Sav 18
18
Wathi wa Ndeviti wa Ũsindi
(2Sam 22.1-51)
Kwa mwinĩthya: Savulĩ ĩno yaandĩkiwe nĩ Ndeviti mũthũkũmi wa Mwĩai Ngai. Ainĩie Mwĩai Ngai wathi ũũ yĩla wamũvonokisye kuma ũtonyinĩ wa amaitha make onthe, na kuma ũtonyinĩ wa Saũlo.
1Ame Mwĩai Ngai vinya wakwa nĩngwendete.
2Mwĩai Ngai nĩwe ũnzũvĩaa,
nĩwe wĩvitho wakwa, na mũtangĩĩi wakwa.
Ngai wakwa nĩ ĩvia yakwa ũla nĩvithaa nthĩnĩ wake.
Nĩwe ngao yakwa na vinya wa ũtangĩĩo wakwa,
wĩvitho wakwa mũlũmu.
3Nĩnĩkaĩlaa Mwĩai Ngai ũla waĩlĩte kũtaĩwa,
nake nũndangĩĩaa kuma amaithanĩ makwa.
4Mĩisyo ya kĩkw'ũ nĩyanthyũlũlũkĩte;
itulumo sya wanangĩko syaĩ ĩũlũ wakwa.
5Mĩisyo ya kũla maveva ma ala akw'ũ mekalaa nĩyanthyũlũlũkĩte;
mĩteo ya kĩkw'ũ nĩyangwatie.
6Thĩnanĩ wakwa nĩnamwĩkaĩlile Mwĩai Ngai;
nĩneekaĩlile Ngai wakwa andetheesye.
Nĩweewie wasya wakwa e Ĩkalũnĩ yake;
nĩweethukĩĩisye kĩĩo kyakwa na matũ make.
7Nĩvo ĩndĩ nthĩ yatetemie na yathingitha;
myambĩlĩĩlyo ya iĩma nĩyathingithie,
yathingithie nũndũ Ngai nĩwathatĩte.
8Syũki nĩyaumie manyiũũnĩ make,
na mwaki ũvĩvasya, na makaa me mwaki,
syauma kanyw'anĩ wake.
9Nĩwaatũie matu, na atheea nthĩ,
atheeie na matu makamu me ungu wa maũũ make.
10Nĩwalĩsile kyũmbenĩ kĩ nthwau kĩtawa mũkelũvi na aũlũka;
nĩwaũlũkile aitũmĩa kĩseve takyo nthwau syake.
11Nĩweevw'ĩkie kĩvindu ngalĩko syonthe,
mũumbĩ mũkamu wusũĩte kĩw'ũ nĩwamwĩlingĩlĩte.
12Kuma ũtheunĩ wake mũtisu,
mbua ya mavia na makaa me mwaki,
nĩsyaumaa ikesĩla matunĩ asu make.
13Mwĩai Ngai nĩwatundumie e ĩtunĩ;
wasya wa Ũla wĩ Ĩũlũ Mũno nĩweew'ĩkie#18.13 Maandĩko amwe ma tene ma Ndeto ya Ngai nĩmo maĩtye ũu, (sisya 2Sam 22.14) kĩthyomo kya Kĩevelania kyaĩtye, nĩkweew'ĩkie mbua ya mavia na makaa ma mwaki
14Nĩwekisye maangi make, na anyaĩĩkya amaitha make;
nĩwamalũngilye na kyeni kya ũtisi mathi masembete.
15Yĩla Mwĩai Ngai wakanisye amaitha make,
na aneena namo na wasya mũnene e mũthatu,
kũndũ kũliku ũkanganĩ nĩkwoonekie ũndũ kũilyĩ,
na myambĩlĩĩlyo ya nthĩ yavuwa yooneka.
16Mwĩai Ngai nĩwatambũũkisye kw'oko kwake kuma ĩũlũ na angwata;
nĩwangusisye ambumya kĩw'ũnĩ kĩliku.
17Nĩwandangĩĩie kuma mũmaithanĩ wakwa wĩ vinya,
na kuma kwa ala mamenaa,
ala maĩ na vinya mwingĩ mbee wakwa.
18Yĩla naĩ thĩnanĩ nĩmambithũkĩie,
ĩndĩ Mwĩai Ngai nĩwanzũvĩie.
19Nĩwandetheeisye nauma mũisyonĩ;
nĩwandangĩĩie nũndũ nĩwendeew'e ninyie.
20Mwĩai Ngai nũnengete ĩtuvi kwĩanana na ũlũngalu wakwa,
nũnduvĩte kwĩanana na ũtheu wa maũndũ ala nĩkaa.
21Nũndũ nĩnĩanĩasya mĩao ya Mwĩai Ngai,
na ndyaaĩka ũndũ mũthũku kwa kũmũtia Ngai wakwa.
22Nĩnĩkaa ũndũ myamũlo yake yonthe ĩkwasya,
na ndyaalea kwĩanĩsya motw'ĩo make.
