe mwana
1 #
Mat 4.15
Vûrûri ûrîa wecûrîtwe nî kîeva ndûkethîrwa ûrî na mathîna rîngî. Tene Ngai nîwatûmire mavûrûri ma Zebuluni na Nafutali mamenererue, nwatî vuvarî nîagaatûma Galili kûrîa andû a ndûrîrî matûûraga kûgîe na ûkumio. Vûrûri ûyû nî ûrîa ûrî njîrarî îrîa îthiîrîrîte gatagatî ka îria na Jorodani.
2 #
Mat 4.16; Luka 1.79 Andû arîa maatwîre mathiîcagîrîra ndumarî nîmonete ûtheri mûnene.
Andû arîa maatûûraga vûrûrirî wa nduma ndumanu,
rîu nîmarîrîtwe nî ûtheri.
3We Ngai-Mûnene, nîûtûmîte rûrîrî rûongerereke,
nîûtûmîte rûgîe na gîkeno kînene.
Nîmaracanjamûka marî mbere yaku,
marî na gîkeno ta vîndî ya maketha,
ta ûrîa andû makenaga rîrîa maragaana indo irîa matavîte.
4Nîûndû nîunangîte îcoki rîrîa rîamaritûvîrîte,
na ûkaunanga mûtî wa kwigîrîra ciande ciao.
Nîunangîte rûthanju rûrîa rwavinyagîrîria andû aku,
wata ûrîa wavootire athigari a mbaara a Midiani.
5Iratû cionthe cia athigari a mbaara arîa maatharîkagîra,
na nguo ciao cionthe irîa irî na maroro ma nthakame,
nîikaavîvua ta ngû.
6Nîûndû nîtûciarîrîtwe kaana.
Nîtûvetwe kaana ga kavîcî.
Na nîkavetwe vinya wa kwathana.
Gageetwa, “Mûtaarani wa Magegania,
Ngai mwene vinya wonthe, Vava wa Tene na tene,
Mûthamaki wa Thayû.”
7 #
Luka 1.32-33
Wathani wake nîûkaathiî na mbere ûkînenevaga;
vîndî cionthe ûkethagîrwa ûrî na thayû,
na nîagaatuîka mûthamaki vuva wa Daudi.
Nîakaaûrûngamia na aûmenyerere,
akaathanaga na kîvooto na ûthingu,
kuuma rîu nginya tene na tene.
Ngai-Mûnene mwene vinya wonthe nîke ûkaavingia maûndû mama.
Ngai-Mûnene nîakaaverithia Isiraeli
8Mwathani nîatuîrîrîte andû a Jakovu,
na îtuîro rîu rîgakinyîra andû a Isiraeli.
9Andû onthe a Isiraeli nîmakaamenya,
andû a mûvîrîga wa Efiraimu na andû arîa matûûraga Samaria,
maragia na mwîtîîo na ûng'endu makiugaga atîrî,
10“Nthingo cia matuvarî nî nyomomoku,
nwatî tue nîtûituma rîngî na mathiga marî maumie.
Itugî cia mîtî ya mîkûyû nî njûkangie,
nwatî vandûrî va cio nîtûtuma na cia mîtarakwe.”
11Kwoguo, Ngai-Mûnene nîakaarete nthû ciao#9.11 nthû ciao: Kîhibirania kiugîte ‘nthû cia Rezini.’
nîguo imatharîkîre.
12Andû a Sîria marî mwena wa îrathîro,
na andû a Filisiti marî mwena wa îthûîro,
mathamîtie tûnyua twao nîguo mamerie Isiraeli.
Kûnarî ûguo, marakara ma Ngai-Mûnene tî mathiru;
na nîatambarûkîtie njara yake nîguo îverithanie.
13Ngai-Mûnene mwene vinya wonthe averithia andû a Isiraeli, matiamûcokerera.
14Kwoguo mûthenya ûmwe Ngai-Mûnene nîagaatinia Isiraeli ciongo na mîkia,
agaatinia rûvûa rwa mûkîndû na rûthanje.
15Athuuri na andû arîa ave gîtîîo nîo ciongo,
nao arathi arîa mathomithanagia maûndû ma maveeni nîo mîkia.
16Atongoria a andû aya nîmamavîtithîtie,
nao arîa matongoragua nî andû aya nîmaûrîte.
17Kwoguo Mwathani ndakenagua nî anake aya,
ndarî na ntha na ciana ciao cia ndigwa na aka ao a ndigwa,
nîûndû andû onthe matiîcî Ngai,
na nîeki naaî na maragia maûndû ma waganu.
Nîûndû wa maûndû mau monthe, marakara make tî mathiru,
nwatî nwa atambarûkîtie njara yake nîguo îverithanie.
18Waganu wa andû wakanaga ta mwaki ûvîvagia nthaugû na mîgua.
Wakanaga ta mwaki ûkîvîvia mûtitû
ûkîrutaga ndogo ndito îkiunûkagia na îgûrû.
19Marakara ma Ngai-Mûnene mwene vinya wonthe,
nîmatûmîte vûrûri ûvîvue na mwaki,
nao andû nîta ngû cia gûwakania;
gûtirî mûndû ûracaîra mûndû ûrîa wîngî.
20Macunanaga indo nwatî matiîganagîra,
marîcaga nyama cia mûndû ûrîa wîngî,#9.20 Marîcaga nyama cia mûndû ûrîa wîngî: Mandîko mamwe maugaga ‘marîcaga nyama cia ciana ciao.’
wa mûndû atharîkagîra mûndû ûrîa wîngî.
21Manase na Efiraimu matharîkanagîra o ene,
nao oîrî marî vamwe matharîkagîra Juda.
Nîûndû wa maûndû mau monthe marakara ma Ngai-Mûnene tî mathiru,
nwa atambûrûkîtie njara yake nîguo îverithanie.
Currently Selected:
Isa 9: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
