Isa 8

Mûvîcî wa Isaia nîwatuîkire rûûri kûrî andû

1Ngai-Mûnene nîwambîrire atîrî, “Oca rûvaû rûnene na wandîke îgûrû rîaruo na ndemwa nene ingîthomeka: “Tava na îvenya! Oca narua!”#8.1 Tava na îvenya! Oca narua: Kîhibirania kiugaga, Maheri-shalali-hashibazi. 2Kwoguo nînocire andû aîrî evokeku, matuîke aira, nao nî: mûthînjîri-Ngai Uria na Zekaria, mûvîcî wa Jeberekia.

3Nînacokire ngîmenyana na mûka wakwa kîîmwîrî, akîgîa îvu na agîciara kaana ga kavîcî. Nake Ngai-Mûnene nîwambîrire atîrî, “Gete ‘Maheri-shalali-hashibazi.’ 4Nîûndû mbere ya kaana gakaamenya gwîtana ‘Vava’ kana ‘Nyanya,’ ûtonga wonthe wa Damesiki wana indo irîa itavîtwe Samaria nîigaakuwa ivirîrwe mûthamaki wa Asîria.”

Mûthamaki wa Asîria nîaûkîte

5Ngai-Mûnene nîwambarîrie rîngî akîmbîra atîrî, 6“Andû aya nîmarega manjî ma karûnjî ga Shiloa#8.6 karûnjî ga Shiloa: Karûnjî karîa kanyûrûrûkaga kuuma kîthimarî kîrîa kînene kîrî mwena wa îrathîro wa Jerusalemu. marîa metîkaga kavora na megua guoya nîûndû wa mûthamaki Rezini na mûthamaki Peka, mûvîcî wa Remalia. 7Kwoguo nie Mwathani, nîngûmaretithîria mûthamaki wa Asîria na athigari ake a mbaara onthe arîa marî vinya mekariî ta mwîcûro mûnene wa manjî ma rûnjî rwa Farati rwîcûrîte rûkauna. 8Mwîcûro wa rûnjî rûu ûkaanyagania vûrûrirî wa Juda, na manjî mengîve mûno mecûre vûrûri wonthe. Nwatî Ngai arî vamwe natue, mathagu make matambûrûkîte kûndû kuonthe nîguo makunîkîre vûrûri wake.”

9Mue andû a mavûrûri, gomanani vamwe na nî mûkaamaka!

Ta thikîrîriani mue mavûrûri marîa marî kûraca!

Îîvarîrieni kûrûa na mûmake!

Îkarani mwîvarîrîtie na mûmake!

10Îîcûranieni vamwe, nwatî mîvango yenyu ndîkaavinga!

Rûthani mîvango, nwatî ndîgaakinyanîra,

nîûndû Ngai arî vamwe natue.

Ngai-Mûnene nîwakaanirie Mûrathi Isaia

11Ngai-Mûnene nîwangaanirie na vinya ndikarûmîrîre njîra cia andû aya. Aambîrire atîrî, 12#1Pet 3.14-15 “Ndûkanyitanîre na mîvango yao, na ndûgetigîre maûndû marîa maretigîra, kana wîgua guoya. 13Nwatî ririkana, atî Ngai-Mûnene, mwene vinya wonthe, nînie nîngîkûmakia na nîmbagîrîrwe nî gwîtigîrwa. 14#1Pet 2.8 Nie ngaatuîka kûndû gwa kûrîra, ngatuîka ta îthiga rîa kûmavînga, îthiga rîa kûvînga mothamaki ma Juda na Isiraeli; na nduîke mûtego wa kûnyita andû a Jerusalemu. 15Andû eengî nîmakaavîngwa; nîmakaagwa na maunîkange. Nîmakaanyitwa nî mûtego ûcio na mathiîwe nao.”

Gûkaanua kwaranîria na andû arîa akuû

16Nîngûmenyerera maathani mama na nîmathomithie kûrî arutwa akwa. 17#Ahib 2.13 Nîmbeterera Ngai-Mûnene, ûrîa wîthithîrîte andû a Jakovu, nîke ngwîvoka.

18 # Ahib 2.13 Nie vamwe na ciana irîa Ngai-Mûnene amvete nî kîonereria na rûûri kûrî andû a Isiraeli kuuma kûrî Ngai-Mûnene, mwene vinya wonthe ûrîa ûtûûraga Kîrîmarî gîa Zayuni.

19Andû nîmakaamwîra atîrî, “Thiîni mûkaûrie ûvoro kûrî ago na oni maûndû arîa maragia na tûmîgambo tûceke.” Nîmakaamwîra atîrî, “Nwanginya metagie ûtaaro kûrî arîa akuû vandûrî va arîa marî mwoyo?”

20Mûgaacokeria andû acio atîrî, “Thikîrîriani ûrîa Ngai-Mûnene aramûthomithia! Mûtikathikîrîrie ago, nîûndû matiaragia ûma.”

Vîndî ya thîna

21Andû nîmakaaûrûra vûrûrirî wao mathirîtwe nî vinya na makavûta. Nîûndû wa ûrîa makethîrwa mavûtîte, nîmakaarakara na marume mûthamaki wao na Ngai wao. Nîmakaaroria îgûrû 22na marorie nthî, nwatî makeegua kîeva, mone thîna na nduma. Magaaikua ndumarî ndumanu.

Currently Selected:

Isa 8: KKB

Highlight

Copy

Compare