23Ndyaĩ nĩtalĩlwa ĩvĩtyo mbee wake,
na nĩneesũvĩaa ndikavĩtye.
24Mwĩai Ngai nũnengete ĩtuvi kwĩanana na ũlũngalu wakwa,
kwĩanana na maũndũ maĩlu ala nĩkaa mbee wake.
25Ame Mwĩai Ngai wĩ mũĩkĩĩku kwa andũ ala aĩkĩĩku kwaku,
na wĩ mũseo kwa ala aseo.
26Wĩ mũtheu kwa ala atheu,
ĩndĩ ala athũku nũmakanasya.
27Nũtangĩĩaa andũ ala menyivasya,
ĩndĩ nũnyivasya ala mekathĩĩaa.
28Ame Mwĩai Ngai nenge kyeni kyaku;
nũalyũlaa kĩvindu kyakwa kĩkatwĩka kyeni.
29Nũnengae vinya wa kũsinda nguthu ya amaitha makwa,
na ũtonyi wa kũkĩlĩla ũkũtanĩ woo.
30Maũndũ ala Ngai ũsu wĩkaa nĩmeanĩu;
watho wa Mwĩai Ngai nĩ wa kwĩkwatw'a.
Ngai ailyĩ ta ngao kwa andũ onthe,
ala mevithaa nthĩnĩ wake.
31Mwĩai Ngai nowe Ngai e weka,
Ngai e weka nĩwe ũsũvĩo witũ.
32Ngai nĩwe ũnengae vinya,
na nĩwe ũndongoeasya nzĩanĩ ngethĩwa nĩ ũsũvĩonĩ.
33 #
Ava 3.19
Nũtumaa maũũ makwa methĩwa mailyĩ ta ma nthia;
nũndonyethasya kũũngama iĩmanĩ ndũlu.
34Nũmanyĩasya kũkita,
nĩ kana nĩthĩwe ndonya kũkoota ũta wa kyũma kĩtawa mbulonzi.
35We Mwĩai Ngai nũnzũvĩaa na kũndangĩĩa,
na kw'oko kwaku kwa aũme nĩkũngwatĩĩaa;
ũtethyo waku nũtumĩte nĩthĩwa na nguma.
36Nũtumaa nzĩa yakwa yĩthĩwa yĩ ntheu,
nĩ kana ndikese kũvalũka.
37Nĩnaatĩĩie amaitha makwa na namasinda,
ndyaaekana namo nginya namamina vyũ.
38Nĩnamatonyie mũkuthũ weethĩa maitonya kũkĩla;
nĩmavalũkile ungu wa nyaĩĩ syakwa.
39Nĩwanengie vinya wa kũkita,
na watuma nĩsinda amaitha makwa.
40Nĩwatumie amaitha makwa masemba mangĩĩte;
nĩnaminie ala mamenete.
41Nĩmakayaa matetheew'e,
ĩndĩ vayaĩ mũndũ ũmatangĩĩa.
Nĩmamwĩkaĩlile Mwĩai Ngai,
ĩndĩ ndaamasũngĩa.
42Nĩnamatumbatumbie mavinya ta kĩtoo kĩla kĩũlũkaw'a nĩ kĩseve.
Nĩnametie nthĩ ta ndaka yĩ nzĩanĩ.
43Nũmbonoketye kuma kwa andũ ala mang'endeaa,
na ũkandw'ĩkĩthya mũsumbĩ wa andũ ĩũlũ wa nthĩ;
andũ ndeesĩ yu matw'ĩkĩte athũkũmi makwa.
44Andũ aeni makumanaa mbee wakwa makanenga ndaĩa,
meew'a naneena nĩmekaa ũndũ nasya.
45Onthe nĩmakusaa ngoo,
na kũka mathĩlĩĩte kuma kũndũnĩ kwoo kwa wĩvitho.
46Mwĩai Ngai e thayũ! Nĩataĩwe mũsũvĩi wakwa!
Tavany'ai ũnene wa Ngai wakwa ũla ũndangĩĩaa.
47Nĩwe Ngai ũla ũtumaa nĩsinda amaitha makwa;
nũtumaa andũ onthe ĩũlũ wa nthĩ methĩwa ungu wa ũtonyi wakwa.
48Nũndangĩĩaa kuma amaithanĩ makwa.
Mwĩai Ngai nũtumaa nĩsinda ala mamenaa,
na kũnzũvĩa kuma kũla kwĩ andũ athũku.
49 #
Alo 15.9
Kwoou we Mwĩai Ngai nĩngũũtaĩa,
katĩ wa andũ onthe ma nthĩ,
na kwina mbathi sya kũkumya ĩsyĩtwa yaku.
50Ngai nũnengae mũsumbĩ wake ũsindi mũnene;
nĩwonanasya wendo ũtaolekaa kũla kwĩ ũla ũnyuvĩte,
kũla kwĩ Ndeviti na nzyawa syake kũvika tene na tene.
Currently Selected:
Sav 18: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
