Isa 10
10
1Andû arîa matungaga mawatho matarî ma kîvooto kaî marî na thîna-î,
mavîtûkagia mawatho ma kûvinyanîrîria.
2Mekaga ûguo nîguo maime athîni kîvooto,
na gûcuuna athîni a andû akwa kîrîa kîmagîrîrîte.
Matavaga aka a ndigwa,
na makaîa ciana cia ndigwa.
3Mûgeeka atîa mûthenya ûrîa Ngai akaamûverithia,
rîrîa akaamûretere rûkûngi rûnene kuuma vûrûri wa kûraca?
Mûkaathiî kûvoya ûtethio kûrî û?
Mûgaatiga ûtonga wenyu kû?
4Gûtirî ûndû mûgeka tiga kwînyitania na andû arîa ove,
kana mûgwe kûrî arîa aûrage.
Kûnarî ûguo, marakara ma Ngai-Mûnene tîmathiru,
na nîatambarûkîtie njara yake averithanie.
Ngai-Mûnene nîwatûmîre Mûthamaki wa Asîria
5 #
Isa 14.24-27; Nah 1.1—3.19; Zef 2.13-15 We Asîria, nîwe rûthanju rûrîa ndûmagîra narakara,
nîwe mûragi wa mang'ûrîka makwa.
6Natûmire Asîria akaverithie vûrûri ûtaicî Ngai,
namwathire akaverithie andû arîa mandakarîtie;
akamacune indo na amatave,
na amakinyange ta ndaka njîrarî.
7Nwatî Asîria ndaarî na mworoto ûcio na tîguo eeciragia gwîka;
nwatî eendaga gûcûkangia viû,
na kûthiria mavûrûri meengî wata ûrîa kûngîvoteka.
8Etîîaga akiugaga atîrî,
“Kinthî atongoria a athigari akwa onthe tî athamaki?
9Nîmvoota Kalino wata ûrîa nekire Karikemishi.
Nîmvoota Hamathi wata ûrîa nekire Aripadi,
na mvoote Samaria wata ûrîa nekire Damesiki.
10Wata ûrîa naaverithirie mothamaki marîa maagoocaga mîvuanano,
mîvuanano yarî mînene gûkîra îrîa yarî Jerusalemu na Samaria,
11nwaguo ngaacûkangia Jerusalemu na mîvuanano yakuo,
wata ûrîa nekire Samaria na mîvuanano yakuo.”
12Rîrîa Mwathani akaarîkia wîra wake wonthe Kîrîmarî gîa Zayuni na Jerusalemu,
nîakaaverithia mûthamaki wa Asîria nîûndû wa mwîcaaro na mwîtîîo wake.
13Nîûndû ke etîîaga akiugaga atîrî,
“Mbîkîte ûndû ûyû nie mwene,
wana ngameka na ûûgî wakwa nîûndû nîrî na ûmenyo.
Nî nthengutîtie mîvaka ya mavûrûri,
na ngamacuuna ûtonga wao;
nîngwîthîtie athamaki ao ta matharîkîrîtwe nî ndegwa.
14Ta ûrîa mûndû atambarûkagia njara akanyita kîomba Kîam gîconi,
nwaguo naanyitire ûtonga wa andû.
Ta ûrîa mûndû ocanagia matumbî matigîtwe kîombarî,
nwaguo mbocete andû a nthî yonthe.
Gûtirî mûndû wanarî ûmwe wambararirie îthagu kana atumûra kanyua ambugîrîrie!
15Îthanwa nwa rîtîîre mûndû ûrîa ûrarîtûmîra?
Mûcumano nwa wîneneverie mûndû ûrîa ûtinagia naguo?
Nîkwa rûthanju rûngîambararia mûndû ûrîa ûrûkagîrîria,
kana mûragi ûkîrîrie mûndû ûrîa ûûtûmagîra!”
16Kwoguo Mwathani, Ngai-Mûnene mwene vinya wonthe,
nîakaarete mûrimû wa gûtûma athigari ake arîa anoru magînje,
naguo riiri wake nîûkaavîvua wakane ta mwaki ûkîrîrîmbûka.
