Popular Bible Verses from Isa 9

Share

Nîûndû nîtûciarîrîtwe kaana. Nîtûvetwe kaana ga kavîcî. Na nîkavetwe vinya wa kwathana. Gageetwa, “Mûtaarani wa Magegania, Ngai mwene vinya wonthe, Vava wa Tene na tene, Mûthamaki wa Thayû.”

Andû arîa maatwîre mathiîcagîrîra ndumarî nîmonete ûtheri mûnene. Andû arîa maatûûraga vûrûrirî wa nduma ndumanu, rîu nîmarîrîtwe nî ûtheri.

Wathani wake nîûkaathiî na mbere ûkînenevaga; vîndî cionthe ûkethagîrwa ûrî na thayû, na nîagaatuîka mûthamaki vuva wa Daudi. Nîakaaûrûngamia na aûmenyerere, akaathanaga na kîvooto na ûthingu, kuuma rîu nginya tene na tene. Ngai-Mûnene mwene vinya wonthe nîke ûkaavingia maûndû mama.

Iratû cionthe cia athigari a mbaara arîa maatharîkagîra, na nguo ciao cionthe irîa irî na maroro ma nthakame, nîikaavîvua ta ngû.

Vûrûri ûrîa wecûrîtwe nî kîeva ndûkethîrwa ûrî na mathîna rîngî. Tene Ngai nîwatûmire mavûrûri ma Zebuluni na Nafutali mamenererue, nwatî vuvarî nîagaatûma Galili kûrîa andû a ndûrîrî matûûraga kûgîe na ûkumio. Vûrûri ûyû nî ûrîa ûrî njîrarî îrîa îthiîrîrîte gatagatî ka îria na Jorodani.

We Ngai-Mûnene, nîûtûmîte rûrîrî rûongerereke, nîûtûmîte rûgîe na gîkeno kînene. Nîmaracanjamûka marî mbere yaku, marî na gîkeno ta vîndî ya maketha, ta ûrîa andû makenaga rîrîa maragaana indo irîa matavîte.

Nîûndû nîunangîte îcoki rîrîa rîamaritûvîrîte, na ûkaunanga mûtî wa kwigîrîra ciande ciao. Nîunangîte rûthanju rûrîa rwavinyagîrîria andû aku, wata ûrîa wavootire athigari a mbaara a Midiani.