Sav 19
19
Ũkumyo wa Ngai Syĩndũnĩ ila Woombie
Kwa mwinĩthya: Savulĩ ĩno yaandĩkiwe nĩ Ndeviti
1Matu nĩmonanasya ũkumyo wa Ngai,
yayaya nĩyĩtavanasya wĩa wa moko make.
2Mũthenya ũtavasya mũthenya ũla ũatĩĩe,
naw'o ũtukũ ũitavya ũtukũ ũla ũatĩĩe.
3Vayĩthĩawa ndeto kana kĩthyomo,
na wasya wasyo ndwĩw'ĩkaa.
4 #
Alo 10.18
Ĩndĩ ũu wĩ o vo wasya wasyo nũtũnganĩte nthĩ yonthe;
ndeto syoo nivikĩte kĩla vandũ ĩũlũ wa nthĩ.
Mwĩai Ngai nĩwaseũvĩisye syũa wĩkalo yayayanĩ.
5Syũa yumaa kwakya yĩilyĩ ta mũtwaani wĩ na ũtanu,
ta mũsembi wĩyũmbanĩtye kũsemba.
6Yumaa mũthyanĩ ũmwe wa ĩtu,
na kwĩlingĩla yĩthi mũthyanĩ ũla ũngĩ.
Vai kĩndũ kĩtonya kwĩvitha ũvyũvu wayo.
Mĩao ya Mwĩai Ngai
7Mĩao ya Mwĩai Ngai nĩ mĩanĩu,
nĩvuũkasya ngoo.
Mokũsĩ ma Mwĩai Ngai nĩ ma kũĩkĩĩwa,
nĩmanengae ũĩ ala mate na ũmanyi.
8Mawĩaĩo ma Mwĩai Ngai nĩ maw'o,
na nĩmatanĩthasya ngoo.
9Kũkĩa Mwĩai Ngai nĩ kũseo,
nĩkwĩkalaa tene na tene.
Myamũlo ya Ngai nĩ yaw'o,
na yonthe nĩ mĩlũngalu.
10Nĩ mĩseo vyũ mbee wa thaavu,
o na mbee wa thaavu mũseo mũno,
Yĩ mũyo mbee wa ũkĩ wa nzũkĩ;
mbee wa ũkĩ wa nzũkĩ wumĩte mawanĩ.
11Nĩnengae nyie mũthũkũmi waku ũmanyi,
na nĩnĩtuvawa nũndũ wa kũmĩanĩsya.
12Nũũ ũla ũtonya kũmanya mavĩtyo make?
Ndekee mavĩtyo makwa ala ndesĩ!
13O ta ũu nzũvĩane na naĩ sya ngũlũ nyie mũthũkũmi waku;
ndũkaeke inzumbĩke!
Nĩvo ĩndĩ nĩĩthĩwa ndatũlwa mũtĩ nĩ mũndũ,
nde na ĩvĩtyo ya kwĩka naĩ nthũku.
14Ame Mwĩai Ngai wĩvitho wakwa na mwovosya wakwa,
ĩtĩkĩla ndeto syakwa na mesilya ma ngoo yakwa.
Currently Selected:
Sav 19: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