17Ngai, ûrîa arî ke ûtheri wa Isiraeli, akethîrwa ekariî ta mwaki.
Mûtheru wa Isiraeli akethîrwa ekariî ta rûrîrîmbî rwa mwaki,
ûrîa ûkaavîvia mîgua na nthaugû ciake mûthenya ûmwe.
18Naguo riiri wa mîtitû yake na mîgûnda yake mînoru;
Ngai-Mûnene nîakamîcûkangia îthire viû,
îkethîrwa îkariî ta ûrîa mûndû athiragua nî mûrimû.
19Mîtî îrîa îgaatigara îkethîrwa îrî mînini mûno,
atî nginya mwana wa rûkenge nwa avote kûmîtara.
Andû anini nîmagaacoka
20Mûthenya ûcio andû a Isiraeli, arîa makethîrwa matigarîte na andû a Juda arîa makethîrwa marî mwoyo matikevoka rîngî vûrûri ûrîa wamavinyagîrîria, nwatî makevoka nama Ngai-Mûnene, Ûrîa Mûtheru wa Isiraeli. 21Andû a Isiraeli arîa magaatigara nî magaacokerera Ngai mwene Vinya. 22#Aro 9.27 Wana ethîrwa andû aku Aisiraeli nî eengî ta mûthanga ûrîa ûrî rûtererî rwa îria, nî andû anini tu magaacoka. Nîkûvangîtwe andû macûkangue, na gûcûkangua kûu gûgekîka na kîvooto. 23Nîûndû Mwathani, Ngai-Mûnene mwene vinya wonthe nîatuîte atî nîagaacûkangia nthî yonthe wata ûrîa augîte.
Ngai-Mûnene nîakaaverithia Asîria
24Kwoguo Mwathani, Ngai-Mûnene mwene vinya wonthe arauga atîrî, “Mue andû akwa arîa mûtûûraga Zayuni, mûtigetigîre andû a Asîria wana mamûriva na njokoma kana mûragi ta ûrîa mwekagwa nî andû a Misiri. 25Nîûndû vuva wa kavinda kanini marakara makwa nîmakaathira na nîngaacûkangia andû a Asîria nîrî na mang'ûrîka. 26Nie, Ngai-Mûnene mwene vinya wonthe, nîngaamariva na kîvoko ta ûrîa narivire andû a Midiani marî îthigarî rîa Orebu. Ngaamaverithia wata ûrîa naverithirie andû a Misiri. 27Vîndî îo, nîngaamwaûra mûrigo ûrîa Asîria mamwigîrîrîte, na munange îcoki rîrîa mamwigîrîrîte ngingo.”
Nthû nîciatharîkîre
28Nthû nîciaunûkirie kuuma Rimoni,
na nînginyu îtûûrarî rîa Aiathi!
Ivîtûkîrîrîte Migironi!
Na cigîte mîrigo yacio Mikimashi!
29Nîivîtûkîte îriûko,
na ûmûnthî nîmararîrîra Geba!
Andû a Rama marainaina nî guoya;
nao andû a Gibea, îtûûra rîa Saûlo nîmaûrîte.
30Ugîrîriani, mue andû a Galimu!
Thikîrîriani, mue andû a Laisha!
Metîkeni, mue andû arîa mûtûûraga Anathothi!
31Andû a Madimena nîkwa maraûra,
andû arîa matûûraga Gebimu maraûra matikaûragwe.
32Ûmûnthî nthû nîikûrûngama Nobu,
ikûnjîrîte kîrîma gîa Zayuni ngundi,
karîma ka îtûûra rîa Jerusalemu.
33Taroria, Ngai-Mûnene mwene vinya wonthe
akaamarivania nthî ta ûrîa mvûa cia mûtî irivanagua ciatemwa;
njamba irîa nene nîigaatemwa igwe nthî,
nao arîa etîi nîmagaaconorithua.
34Ngai-Mûnene nîagaatemanga nthû ta ûrîa mîtî îrî mûtitûrî îtemagwa na îthanwa,
amagwîthie ta mîtarakwe îrîa mînene ya Lebanoni!
Currently Selected:
Isa 10: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
